𝐍𝐄𝐏 𝟐𝟎𝟐𝟎 𝐋𝐄𝐇 𝐇𝐈𝐍𝐃𝐔𝐓𝐕𝐀

A buaipui pawl ten hun eng emaw chen an buaipui tawh National Education Policy 2020 chu July 29,2020 khan Union Cabinet meeting chuan Parliamenta sawiho pawh awm lovin a pawm thut a. Tam tak thin a thawng khawp mai a. He Policy hian India rama chhuan thar lo awm zel turte hringnun a khawih thuk hle dawn avangin Educationist te chauh lo pawhin kan ngaihven a tul tak meuh a ni. Mi thiamten an zir chiang zel ang a, thil awmzia chu a rawn lang fiah telh telh turah ngai ila. Tunah thlenga  kan hriatthiam china rawn lang ta ngaih pawimawh zual han thur chhuak ila a tha awm e.

‘Secularism’ tih a tel tlat lo

He policy-ah hian ‘secularism’ tih tawngkam hman a ni tawh lo va, chuvangin secularism promote tumna a nei lo a nih hmel a ni. Hindu sakhaw bu pawimawh Bhagavad Gita ami tawngkam nishkam karma (mahni inphata thiltih) tih an hmang zawk daih a ni. Chu chu Hinduism chhungkuaa awm ve lo tan chuan tha lo tak a ni dawn a ni. India ram hi sakhaw hrang hrang leh hnam hrang hrang kan nih avangin tun hma zawng kha chuan secularism hi ngaih pawimawh hmasak thin a ni a. Tunah erawh chuan he thu hian hmun khat pawh a chang zo tawh lo va. “Chatuan ata India ram hriatna hausa leh hlun tak chu he policy kaihruaitu eng a ni a. Hriatna (gyaan), finna (pragyaa), leh thutak (satya) um hi India ngaihtuahna leh finthuril hian mihring zawn theih sang berah a dah tlat a. Hmanlaia India rama zirna pawh khan hringnun hmachhawn tura hriat belh chauh a tum ngai lo va, sikul piah lam ringawt a buaipui lo, mihringin a nihna dik tak a hriat leh chumi chhuah zalen chu a tum zawk thin a ni,” tiin thuhmahruaiah a inziak kulh mai.

 

Sakhua leh hnam tlem zawkte namnul leh chimral duhna he policyah hian a len hmel hle mai. Minority te culture, tawng leh zirna in din chungchangte he policyah hian hmuh a chang lo va, kum 2016 a draft policy an submit zawkin an sawi lan hmasak, “zirna chuan remna leh muanna, zawldawhna, secularism leh ram inpumkhatna a siam tur a ni,” tih kha an hnawl fithla der a ni. Policy-ah hian ‘equity (inantlanna), inclusivism (tel ho na) leh pluralism (tam tak nih pawm thiamna)’ te hmu mah ila ‘secularism’ (sakhaw zalenna) ber a awm si loh chuan India Danpuiin a ngaih pawimawh em em ‘zalenna, intluktlanna leh dikna’ a thleng mawh dawn tih Delhi University Professor Sukumaran a sawi.

           

3-Language System leh a kaihhnawih

He system hi thil thar em em ni lo mah se, tawng pathum zir ngai tur hi duh lohna thawm, a bikin South India lamah, a lian hle a. Mahni state bil tawng leh English zir mai an duh tawk tlangpui a ni. Tawng thiam tam (Hindi/Sanskrit, eng pawh) chu a that em em laiin hna zawnna kawngah te eng ang takin nge an rawn hman tangkai ang? Midangte el turin kan thiam tak tak ang em? tih te hi ngaihtuah tham a ni. Hnam tlem zawkte dinhmun atanga thlir phei chuan English tihlar tlan hi a tha zawk fe awm e. Tin, compulsory ang em chu ni lo mah se, tuma hman tawh loh tawh loh ‘Sanskrit’ chawh nun nasat tumna a lian bawk a, ‘school leh zirna sang zawkah zir theiha dah vek tur’ tiin a inziak. Thenkhat chuan hetah hian thil thuk tak a inphumah an ngai a. A chhan pawh tawng hi culture, history leh nunphung hriatna tukverh a ni a. Sanskrit hi Hindu sakhaw bu original texts an ni a, chu chuan Hindutva kai harh lehzual zelin democracy leh hnam hrang hrang nun hona a tichhe thei hle dawnah an ngai tlat. Hnam hnuaihnung hotupa BR Ambedkara te kha chuan India ram mi tam zawk ‘khawih thiang lo’ (Untouchables) anga puang a, rahbehna hmanraw duhawm lo tak anga ngaiin a lo hnawl na hle tawh a, Manusmriti (Manua Dan bu) pawh a lo hal hial tawh a nih kha.

Zirna hi sumdawnna hmanruaa siam a ni ang em

He policy-a thil lawmawm tak anga lang chu zirna, a bikin Higher Education tihchangkan tumna a lian hle hi a ni phawt ang. BJP sorkar hnuaiah hian thiamna zirna hi tla hniam nasa a sawi a ni thin a. Tunah hian khawvel University tha 300 thlan chhuahah India rama University lang pha an awm lo a ni awm e. Zirna sang zawk tihchangtlun hna hi a pawimawh nasa a ni. Tihchangtlun tum dan a fuh loh chuan keini hnam tlem zawkte leh bet zawkte tan a harsa telh telh ang tih a hlauhawm, tiin mi thiam tam tak an tawng chhuak ve leh ta.

Tunhnai lawk khan World Bank chuan ‘Strengthening Teaching-Learning and Results for State Program’ atan Dollar maktaduai 500 puk tir a rem tih thu puan a ni a, chumi hnu thlakhatah hmanhmawh angreng takin NEP 2020 chu pawm a lo ni ve ta bawk a. Inzawmna a nei ngeiah an ngai. NEP 2020 hi sumdawnna hmanrua anga ngai an tam ta viau mai. Zirna thil hi tunlai kalphung privatization (mimal hnena hlan), commercialization (sum dawnnaa chantir) leh corporatization (pawl lianin an chalai) mila her remna nasa tak angin an ngai a ni. Economist lar Prabat Patnaik chuan NEP 2020 chu capitalism duh dana inherrem zelna hmanrua a ni a ti. Mi awm thei laklawhte chuan dinhmun tha an luah zui zel ang a, mi hnuaihnungte chu rahbehin an awm chhunzawm zel bawk ang. Educationist Nantida Narain pawhin NEP 2020 hi Zirna hi sorkar kuta awm lo va mimal thiltitheite kuta a awm dan tura remruatna a ni, tiin a sawi mek a. Chu thil chuan he ram chhunga mi hausa leh rethei kar a tizau zual zel dawn a ni. “Sumdawng lian leh Sorkarin World Bank tanpuinaa Zirna inpui an lak tur hi Dalit, Adivasi leh hnam tlem zawk tan chuan thihna thupek ang a ni,” tiin Ajaya Kumar Singh, Odisha Forum for Social Action Director chu a tawng chhuak hial a ni. Eng tak nge thleng dawn a la chiang chiah lo nang a, PUC-a kan zir lai leh NEHU-a kan kal laia fee tih tham loh kan chhung a, kan lo zir ve tawk tawk theih chhan te kha tihbo a nih palh hi ka hlau ru veng veng. A nih vaih chuan keini ho zinga tam zawk tak hi chuan Higher Education hi ngaihtuah pawh ka ngaihtuah ngam lo vang.

Fundamental Rights tel lo, Duties chauh

Constitutionin a ram mi zawng zawng a pek (fundamental rights) chu he policy-ah hian a lang lo pek a, fundamental duty (mi tin mawhphurhna) chu a lang chiang hle thung. Hei hi a mak angreng hle a, ngaihhmul theih tak a ni leh ang. Right to Education Act (2009) te pawh hi sawi lan a ni lo lehzel a. Hlauhthawnawm thei ta chu, hlawkna umna kawng a zirna runpui an kaltir a, Hindu sakhua leh culture-a min zial tel zel an tum a, chi dang leh duh hrang theite min hnawl zel kawngah hian ka dikna chanvo (rights) te hlamchhiahin a tam zawkte leh thiltithei zawkte awpbehna hnuaiah kan tang nghet telh telh dawn a va ni mai awm ve?

He NEP bawhzuina angin sorkar chuan expert committee member 16 awm a din a, an hna chu kum 12000 chhunga Indian culture zir chian a ni. Mak tak mai chu India mi 40% aiawh Dalit, Adivasi leh sakhaw zuitu dangte an tel miah lo va, South India leh hmeichhia an lang lo bawk. Sawisel pawh a hlawh hle a ni awm e. Hmanlai India (ancient India) lam an hrut nasat hle laiin tunlai India (modern India) erawh chu vawi 2 vel an sawi kai ve hram a ni. Ancient India lama mithiam 18 hming a lan laiin, modern India duangtu an lan ve lo va, MK Gandhi, Raja Ram Mohan Roy leh BR Ambedkar (minority te tana sual nasate) an lang pha miah lo a ni. Hei hian hmanlai India (Hinduism culture leh sakhua)-a kir leh a, tunlai India (mi tin leng) chhuahsan tumna a tilang chiang thei hlein a hriat a ni. History zirtute chuan kan hria ang a, hmanlai zawk India leh tunlai India hi a zia a dang hle a; Gandhi leh Nehru ten din an lo tum tlat chu ‘mi tin intluktlanna, sakhaw tin lenna, hnam tin zalenna’ India din a ni si a. NEP hian hei hi kalsan a tum em ni, tiin zawhna tak ngengngawng tak a zawh theih a ni.

Ngaihven a tul a ni

NEP 2020 hi tun tut tuta hman nghal a ni dawn lo va. Ngaihven erawh a tul khawp mai. Heti lama mi thiam leh hre bel deuhten zir chian a pawimawh hle a ni. Zirna hi kan rilru leh ngaihtuahna siamtu leh kan mihring nihphung duangtu pakhat a nih avangin ngaihthah a rem lo hle. A la thar deuh avangin rinhlelhna nena lo thlir pawl leh hre chiang chiah lo pawh kan tam thei ang. Mi thiamte vekin an lepse chho zel a, a nihphung chu a rawn lang fiah telh telh dawn a ni. RSS te meuh pawhin an rawtna 60% a lan thu an sawi ngam avangin Hindutva hmanruaah an chhuah dawn a ang a. Tuna kan hriat chinah pawh hian min tiphawk thei thil a tam angreng hle tih chu a lang mai a ni.