𝗞𝗛𝗔𝗜𝗞𝗛𝗜𝗡 𝗥𝗨𝗔𝗟 𝗟𝗢𝗛 𝗥𝗢𝗣𝗨𝗜𝗡𝗔

 Upa Stephanan amah denghlumtute lungtum lo thlawk kara van inhawng a hmuh a, chuta Mihring Fapa Pathian dinglama ding a hmuh ang khan kumin hi Pathian ropuina hmuh thiam kum han ni hlauh mai sela aw. Chu ‘khaikhin rual loh Ropuina’ chuan a hneh em avangin Tirhkoh Paula chuan, “Pathian rawng kan bawl hian kan zam lo va, pawn lamah chuan chau telh telhin lang mah ila, chhung lam chu a siam thar char char a ni zawk. He khawvelah hian hrehawm deuh thin mah se chu chatuan ropuina, thil dang nena khaikhin rual loh khawpa nasa chu min siamsak si alawm,”(ref. II Kor. 4:16-18) a ti et mai a nih kha.

Heta ropuina sawi nana Mizo Bible-in ‘nasa’ tih tawngkam a hman hi English Bible-ah chuan ‘weight’ (rihna) tih hmangin ‘weight of glory’ a ti a. Chuti zawnga lak chuan ‘ropuina buk rih zia’ tih lamin a sawi theih awm e. Paula chuan, ‘Chu ropuina chuan min buk rit em a, thil hmuh theih lohte kan thlir lo thei lo va, kan hrehawmna pawh malsawmna a ni zel a nih hi,’ a tihna a nih hi. Paulan chu Ropuina nena a khaikhinin thil dang zawng zawng chu a kang lah lah vek a ni. Chu ‘ropuina’ chuan min ‘delh’ rit ve se, Pathian Ropuina dik chu hmu thiam ila, chu Ropuina chuan min hneh se la, kan nun kawngah chiaiin kan awm fo lo tur a nia. Ringtute hian he khawvel hi kan hmunpui ber emaw kan ti fo hi kan buaina a ni. He lei hi chu lehkhabu ‘thuhmahruai’ a nih hi, a bu chhung thu chu pui tak a ni. Ropuina lo la awm tur atana inbuatsaihna mai chauh a nih avang hian inbuatsaihna tha i nei mawlh teh ang u.

Kan ramah hian ringlote zinga Chanchin Tha a hnawn dan leh Ringtute pawhin kan Chanchin Tha kawl kan nun chhuahpui dan chin ka dawn chang hian rilrua lo lian ta ber chu – Pathian Ropuina hi kan hmu fiah lo em a ni? tih zawhna hi a ni. Pathian aia ngaih ropui, Pathian aia ropui zawk leh duhawm zawka hmuh kan ngah em a ni! Pathian Thu te chu ka sawi ve alawm, duh chin pawh kan nei ve alawm, mahse a Ropuina hian min delh bet lo va, min hip ral lo va, a Ropuina hian min thawng lo va, a Ropuina hian min tikhur lem lo! Ropui tih dang kan ngah em mai! Ropui dang kan um nasa em mai!

He kan sawi Ropuina hi tawp chin awm lo, ropuina a ni. Exodus 33:18-a Mosian Pathian hnena a request kha thilmak tak a ni lo thei lo. “I ropuina min hmuhtir rawh,” a ti a nih kha. A mak ka tihna chu Mosia aia Pathian thiltih mak hmu chiangtu kha an awm dawn emaw ni? ‘I ropuina ka hmu tawk tawh e…” ti mai awm tak khan “I ropuina mi hmuhtir rawh,” a la ti ta cheu. A tir atang khan - thing buk kang, ral si lo; a kutin a kawrawm a zen, a lo phar, a zen leh a, a dam duak; tiang rulah a chantir; tui thisenah a chang; chungu, hrik, thophurh, khau, khawihli a puang; ran a pul; rial a tla; khua a thim; Aigupta mi zawng zawng fa tir an thi; Tuipui sen a laiah a chat; Mana leh Vahminin a chawm- Mosia khan a hmu vek…Mahse, ‘I ropuina mi hmuhtir rawh,’ a la ti fan a ni. Pathian ropuina khan a hneh a, Pathian ropuina kha a addict a, Pathian ropuina tluka thlakhlelh a nei lo a ni awm e. A tawpah phei chuan a hmel a rawn eng a, puanin an khuh hial a nih kha. Pathian ropuina hi hmu chiang ila, thildang hian chhe khawpin min tibuai tawh lovang.

Chu ropuina hmu tur chuan khawi hmun bik emaw pan a ngai lo; chu ropuina puan bikna hmun a awm chuang lo ve. Ringtu awmna hi a ropuina puanna hmun tur chu a ni a, kohhranho awmkhawmna hi ropuinain a tuam chu a ni thin. Thuthlung Hluia thu mawi ber te zinga mi chu Exodus 40:34, “Tichuan inbiakna puan in chu chhumin a rawn tuam ta mup a, biak bûk chu LALPA ropuinain a lo khat ta a,” tih hi a ni. Lalpa ropuina chuan keimahni mimal, kan kohhran leh kan khawtlang hi han khat mup mai se la aw! A va ropui dawn em!

Khawiah pawh awm ila, kan nunah Pathian ropuina lang se; eng hna pawh thawk ila, kan hnathawhah Pathian ropuina lang se; eng thil pawh ti ila, keimahniah miten Pathian ropuina hmu zel rawh se. Chutiang tak a nih theih nan chuan kum 2022 atang hian Pathian Ropuina Khaikhin rual loh chu keimahni ngeiin hmuh i tum hmasa ang u. Tirhkoh Peteran hmel danglamna tlanga a hmuh ve kha chuan khawi dang kal a chak tawh lo, kha hmun aia awmna duhawm kha a awm thei tawh lo. Bawkte khawh a tum ta hial a nih kha. Lal Isua nihna dik tak a hmu ta si a. Thil dang a ngai tawh lo, hmun dang a tul tawh lo, engmahin a khaikhin zo si lo va. Chu khaikhin rual loh Ropuina chu hmuh theih a va pawimawh tehreng em!

*****