INDIA SORKAR THUCHHUAH COMMON YOGA PROTOCOL-IN YOGA CHUNGCHANG A SAWI DAN LEH KRISTIAN THURIN

Yoga chungchang hi ngaihdan hrang hrang a tam leh ta hle mai. Mahni ngaihdan ziaka chhuahtute hi eng lam ti mi nge an nih ka hriat vek loh rualin Kohhran hruaitu an nih ka ring lo phawt, a chhan pawh Mizoram Kohhran Hruaitu Committee chuan a zir chian hnuin Kristiante tihawm lova a ngaih thu a sawi chhuak tawh kha a nia. MKHC hi kan ring tawk lo nge, sakhaw thilah meuh pawh sakhaw rawngbawltute, rinna dika Kohhran an kaihhruai theih nana kum tam tak inzir ngat tawh te pawh hre lo zawkah kan ngai tawh? Kan sawrkar hian sakhaw thilah pawh Kohhran hote hi zirtir a tum ta zawk? Mi thenkhat chuan kohhran hi hlauh ngah lutukahte an chhuah titih hial a! Nia, hlauh loh tur hlauh a pawi a nih chuan hlauh tur hlauh loh pawh a pawi hle tho ang chu.

          Yoga hi a a tir atanga a nihna(classical), leh tunlai mi tam takin an zirtir dan (modern interpretation) atangin a sawi theih viau ang a; Yoga chungchang kan ngaihdan pawh chu chuan a hril viau ang a, tanna lam kan tan thui thei viau bawk ang. Tan lam nei lawk miah lova a nihna tak sawitu zawng ta ila  International Day of Yoga June 21-a hman rawttu ten COMMON YOGA PROTOCOL (Published by Govt. of India, Ministry of AYUSH, 2015, Revised 2016) Booklet hi a nih ka ring a. Hetah hian inhnial pawh ngai lovin Kristiante tan pawmzam chi a nih leh nih loh chiang takin a lang a ni. He booklet hi Internet-ah pdf copy download mai theihin a awm bawk.

Yoga chu thlarau lam thil a ni.

          He COMMON YOGA PROTOCOL(CYP) buthelep hian Yoga hi a sawifiah ngang mai. Thlarau lam thil a nihzia a zep lo: “Yoga is essentially a spiritual discipline…According to Yogic scriptures the practice of Yoga leads to the union of individual consciousness with universal consciousness,” a ti. Mizo Tawnga dah har ka ti hle mai: “Yoga nihna tak chu thlarau lam nunphung a ni…Yoga sakhaw lehkhabute chuan Yoga practise fo hian mimal hriatna thlarau leh lei leh van hriatna thlarau chu inpumkhatah a siam thei,” tihna a ni deuh ber awm e. Hei hi sawi mai aiin a ril a ni.

          Yoga hi Hinduism-in thlarau ram a zirtir dana a innghat a ni a. Kristiante inzirtirnaah chuan Pathian leh a thilsiam mihring kan awm a, mihringte chuan thlarau neiin Pathian pawh thlarau ni mah se inchhunfin leh pakhata inchhuah kan sawi ngai lo. Thlarau ramah pawh kan hrang reng a. Kan thlarau hi Lalpa hnena a thlen kan duh mai a ni. Chu chu sual sima Isua Krista rinin a lo awm thin. Hindu zirtirna tlanglawn berah erawh chuan mihring leh pathian nihna hi a hrang tak tak chuang lo va; thlarau pakhat ‘universal consciousness’ chu a awm a, chuta kan mimal thlarau (individual consciousness) inchhun luh chu Chhandamna a ni, a ti a ni deuh ber e. Chu chu Yoga hian a thlen thei, tiin he CYP hian a sawi fiah hle a nih hi. Chuti taka Kristian thurin laka danglam, thlarau lam discipline chu pawmzam chi a ni dawn em ni?

          Heti hian a sawi chhunzawm a: “Yoga also refers to an inner science comprising of a variety of methods through which human beings can achieve union between the body and mind to attain self-realization,” a ti leh a. A awmzia chu – Yoga kan tih hian mahni nihna dik tak inhriatchhuah theihna atana rilru leh taksa pumkhata siam theih dan chikhat a kawk, tih a ni leh awm e. Heta ‘self-realization’ a tih hi a ril leh hle mai. keini ‘mahni-inhriat’ tih ang a ni ngawt lo.  Hindu zirtirna tlanglawn ber chuan ‘Keimah’, ‘Self’, ‘Atman’, ‘Universal consciousness’, ‘Brahman’, ‘Ultimate Reality’ te hi a ngai hrang lo va. Keimahni thlarau, Self (thenkhatin ‘keimaha keimah’ an tih ang deuh J) leh Pathian thlarau chu thil inang reng a nihzia hriat chhuah hi thil pawimawh ber, ‘Moksha’, ‘Nirvana’, ‘Chhandamna’, a ni tihna a nih chu. Chuvangin Hinduism-ah hi chuan Kristianten chhandamna kan sawi a, sual (Pathian laka helna) tih te, sual laka min tlanna (redemption) tih te leh simna tih te hian hmun lian a chang ve lo. He lei rilru leh taksa piah lama mahni nihna dik tak hriat chhuah (self-realization) hi a pawimawh ber, chu chu chhandamna chu a ni. He thu hi CYP hian a zep lem lo khawp mai. “Yoga is essentially a path to liberation from all bondage,” a ti. Yoga nihna lairil chu min phuartu sual leh khawvel zawng zawng atanga zalenna (Kristiante anga simna leh rinna leh Pathian khawngaihna tel lo) a ni, a ti.

Hindu sakhua leh Yoga a inzawm em?

          Yoga tilartu thenkhat chuan he thil hi sakhaw piah lam, tunlai sakhuate pian hma daiha awm tawh angin an sawi mam thin. Hei hi a hlauhawmna pakhat a ni leh a. A hlauhawm chhan pawh kum za tam tak Hinduism an sawi dan a ni tlat. ‘Sanatana Dharma’ a inti a, chu chu “nun dan kawng,”(‘the way of life’) emaw, “chatuan sakhua”(‘the eternal religion’) tihna a ni awm e. CYP pawh hian, “The science of Yoga has its origin thousands of years ago, long before the first religion or belief systems were born. According to Yogic lore, Shiva has (sic) seen as the first yogi or adiyogi and the first guru or adiguru.”(He lai hi 2016 Revised Edition-ah chuan an dah tawh lo). A awmzia chu, Yoga chu kum sang tam tak liam tawha sakhua leh rinna zirtirnate awm hmaa piang tawh, Shiva pawh Yoga titu hmasa ber leh Yoga zirtirtu hmasa ber a ni, tih a ni leh a. Vai pathian dum ren run, a nghawnga chawngkawr invial chiat mai leh ‘tichhetu’ (the Destroyer) an tih Shiva atanga chhuak a nih thu he bu thelep hian a sawi a nih chu. He vai pathian atanga chhuak chu lo pawm leh tih ve ngawt chi a ni dawn em ni le? 

          Heti hian CYP chuan a ti leh bawk a: “Yoga works on the level of one’s body, mind, emotion and energy…Every individual is a unique combination of these four factors. Only a guru(teacher) can advocate the appropriate combination of the four fundamental paths as is necessary for each seeker. ‘All ancient commentaries on Yoga have stressed that it is essential to work under the direction of a guru.’” Yoga chu mi taksa, rilru, rilru sukthlek (emotion tih hi Mizo Tawnga dah a har hle), chakna teah a thawk vek a. Heng thil pali hi a inkawp fuh a ngai vek a, mimal mal hi heng thil 4 inkawp hi kan ni vek bawk. Mimal mal mamawh chu Yoga zirtirtu bik guru chauhvin a hriatpui thei. Hmanlai hrilhfiahbu zawng zawng chuan Yoga guru hnuai ngeia tih a tulzia an sawi, tih a ni. Hei hian sakhaw thil a nihzia leh thlarau lam thil a nihzia a tichiang leh hle mai.

Yoga hi hrisel leh hlim nan chauh a hman theih em?

          He CYP bookletah hian ‘Yoga practices for health and wellness’ tih a awm a. Chhiar chian a pawimawh ngei mai. Han sawi chhawng leh ila: “Bandhas and Mudras…are viewed as the higher yogic practices that mainly adopt certain physical gestures along with control over respiration. This further facilitates control over mind and paves way for higher Yogic attainment. However, practice of dhyana, which moves one towards self-realization and leads one to transcendence, is considered the essence of Yoga sadhana.” Bandhas leh Mudras te chu yoga sang bik inthlehkawi leh thawk dan chikhat tel a ni a. Hengte hian  rilru a thunun theih bakah Yoga-in a thlenpui theih sang bik a thlen thei. Tin, dhyana (meditation)  chuan mahni-inhriatna thuk leh zual bakah thlarau khawvel thlengin a thlen thei a, chu ngei chu Yoga laimu Yoga sadhana chu a ni, a ti a nih hi. Engemaw tak, Kristianna nena inhlat tak ‘laimu’ chu a awm ngei a ni tih a chiang.

          Yoga sawimawituten an tanfung hman tangkai ber chu hriselna atana a that thu hi a ni a. That chin pawh a awm mai thei. Mahse, hei hi Damdawi lam thiam ho(medical fraternity) chuan an la sawi chiang thei lo. India Today Magazine June 17, 2016 Issue khan chiang takin a rawn ziak: “….without a lot more evidence, randomized controlled clinical trials, it will remain, at best, an exercise in navel-gazing (…finfiahna tam tawk leh zir chian fe hma chuan a pui berah laipawng bih hnai viauna thil mai mai a ni rih ang),” a ti. Dr. Anoop Misra, Chairman Fortis CDOC Hospital for Diabetes and Allied Sciences, chuan: “…dam lo 25 zir chhinnaah zunthlum vei tlem chu an cher phah deuh tih hriat a ni a, exercise pangngai nasa lo taka lak nen a inang tawk vel, midangah chuan a thatna hmuh a ni lem lo. Kum upa lam che thei mang tawh lo tan a tha mai thei,” te a ti ve mai mai chauh a.  Dr. Ambuj Roy, Additional Professor of Cardiology at the AIIMS, New Delhi pawhin: “…tunlai damdawi thiamnain a pawm hmak theihna tur chuan zir chian leh test a la ngai hnem khawp ang…test thenkhat erawh chuan Yoga hi exercise lak loh thlawt ai chuan a tangkai a, kea kal pangngai emaw, thirsakawr chuan nen emaw a intluk tawk vel viau a ni,” a ti ve leh mai bawk. A tha pawh lo ni se, a aia tha a tam tih a lang chiang reng mai.

          Common Yoga Protocol bawk hi a chiang ngam lo chu a nia, a bookletah hian  Invenlawkna (disclaimer) a telh tawk tawk a: “The information, techniques and suggestions mentioned in this yoga protocol are not a substitute for the medical advice of physician. In a particular case that you may require diagnosis or medical attention, consult your health care provider before practicing Yoga. The publisher does not assume any responsibility or liability for any injury or loss that may result from practicing Yoga.” A thatzia an fak chiamna buah ngei pawh “Heta kan ziah te hi damdawi lam thiamte rawn thulhna tur thil a ni lo va, Yoga i tih hma hian Doctor i rawn hmasak a tul hun pawh a awm ang. Yoga i tih vanga intihnat emaw, engemaw hloh emaw i nei a nih pawhin he lehkhabu chhuahtute hian mawh kan phur lovang,” an la ti ta deuh deuh a nih hi. Kristian ni bawk si, rui lo leh hai lo tan chuan dawnsawn dan tawk thiam tur a ni e.

          He COMMON YOGA PROTOCOL hi Yoga duh lo hrim hrim Kristian tu emaw ziah a ni lo a, Yoga tihlar tumtu India sorkar Department pakhat ziah ngei a ni tih kan hria. Zep tit tet a nei lo bawk a. Hindu sakhaw betute chuan an lo practice a nih pawhin engmah kan sawi thei lo. Keini ringtute erawh chuan ngaihsan, ngaihzam leh lo tih ve ngawt chi a ni hauh lo tih a chiang. Remchan ang zelin Yoga School of Indian Philosophy-in a zirtir dan leh tunlai khawvela Yoga sumdawnna atana an hman dan leh RSS ho hmalak dante pawh ka rawn ziak zel ang.

*****RE02072016*****