ISUAA DAMNA

Lal Isua nihna tam tak zinga pawimawh em em chu ‘Tidamtu’ a nihna kha a ni. Taksaa harsatna nei, natna tuar, dam lote a tidam thin a. Natna enganga dam harsa pawh a tihdam thin avangin mi rintlak, Pathian hnen atanga lo kal ngei a ni tih a tichiang em em a ni. Natna hi mihringte tihrehawmtu, kan harsatna lian ber pakhat a ni a, min tihrehawmtu leh tinuam lotu a nih avangin kan Lalpa chuan a rawn bitum chat mai a. A kalna apiangah dam lote a tidam thin tih kan hria a ni.

 

A lainatna vangin a tidam thin

 

Lal Isua dam lote a tihdam thin nachhan chu a khawngaihna leh lainatna vang a ni a. Na tuar a hmuhin a khawngaih a, rilru hrehawm a hriatin a lainat a, tidam theitu a nih avangin a tidam ta thin a ni. Tupawh a hnena lo kal chu a tidam zel a ni tih kan hre bawk a. Chuvangin natna khuma mu mek leh dam hleithei lo inenkawl reng te hi Lal Isuan in natnaah khan a lainat ngawih ngawih che u tih in lo hre dawn nia. Hrisel tha pangngaite pawhin natna tuarte hi kan Lalpa a rilru latute an ni tih hriat thar a tha mang e. Chu lainatna vang chuan alawm kan natna te min tawmpui turin hringfa a rawn chang ngat a ni reng a ni. ‘An khawngaihthlak em mai kan tidam teh ang,’ ti ringawt lovin, ‘an natna chiah hi eng nge ni ka zu tuar ve chhin ang a, tichuan chatuan damnaah ka hruai dawn a ni,’ a ti ni berin a lang.

 

Level a san ang zela che ropui thin

 

Computer games khel thinte chuan an hria. Level hrang hrang a awm a, ‘easy’ tih level chu a khel tantirte tan a nia, ‘hard’ chu thiam deuh hnu, ‘professional’ tih vel te chu har tak a ni tawh a ni. Mahse, khel thiam tak tak chu a level a san poh leh an thiam a langsar ting mai. Tumkhat chu ‘Inter-College Table Tennis’ kan college hmingin kan khel ve a, kan tum hmasakho chu an level a lo sang bik vak lo a niang chu. Kei tak ngial pawh hi ka han che tha mai mai khawp a, a vawr hlek kha chu ka smash deuh pap pap mai a. Kan collegea khel kan ni bawk a, ka classmate te khan kut an lo beng hluah hluah thin a, kan khelh zawhah pawh min zawn hial a ni. Sports lamah chuan ka ropui tum ber niin ka hria. Mahse, a kar leh lawkah chuan college dangah kan va kal ve thung a. An level kha a lo sang hle aniang chu. Kan han beih ngial pawhin kan hneh theih ta reng reng lo va. Game khat mah la lovin kan haw ta a, zah loh zir nasat a ngai ngei mai. Level a lo sang em a ni. Lal Isua kha chu a level a san poh leh a nihna ropui kha a lang chiang zual a, a che ropui mai a nih kha.

 

Taksa damna piah lam a tel

 

Taksa damna ngawr ngawr kha Lal Isua game a ni lo tih erawh chu hriat a tha. Palestina rama dam lo zawng zawng tidam turin a thawk chhuak ngawt lo tih kan hre bawk. Tin, lar a khel lova (an bawh nasat laiin a inthiar fihlim hial), ‘Healing Crusade’ ang chi phei chu siam lo tak a ni.  Messia a nihna lantirtu tur leh amah ring duh tan rintlak a nihzia tifiah turin midangte natna kha a hmang thin a ni zawk a. Johana phei chuan ‘chhinchhiahna’ a ti kher thin a nih kha. A natna hmachhawnte kha a dam har chi a tam khawp mai. Petera pizawn khawsik a han reh ta duak kha chu thukhat pawh a ni a; phar ber kher kha tihdam a har awm ka tia, a hmutu tan awih harsa a nih rualin awih loh pawh a harsa letling ngawtin ka ang. Vun, skin lam thilte chu chuti taka fai nghal pak pak a nih lohzia kan hriat hi.  Ni 4 lai an phum tawh hnua a han ko harh zawk mai te kha chu – thih leh dam hi a thu thu a nihzia a va han lang chiang tak em!

 

Damna famkim

 

Lal Isua mission kha damna thlen a ni a. ‘Chhan-damtu’ a nihna kan sawi nasa hle mai. Kan dam nan min chhan, tihna a ni awm e. Chumi awmzia chu mihringte hi nat dan chi hrang hrangin ka na a, tihdam kan ngai tihna a ni. Taksa na tihdam kha a rawngbawlna pawimawh tak a ni a, rilru na tih dam a ngai tel bawk a, chumi bakah thlarau na tihdam a nih loh chuan damna a kim dawn si lo. Rilru lam damna hi a ngai pawimawh khawp mai tih kan hria. Uirenu den hlum an tum khan Isuan a chhanchhuah mai piah lamah ‘Kei pawhin thiam loh ka chantir lo a che’ a ti kher a nih kha. ‘Thawkrim leh phurrit phur zawng zawngte u…Ka hnenah lo kal ula, kan hnenah zir rawh u,’ tiin a sermon thin. Isua khan rilru hah te, mite rilru na te a tidam thin a ni. Tichuan, kan dam theih nan ani chuan kraws thirkhen hial pawh a thlang a nih kha.

 

Tihdamna hmanrua a ngah

 

Pathianin tihdamna hmanrua tam tak a nei. A hun azirin keini ngei pawh hi kan ni thei. Thenkhat chuan damdawi tel lo tawngtaina dam chauh hi Pathian tihdamna emaw an ti bik a, an ngai thlarau deuh a ni awm e. Damdawi leh thiamna hmanga damna hi Pathian tihdamna a nihzia hriat a tha a ni. Pathianin damdawi tel miah lovin a tidam thei a, a tidam fo bawk a; chutih laiin damdawi leh inenkawlna hmangin a tidam tho bawk a. Doctorte thiamna te, nurse-te dawhtheihna leh damdawi chaknate pawh hian Pathian hnathawh tel lo chuan an tidam thei lo a ni. Pathianin hmanrua a ngah khawp mai. Nang leh kei pawh hi engemaw tak chuan midangte tihdamnan min hman a duh thin. Naamana phar pawh kha a dam lo intanna tak chu an bawinu, a hming pawh kan hriat loh, an awmpui ve mai kha a ni. Mihring ngaihah chuan te tak te a ni, mahse a tel lo khan Naamana phar kha a dam kher awm lo ve.

 

Tawngtai dam thei vek kan ni e

 

Chu Pathian thiltihtheihna chu ringtu tu pawhin direct taka kan chhawr theih a ni a. Pa Pathian hnenah, kan Lalpa Isua Krista hmingin kan dil ang a, kan tan tihin a awm zel dawn a ni. Chu chu ringtu zawng zawng chanvo a ni a, mi thenkhat chanvo bik a ni chuang lo. Kan zinga mi thenkhat chuan Pathianin a ngaiththlak duh bik deuh chia tawngtai thei awmin an hre fo a. Intawngtaisak chu engti zawng pawhin a that rualin, a tawngtaitu tawngtainaah damnate hi a innghat lem lo a, Isua thiltihtheihnaah a innghat zawk tih hriat a tha. Chu thiltihtheihna chu ringtu mimal tin ten kan pawh thei a, hemi chungchangah mi special an awm bik lo. Thuthlung Tharin keimahni mimal tawngtaina baka thiltithei a sawi chu Kohhranho tawngtaina a ni a. Thuthlung Thar chuan intawngtaisak tur hian a pana va pan lam aiin a koha koh lam a sawi zawk a ni. ‘Kohhran Upa kohtir sela,’ tih a nih kha maw.

 

A vuakna vualtea tihdam

 

Thenkhat leh chuan taksa damna hi an ngai urhsun hle a, ringtute hi chu natnain min tibuai tawh lo tur hialin an ngai a ni. Nat hi a hrehawm em a, Isua ringtute hi chu nat theih tawh loh ni se a duhawm ngawt mai. Ram pawh kan la chak viau awm e. Isaia 53:4,5 ‘Ani chuan kan natnate chu a phurin…a vuakna vualte chuan tihdamin kan awm ta,’ tih changchawiin thenkhat chuan vawiina kan natna te pawh hi chu chuan a tidam veka ngai a, chutiang nihpui thei chu thlarau nun sang bika lo ngai te pawh an awm a ni awm e. Mahse, he changin a kawh zawk chu thlarau damna lam niin a lang a. He khawvela kan awm chhung hi chuan natna leh tuarna hmanga min tihharh a, min tihchak a, min zirtir zel a tum zawk hun te pawh a la awm ni ngei tur a ni. Chutih rualin Pathian thiltumah chuan eng anga khirh natna pawh thawklehkhata dampui viah theih a nihzia hi hre reng thung ila.

 

Tun leh nakin

 

Lal Isua an vuakna vual te chuan kan thlarau a tidam ngei mai a. Kan natna zawng zawng chu phurin, a vuakna vualtea tihdama kan awm pawh hi tun huna kan chan, mahse a famkimna kan la hmuh tur pawh a ni ang. Chuti ni lo se Paula pawh khan a taksaa ‘hling’ awm kha a sawi lo ang a, Timothea pawh kha a pum that loh avanga ‘uain’ hmang zeuh zeuh turin a fuih lo tur. Natna atang hian an fihlim vek bik lo a ni ngei ang. Tirhkoh zawng zawng deuhthaw an martar vek e, an tih kha maw. A vuakna vualte chuan kan thlarau damna a thlen a, chu thlarau damna vang chuan kan engkim a la dam dawn a. Chumi ni chu nghakhlel takin kan thlir a ni. Ringtu leh ringlo danglamna chu pakhat zawk damna famkimin a hmuah laiin pakhat dang zawk chuan a natna laka damna beisei tur a nei lo hi a ni.

 

*****RE19062020*****