CHHIA LEH THA HRIATNA THEI KHA

Eden huanah khan Pathianin thei pakhat ‘Chhia leh Tha hriatna thei’ a tih chu a dah a, ei a phal miah lo a, ei chu ei ni la la-a thihna a ni lehnghal. He thei hian zawhna tam tak a hring thei a, chhan i han tum dawn teh ang.

1. Eng vangin nge Pathianin kha thei kha a dah kher le? Dah lo sela sualah pawh an tlu lut lo mai tur a nia, tih hi mi tam tak buaina a ni thei ang. Ti hian ngaihtuah teh, lo dah lo sela chuan sual chance chu a awm lo ngei ang. Mahse, that chance pawh a awm bik chuang lo vang. Thim a awm loh chuan eng a awm lo a, eng a awm loh chuan thim pawh a awm chuang dawn lo a ni. A ni deuh put mai dawn. Lung tum ang ngawt nihna chu Pathianin min pek a tum lo aniang.

2. Kha thei kha ei phal ve mai sela eng nge a pawina? Pathian hian engkim hi phal vek dawn mah se, a nihna avanga phal theih miah loh a nei tlat. A siamtu ni lova ‘thil siam’ kan nih dawn chuan tih loh tur pakhat tal a keng tel a ni. Eden huanah khan awm ta ila eng kim phal vek ni ta se, kan tih tur ni miah lo, Pathianin Pathian a nihna atanga a phal theih miah loh chu Pathian nihna nih ve tum (challenge) a ni. Chu chiah chu kha thei ei leh ei loh vin, khap leh khap lohvin a kawh chu niin a lang. Rul khan ‘Pathian ang in lo ni ang’ tiin a thlem a nih reng kha.Thangthar thenkhat, “Thei ei mai mai vanga han hrem,” tia ho ti viau an awm. A issue hi lian tak a ni zawk.  Thil siam chuan a Siamtu a challenge tur a ni lo vang. Engkim phal a ni, mahse phal theih miah loh a awm. Chhia leh Tha hriatna thei ei leh ei loh kha chu Pathian nihna challenge leh ‘lenge’ loh hriltu angin ngai ta ila, a dik thui viau awm e.

3. Chhia leh tha hriatna thei an ei hnu khan eng nge thleng? An ei hma khan thil chhia leh thil tha an hre lo em ni? Hei hi thu har angreng tak a ni a. An ei hma khan a chhia leh a tha an hre lova kan ngaih ngawt dawn chuan ei chu thihna a ni tih chu an hre si a. Sual hnathawh hriat chin chu an nei a, hriat loh chin pawh an nei a ni ngei ang. Suala an luh tak hnuah kha chuan a full-in sual sual zia leh sual rah chu an hre ta a, a hmaa a thua an hriat kha tunah chuan an experience ta hem hem mai a nih kha.

4. Kha thei rah ei sawhkhawk kha eng nge?  Mi tam takin sawifiah an tum dan chi hrang hrang a awm – (a) mipat hmeichhiatna awmzia an lo hre ta, (b) chhia leh tha an hre zung zung, (c) thil tha tih leh tih lovah mawhphurhna an nei ta, (c) Chhia leh tha awmzia chu anmahni tawnhriat ngeiah a awm ta.

            Heti zawng hian i han sawifiah dawn teh ang: “Evi leh Adama te kha chhia leh tha hriatna kawnga thang zel tur an ni hrim hrim a. Chu than zelna chu kawng hnihin a awm- thei rah ei loh leh thei rah eiin. Pathian tih a, a thu anga an awm a nih chuan hriatna leh thlarauah an nihna ngaia awm reng lovin an thang zel ang a, chhia leh tha chu Pathian duh danin an hre telh telh tho ang. Kha thei rah ei ngai lo khan, thu awihna atangin chu chhia leh tha hriatna chu an nei dawn tam telh telh dawn a ni. Chu chu Pathian duh dan a ni bawk. Amaherawhchu, Pathian thupek kalh a, a ‘shortcut’ zawk an thlan tak a, theirah an ei chiah khan a tau a tet a, a rawn baw ta huk mai a, a kalna kawng lo tur zawkah kalin sual rapthlak zia hre chungin a phuar behna salah chuan an tang ta a nih kha.

Chhia leh tha hriatna thing a ni. Chu thil hriatna kawngah chuan than zel tur a ni bawk. Hriatna pawh pung zel tur a ni. Mahse chu chu kawng hniha chan theih a ni – thei rah ei leh ei lohvin, Pathian thu awih loh leh A thu awihna atangin. Mihring hmasa berte chuan an thlang sual a nih kha.