YOGA HI I HRE CHIANG LEHZUAL ANG U

Kan hriat deuh ruai ruai, mahse a nihna tak kan chian chiah si loh kan ramah a rawn inlar tan a. International Yoga Day, kum June 21, 2015 atanga hman tan a nih hnu leh Central sorkarin Educational institutions-a compulsorya neih tur anga thawm a rawn than deuh atang phei kha chuan ngaihven a hlawh ta viau a. MKHC-in Kristiante inthiarfihlimna tur thil a nih thu a puan chhuah hnu, kumin June 21-a lammuala mi thenkhatin Yoga Day an hman leh Yoga pawi lohzia thenkhatin an lo chhak chhuah fo hian rilru a tinuam lo deuh a, hriat chian lehzual kan mamawh tlang hle tih a lang.

‘Yoga’ awmzia dik tak

            Yoga awmze tlanglawn ber chu ‘nghawngkawl’(yoke), emaw ‘inpumkhatna’(union) tihna a ni. Heta nghawngkawl han tih hian Mizote empai phurhna nghawngkawl ang ni lovin, ran pahnih chhawrna nghawngkawl, ran tha pahnih zawmna, a ruala an thawh dunna ang chi a ni. Ran pahnih nghawngkawlin a suihzawm ang hian Yoga chuan pathian(thlarau ram) leh mihring te(rilru leh taksa)  ‘union’ (inpumkhatna) chu a rawn thlen a ni. Tichuan, Yoga chu ‘rilru’,‘thlarau’ leh ‘taksa’ suihzawmtu tihna a nih ber a. Yoga-in a tum chu ‘rilru ram’, ‘thlarau ram’ leh ‘taksa ram’ mimal experiencea zawm leh pumkhata siam a ni. Hei hi Hindu sakhaw betute tan chuan ‘chhandamna’ a ni deuh mai. Tunlai khawvela Yoga zir chiangtu pawimawh Elizabeth De Michelis chuan, “Simply put, yoga is the discipline whereby one attains, or gets progressively closer to, moksa (or nirvana),” a ti (Yoga in Modern World, p.19). Moksa leh Nirvana tih hi Hindu zirtirnain Vanram/Chhandamna a sawina a ni. Yoga tih chu Hindu zirtirnaa ‘chhandam nih theihna kawng’ tihna a nih tak ber chu.

Hmasang atanga zirtirna

            Yoga lo awm tanna hi kum 5000 vel lai a ni tawh an ti a. A sawi thiam deuh thenkhat phei chuan mihringte sakhua lo pian hma a, thlarau lam dan awm sa, hnawl hleihtheih loh ni hialin an sawi. Hindu Sakhaw Bu chi hrang hrangah a lang nuk mai a, tunlaia an hman lar ber Bhagavad Gita-ah phei chuan Yoga tih hi tum 78, bung 18-a bung 15-ah a lang vek a ni, an ti.

            A tir atanga zirtirna chuan Yoga hi chi li – Gyan(hriatna), Bhakti(inpekna), Karma(a tiha tih=action) leh Raja(Lal kawng=royal), a ni a. Heng kawng 4 atang hian taksa, rilru leh thlarau chu a inchhung khawm thei vek a. Pathian anga an ngaih chu a pawh theih vek a ni. Kawng tha ber ‘royal’(lal kawng) anga an sawi chu Raja Yoga hi a ni a. Tunlaia Yoga tia kan sawia kan hriat thiam ang chi – taksa thleh kawi dan chi hrang(physical exercises), thawk lak dan(breathing), leh  rilru sawr bing (meditation) te hi an ni. ‘Yoga’ tih miin an sawia i lo hriat ve riai ruai kha ‘Raja Yoga’ hi a nih chu.

Yoga School of Indian Philosophy zirtir dan

           

            Khatia hmasanga Hindu sakhaw lehkhabu-a lo awm chek chuk chu kum AD 400 vel khan mi thiam pakhat Patanjali an tih chuan uluk taka thler sinin a rem khawm a. Chu chu ‘Yoga Philosophy’ an ti a. Vedanta zirtirna behchhana Yoga zirtirna chu hemi hnu hian awm leh mah se a kalphung tak tak chu a danglam tam tawh lo a ni.

            Kan hriat tura pawimawh chu keinin ‘Pathian a awm a, lei leh van a siam a, mihringte hi a thil siam rilru/thlarau nei kan ni,’ kan tih mai ang hi Indian philosophy leh Hindu zirtirna hi chuan a zirtir lem lo tih hi a ni. A awlsam zawngin sawi ta ila, Yoga school pawh hian ‘thlarau’ (prakriti) leh ‘taksa’(purusa) chu a then hmawk a. Prakriti leh Purusa hi chatuana awm an ni. An nih dan takah chuan a hrang ve vea thianghlim taka awm tur an ni a. Amaherawhchu, ‘thlarau’ (prakriti) hian ‘taksa’(purusa) a zu tihbuai hunah tisa nei mimal(rilru, thlarau, nei hrang) a rawn piang ta a. Mihring (mimal) chu a buai ta viau thin a ni.

            Chumi then nan chuan ‘thlarau’(prakriti) chu ‘taksa’(purusa) atang chuan lak hran a, mimal thlarau(individual consciousness) chuan chatuan thlarau(universal consciousness) a zawm a lo ngai ta a, chu chu inthlehkawi(physical exercises), rilru sawrbing(meditation) leh thawk dan chi khat(breathing exercises) te hian a thlen thei a ni. Chu chu Yoga kan tih tak chu a lo ni ta. Tichuan, Indian Philosophy lehkhabu rinrawl ber pakhat ziaktu SC Chatterjee leh D. Datta chuan, “The aim of yoga is to explore … and to reveal the reality of man and the world – ‘the real Self, the Atman as eternally pure, enlightened and free, as the only true, unchanging happiness,”(An Introduction to Indian Philosophy, p. 311), an lo ti ta a ni. ‘Yoga chu  mihring leh khawvel nihna dik tak luhchilh a, kan nihna dik tak chu chatuana thianghlim, varpawh, zalen leh hlimna chuai ngai lo dik tak a ni, tih zawn chhuah leh lantir hi a ni,’ tihna a ni deuh ber awm e.

Tunlai khawvelah Yoga

            Kum zabi liam ta atang tawh khan ram changkanga kan ngaih zawk Sapram kan tihah khuan Yoga hi a lar chho viau a. Heti taka US vela a lar takah hian India cultural export chi khat a lo ni ta der mai bawk a, American hovin an ta neih leh mai ang tih hlau pah leh India ram thil tihlar nan a ni ber ang chu Modi-a sorkar chuan International Yoga Day, tih June 21-ah hman a rawt a, United Nations pawhin a pawm tawh nghe nghe a nih kha.

            Yoga titu thenkhat chuan a thlarau lam thil thlenga an luhchilh laiin thenkhat thung chuan exercise chi khat angin an ngai deuh mai a ni awm e. Hei tak hi kan zinga debate ang deuh a awm lai chu a nia. Exercise chi khat angin ti liam ve mai mai ila engnge a pawina tur? kan ti thin. A pawi tur chin leh chin loh hriat thiam a har khawp mai. Tunlai khawvel, sakhaw hrang hrang zuitu leh rin dan leh zirtir dan inang lo tak tak karah hian eng chen chiah hi nge fimkhur ngai tih chu hriat har tak a ni a. Kan hriat chian erawh chu Yoga nihna tak hi chu Kristian zirtirna nena inpersan tak a ni tih hi a ni.

            Ka hriat ve chinah chuan India mi Yoga teacherte hi chuan he thil hi exercise pangngai anga ngaih hi an la phal lo hle zel a. Tunlaia lar pawl tak Sadhguru an tih chuan, “If fitness is what you are seeking…I would say go and play tennis or hike in the mountains. Yoga is not exercise, it has other dimensions attached to it…The physical body has a whole memory structure. If you are to read this physical body, everything – how this cosmos evolved from nothingness to this point – is written into this body. When you do asanas, you are opening up that memory and trying to restructure this life towards ultimate possibility.”(isha.sadhguru.org/yog-meditation/demystifying-yoga/top-7-myths-about-yoga-busted/) Exercise ni lo thil dang a sawi hi ‘engmah lo atanga engkim a lo chhuah dan kan taksa inziak vek chu asanas (exercises) kan tih hian min hriat chhuahtir a, chu chuan kan theihna sang ber min pe,’ tih lam a ni. Pui rem rem.

            United States-a khawsa Motivational Speaker leh Yoga guru lar ber pawl Deepak Chopra pawhin, “…at its core, yoga is much more than a system of physical fitness. It is a science of balanced living, a path for realizing full human potential…The essential purpose of yoga is the integration of all the layers of life – environmental, physical, psychological, and spiritual,”(The Seven Spiritual Laws of Yoga, p. 10). Mihring theihna sang ber pho chhuaktu; rilru, taksa, min hualveltu, leh thlarau zawm khawmtu angin Yoga hi a sawi chiang leh hle mai.

Yoga: Sakhaw thil nge Thlarau lam thil?

            Hei hi zawhna pawimawh tak a ni. Tumahin Yoga hi ‘sakhaw thil’ ti angin an hrilh ngai lovang che, amaherawhchu ‘thlarau lam thil’ a ni tih hi chu an sawi tlat thung (Thlarau Thianghlim thil ni lovin!). Keini ho chuan Thlarau leh Sakhua hi kan sawi pawlh mai ang, kan ngai pawlh bawk a, a tha hle a ni. Amaherawhchu, Yoga tihlar tumte tan chuan sawi pawlh a tul lo, ngaih pawlh pawh a ngai lo bawk. Hei hi trick chi khat a ni thei. ‘Yoga hi sakhaw thil a ni lo,’ tiin lo pawmzam ta la Hindu sakhaw thilah i lut reng tihna a ni. Hinduism zirtirna chhunga mi a ni si a. A nih loh vek leh Hinduism hringtu a ni si a. ‘Thlarau, taksa, thilsiam(creation) leh khawvel’ chungchang a zirtir dan hi a Kristian mawlh lo a ni. Kristianna kalh a ni hial zawk.

            US-a an chhuah bawk Yoga Journal, March 1, 2012 Issue chuan ‘Is Yoga a Religion’ tih sawihona a rawn chhawpchhuak a. Yoga Specialist 4 te hian Sakhua (religion) atanga sawi hran an tum vek, mahse ‘thlarau thil’(spiritual) a nihna an pawm vek thung. An sawi thenkhat hi Kristiante tan hriat a pawimawh hle: Yoga “… practices don’t necessarily have a religious connotation, but they do have a spiritual connotation… Yoga was never secular, traditionally. It was always connected to spirituality, and spirituality was never separated from religion… it can be presented as a spiritual discipline that supports the Christian faith or the Buddhist faith or the Hindu faith.” An zau angreng hle mai.

            Heti taka ngaihdan zau an neih lai hian panel member pakhat Stefanie Syman, yoga pawh kum 15 lo practice tawh leh lehkhabu pawimawh tak The Subtle Body: The Story of Yoga in America tih ziaktu chuan ‘Kristianna leh Yoga hi a inkalh em?’ tih zawhna chu chhangin: “If you are seeing yoga as a spiritual discipline and taking its claims seriously and are on that path—a classical yoga path, a path beyond asana, well beyond asana—then I do think, at a certain point, you get into some pretty big metaphysical and theological disparities.” He yogi hian a hmu chiang hle a, “We want to separate out the secular element from the spiritual elements, and I always wonder if that’s totally possible,” a ti nghe nghe a ni. Lo luh chilh tawh leh lungawipui mektu ngei chuan ‘I ti tak tak dawn a nih chuan Kristian zirtirna nen a danglam chiang tih chu a lang mai a…thlarau nun tel lo hian a tih tak tak theih dawn emaw ni le?’ a ti hial a nih chu. Hindu tam takin tunlai miten Hindu sakhua atanga lak hran an tum hi an duh lo viau reng a ni.

            Heti hian khaikhawm rih mai ang: Yoga chu Hindu sakhua thlarau a ni a. He thlarau hi Kristiante sawi thin Thlarau Thianghlim laka hrang daih a ni a, Ringtute buaipui chi a ni lo, tiin.

*****RE09072016*****