𝗞𝗔 𝗖𝗢𝗩𝗜𝗗 𝗧𝗘𝗦𝗧𝗜𝗠𝗢𝗡𝗬

Inring rengin ka awm a, ka rin loh lai takin a lo thleng! Covid hri a leng chum chum a, fimkhur a ngai nasa a kai ve thei kan ni tih pawh ka hria. Mahse, keima chungah tak chuan a thlen em chu ka ngai ngam thin lo nge ka inphal lo, chutiang ni ve turah ka inngai tlat lo. Chu mai bakah ngai neihna boruak a lo awm thui tawh hle a lo ni a. First wave vel kha chuan kan hlauvin kan invawng nasa a, second wave pawh kan la uluk viau, 3rd wave-ah meuh chuan a virus pawh a lo dal deuh tawh bawk nen, him deuh rohva inngaihna leh then lehrual han kawm chang pawhin kai mai lo tura inngaihna a lian aniang. Chutih lai tak chuan a rawn thleng rup mai a ni.

Rin loh lai takin

Hringnuna buaina leh harsatna lo thleng thin hi kan rin ang tak leh kan duh hun taka rawn thleng a vang hle mai. Bible-in inring reng (ready)a awm tur leh kan rin loh lai, kan beisei loh lai (unexpected) taka Mihring Fapa lo kal tur a sawi ang deuh kha a ni. Pathianniah hlim takin kan inkhawm a, thawhtanah kan committee, tlai lamah a vawt ser ser a, a tukah chuan khawsik nasa vak lo mah se mut dam tuma mut nilen a lo nuam a, kan ti nek nek ni 3/4 a lo liam a, Covid in-test ve ngei tha tihna a lo awm a, ka lo positive chiang a lo ni. Covid-ah pawh a dal tawh lam ka dawng ve emaw tih turin rim hriatna ka hloh lo va, chaw ei lah chu a tui suah tho a, ka khawsik pawh a sang lem lo a, ka khuh bawk lo va, ka ngaih a tha viau kha a nia.

Mahse, a ni 3-na tlai lamah ka fanu tleirawl te chu a khua a rawn sik ve ta tlat mai a, a tuk zingah kan naute kum 2 dawn tawh pang a rawn sa hlar mai bawk a. Kan han in-test tak theuhah chuan kan chhungkuain kan positive ta rup mai a ni. Mahnia room pakhata inkhung hran leh fimkhur taka ei leh in inpek ai chuan chhungkuaa han in-quarantined chu zia awm tak a ni. Na lutuk kan awm lo bawk a! Thil chiang tak erawh chu, he hringnunah hian kan beisei loh lai takin harsatna hi a lo thleng thin tih hi a ni a. Kan inthlahdah leh ngaihthat ruk lai hian kan ngam loh hian min tlakbuak thin tih hi hriat a va pawimawh tehreng em! Ngam loh a tam si! A lo thlen chuan a lo thleng mai thin a ni si a. Thlarau leh taksaah theih dan dana inrin reng pawimawhzia ka zir chhuak chiang khawp mai.

Tlawm thlak

Chutianga a chhungkuaa he hri duhawm lo tak chaw luttu a nih takah chuan Pa ber chu a inngaihtuah nasa ta angreng hle a. Chhungkaw humhimtu tur berin chhungkaw natna a thlen ta chu a ni a. A va pui lo deuh ve maw. Pa dangte a han chhui kual vel a, ani ang awm ve tak ang maw? Pa zawng zingah a va tlawm thlak ve le. Pa ber fimkhur loh vanga chhungkua kan han phek nat ta a nih chuan a va ropui dawn lo em! Vanduai vang hrim hrim pawh a ni thei ang, mahse chet pawlawh vang a ni thei tlat si a. Midangten an kai loh laia han kai bik tlat chu! Pa tan chuan inngaihtuah thui a awl duh hle a ni. Mahni duhzawng leh chakzawng um avanga chhungte tawrh ngawih ngawihna thlentute thiltih rapthlakzia pawh a lang chiang nghal a ni. Nupui fanaute ei ai han in ral ngat mai te, rila rah fate sikul fee tur ruih bawrhban nana hman phet tumte hi a va han ropui lo em aw! Chhungkhat pa ber chhungkaw ‘than mawh bawk’ han nih mai chu le!

Atna leh sualna hi eng chen chiaha inzawm nge an nih ang le? Nge thil thuhmun sawi dan hrang mai zawk? Mi fing tak sual tak si a awm theih ang em? A awm theih loh vang. Mi fing tak tak chuan sual kawng atthlakzia a hre chiang hle dawn si a. Rilru chak tak sual riau si chu a awm theih mai thei, sual lam kawnga hisap chak em em leh thluak hmang thiam pawh an awm thei ngei ang. Mahse, mi fing si sual si chu an awm theih a rinawm loh e. Sual kawng finthlak reng a awm si lo va. Chuvang chu a ni awm asin Sam ziakah leh Thufingte buah uar takin “Lalpa tih hi finna bul a ni,” (Sam 111:10; Thuf. 9:10)kan hmuh ve ve a. “Mi a chuan a rilruin Pathian reng a awm lo a ti” (Sam 14:1) tih te pawh kan chhiar ni. Helai chang phei hi chu Atheism leh Theism issue aiin “Mi a chu Pathian reng awm lo ang maiin a khawsa thin” tihna lam a ni zawk an la ti ta deuh deuh! A tawpkhawkah chuan atna (rilru buai ni lo) leh sualna hi a inzawm reng a ni awm e.

Ka tla

Covid vanga lockdown dawn chiaha piang, ka fapa, tar lam fa, Pathian venhimna avanga nausen hrisel tak, dam mawh hritlan pawh nei ngai lo, khawngaihthlak khawpa tlei leh tap duh lo chuan hripui chu a kai ve ang tih hlauvin kan veng nasa hle mai. Mahse, a tuk 5-na zing tho a pang a sa ta hlar mai chu pawi tiin kan kun ngawih ngawih mai a ni. Ni danga khawsik pawh hre ngai lo khan pa ber thil chawk luh avang liau liauvin pang sat vanga harh pawh harh peih lovin a mu bam mai si a. A kaikuang-pa thinlung a keh lo thei lo, rilru hi a hnual nghulh a ni ber mai. “Nang nausen pawisawi lo, khawi mah tual chhuak lo hi i pa vangin maw hetianga i nat le?” Zikpuii Pa thawnthu 𝘒𝘳𝘢𝘸𝘴 𝘉𝘶𝘭𝘢𝘩 𝘊𝘩𝘶𝘢𝘯 tiha a fanu thlan chunga tap zawih zawih kha ka hre chhuak uar uar mai!

Ka thlarau dinhmun chiang takin a rawn lang ta tlat mai le! Kei vanga ka fapa nausen khawsik hmuh hrehawm ka tih em em ang chin chauh pawh hian kei vanga kraws lera tuar khan hrehawm ka tih phah tawh em le? tih zawhna a rawn thleng ta tlat. ‘Ti tawh e’ tiin ka chhang thei tlat lo. Min tuar sakzia hlain ka lo sa fo tawh, thuin ka hril tawh thin; a hrehawm turzia pawh kawng hrang hrangin ka chhut tawh thin. ‘I sual pawizia i hriat duh chuan kraws en mai rawh – sual nei ve lo chuan heti khawp hian a tuar phah si a; Pathian hmangaihna nasatzia i hriat duh chuan kraws en mai rawh– hmangaihna avang chauhvin sual nei lo chuan hetiang tak hian a tuar si a,’ tih te pawh ka lo sawi ve fo tawh thin. Mahse, “Nang vanga i fapa khawsik hrehawm i tih ang tal pawh hian a khawih na tawh che em?” tih zawhna a rawn thlen meuh chuan….Ka tla chiang.

*****