𝐏𝐈𝐀𝐍𝐓𝐇𝐀𝐑𝐍𝐀 𝐂𝐇𝐔𝐍𝐆𝐂𝐇𝐀𝐍𝐆𝐀𝐇 𝐇𝐑𝐈𝐀𝐓 𝐒𝐔𝐀𝐋 𝐊𝐀𝐍 𝐍𝐄𝐈 𝐄𝐌?

 Rawngbawltu pakhat chuan sualin a bawih beh mek mi pakhat a kawm a. Pianthar chungchang an han sawi chhuah chuan chu pa chuan a kutah kaiin an inah a luhpui a. Hmanlai atanga an tar tawh, an tleirawl laia an Pastor hova an camp chhuak thlalak chu kawkin, “Ka piantharzia khi i hmu em?” tiin inchhuang takin a chhuahchhal deuh thaw a ni! Kan ngaihthatpui hi mak tak tak a ni ta. Keima thian tha tak pakhat pawh a inngaihtuah chian theih nan tiin, frank angreng takin, “Nang hi chu i piangthar lo em a ni,” ka ti ve rawk a. Ani pawh chuan, “Piangthar lo min ti elo? Ka piangthar asin. Ka han hrilh ang che. Misualin thlan ko tlangah ka chaldarah silaiin min tin a, hlauhna chhete pawh ka nei lo. Chutah chuan ka piangthar tih ka hria,” a ti nia mawle. Piangthara kan inhriat nachhan te hi a mak sawt ngawt mai.

 

Bumna hmanrua ni fo

Thil tha tak pawh hman sual theih a ni zel ang hian, piantharna ropui tak pawh hi hriat sual ve theih tak a ni. Mihringin kan lo hman rei hnuah phei chuan hei hi a awl lehzual a ni. Thil pawi tak nia ka hriat chu piantharna hi thlarau lam tawnhriat (experience) chikhat, chhandamna neihna tura loh theih loh, he thil hi chan tawh chuan ngaihthatthlak tak nia kan hre tlat hi a ni. Hei hi piantharna dik tak nihphung niin a lang lo. Piantharna chu misual nuna Pathian Khawngaihna ropui tak rawn pâr chhuak a nih avangin a ropuiin a lawmawm a, pâr chhuak na na na chuan rah a chhuah ang a, chî pawh a pe chhuak zel tur a ni tih kan hai thin.

 Piantharna hi chhandamna tura hringnuna tum khat thil tawn hlu tak, Pathian pawhin a ngaih pawimawh bik, Vanram kan kai leh kai loh hriltu anga kan ngaih chawk avangin he thil hi kan tawn tawh chuan kan ngaih a tha vung vung a. Sualah inhmang nasa leh hle mah ila, kha ‘special experience’ kha kan neih tawh chuan ngaih a tha deuh roh tlat mai. Thenkhatin an sawi hlut luatah chhandam an nihna dinhmun chu chatuana danglam tawh lo tur angin an lo sawi bawk si. A tak changtute tan chuan a dik reng laiin, Setana inrawlh theihna a lian ta em em mai a. Thlamuanna suak, hlimna suak, lawmna suak, tawnhriat danglam a pe thei em em a ni tih hriat sa a nih avangin a lem lo ngaih thatpui mai kan ni ang tih a hlauhawm hle a. Setana bumna mai mai kan lo thlamuanpui viau thei a ni. Mihring tawnhriat leh keimahni inhriat dan zawng zawng hi chu a ‘der’ a awm thei vek tih hriat a tul ngawt mai. Chutiang mi pawh chu kan tam reng a ni. Hei tak hi piantharna mi tam takin kan kalpui mek dan that lohna chu a ni. Piantharna thu avang hian mi sual ngaih titha kan tam phah niin a lang.

 

Uar luat vangin kan tisual thei

 He piantharna uar luatna hian Kristian nuna thil tawn pakhat leh Kristian nun a then hrang tlat mai a. Hei hi ngaihtuah thui ngai lai tak chu a ni. Duh thawh zual ten ‘Chhandamna a bo thei tawh lo’ an ti a, chu chhandamna chu piantharnaa chan a nih avangin kan pianthar tawh chuan kan chhandamna chu chatuan atana chiang ta angin kan ngai a ni. Kan tawnhriat pakhat ‘piantharna’ leh Chhandamna sawi zawmin eng ang pawhin nung ila kha tawnhriat avang khan vanram kai tur chiang saah mi tam tak an inngaih phah a. A pawi hle. A nihna takah chuan piangthar leh thar lo chu a thih niah a chiang chauh ang a, chumi niah chuan kan sawi thei tak tak dawn chauh a nih chu. Chhandamnaah Kristian nun leh pianthar then hran chi a ni lo va, thil inzawm reng sawi dan hrang mai a ni. Then hran theih anga ngai kan ni deuh fur tawh awm e.

 Piantharna chu dawihlo ang mai, kan thlarau nun zawng zawng harsatna sukiangtu leh sual beih nana ‘magic’ thiltihtheihna channa niin kan hre fo ta mai. Piangthar tan chuan sual do pawh awlsam sawt tur te pawhin kan ngai a ni. Vawi khat chu camp kan nei a, camper pakhat chu inhlanin a ding chhuak ve ngei a ni tih ka hria a. Mahse, a tuk lawka an ina ka han len chuan, “Engmah ka ang lo ve,” tiin a rui chhunzawm lehnghal tih a nuin min lo hrilh a. A pawi thin ngawt mai. Piantharna chu sual hnehna dawihlo, mahni tumna leh duhna piah lama thiltihtheihna anga ngaiin a zawng a ni ngei ang.

 Tin, piantharna kan sawi dan, hun leh hmun bik nei, ‘chu mi kha mi rawngbawlnaa inhmuchhuak’ kan tih fo avang hian Kohhran pumpui rawngbawlna kan hmu hniam thei tlat a ni. Kohhrante min lo tawngtai sakna, Biak In leh Sunday Schoola kan ngaihthlak tawh zawng zawng, kan Kohhran ngeia rawngbawltute min fuihna leh zilhna, nu leh pa leh laina, unauten ni tina min hrilh thin zawng zawng kha theihnghilhin kan Camp/Counseling tuma rawngbawltute bik kha kan malman ta mai thin a. Hei hi a hrisel lo hle a ni. Kohhran pumpui rawngbawlna dah hniam a, mimal ngaihsannaah luh mai a awl. A hun leh ni hre fakin chiang hle mah ila, piantharna takah chuan kha hun leh ni kha a ropui ber a ni lo va. Chatuan atanga Pathian khawngaihna thiltum, hmanraw tam tak hmanga lo inher chhuak, damchhunga a ropuina leh duhawmna ringtuin a chen zel tur lo pâr chhuak a ni zawk.

 

Pianthar tum tawh lovin, Isua rin tum tawh zawk ila

 He tawngkam, ‘piangthar’ tih hi hman sual leh hriat sual theih a nihzia kan hriat tak avang hian he thilin a ken tel, piangthar sawina tho ‘ring’ tih hi uar ta zawk ila a thain ka ring thin. Bible tawngkam a ni zawk hrim hrim a. Bible-ah ‘piangthar’ tih tawngkam hi a tam thei ang berin vawi thum chiah kan hmu a. Rinna hian engkim a khaikhawm zawk a ni. Ka duh zawk nachhan pawh vawi khata fel vang vang lam aiin ‘thil kal zel’, ‘thil awm reng’ a kawh vang a ni a. Pianthar leh pianthar loh hriat sual a awm theih laiin, Pathian ring sual chu a awm ngai dawn si lo. ‘Pathian ring’ tih chu Pathian ‘ring zo’, ‘ngheng’, leh amaha ‘innghat’ a ni a. Chu chu piangthar tak takte zia, an dam chhunga an nuna bet tlat a ni. Vawiina kan mamawh ber chu kan nun kaihruai tura rin zawh, amah ngheng renga nun, leh eng thil pawh tawk ila amaha innghah ngam, hi a ni zawk a ni.

 

            Chu chuan kan nunah heng hnuhma hi a nei ngei dawnin a lang:

 

(i)             Kan hlim leh lawmna atana Pathian rin tawk. Hemi awmzia chu min tinuam tura Pathian tha tawka ngaih a ni. Sum leh pai, ruih theih thil, hurna, etc., te hian min hipin min tinuam dawnin lang mah se Pathian dan leh duhzawngte chu a tha zawk a ni, tih rin ngamna a ni. Mihring hriatna atanga sawi chuan Pathian danin rah îtawm lo zawk chhuah tura a lan laia Pathian dana innghah ngam tlatna kha, rinna chu a ni.

 

(ii)           Pathian tel lova nung thei lo nun chu rinna nun a ni. Mi pakhatin, “Pathian hian min hmu lo sela ka duh a ni,” a tih ka hria. Amah hlauhna chin a nei ve si, a tel lova a duh ang anga nun bawrh bawrh mai a chak a ni. Hei hi rinna nun kalh chiah a ni a. “Aw Isu, kei mi kal pel suh,” tia ni tina Isua a mamawhna hmutu, nun kawng zawng zawnga Isua ngheng lova kal thei lo nun kan mamawh a ni. Chu chu ringtu nun, piangthar nun dik tak chu a ni. ‘Ka pianthar tawh avangin eng ang pawhin awm ila ka chhandamna a bo tawh lovang,’ tih ngaihdan ni lovin.

 

Piantharna tak

 Piangthar chu chhandamna chang a ni a. Chu chhandamna sawi nân Thuthlung Tharin tawngkam engemaw zat a hmang a. Ngaihdamna, remna, thiamchantirna, fa nihna, chatuan nunna, vanram kaina, etc, te hi chhandamna sawina vek a ni a. Chu chu mi sualin a lo chang ta a ni. A then te hi chu a neih kim nghal an nih laiin, a then chu a nuna inher chhuak zel tur, a then phei hi chu thih hnua a neih turte pawh a ni hial. Piantharna dik tak tak chu chatuan thil, tum khata fel vek mai a ni lo. Pathianin amah ringtu mi sual sualna zawng zawng chu a ngaidam a, thiam a chantir a, a inrempui a, a fa atan a la a, ni tin a tithianghlim a, chatuan nunna chu pein vanramah a la seng lut dawn a ni. Pathianin kar hnih khat hlim leh hahdam chauh a buaipui lo va, chatuan atan thil a ti thin.

 Mi sual nuna Pathian Engkimtitheia Khawngaihna lo pâr chhuahna piantharna-ah chuan, ‘Thlarau Thianghlim hnathawh avangin mihringin sual simin Lal Isua Krista chu rinnain a zawm a, chu inzawmna chu Isua Krista, Lalpa leh Chhandamtu a nihzia pawmna-ah a lo lang chhuak a, thiltihin a rah chhuak thin,’ a ni. Hei aia tam hi a awm chuang lo va, hei aia tlem hi a awm hek  lo. He Pathian Khawngaihna lo par chhuak mawi leh duhawm tak Piantharna, Rinna leh Chhandamna chu a inzawm tlat tih kan hria a. Chu chu sual ngaihdamna, Thlarau hruaina leh Vanram a ni.