𝐒𝐔𝐈𝐇 𝐙𝐀𝐖𝐌 𝐓𝐇𝐈𝐀𝐌 𝐀 𝐏𝐀𝐖𝐈𝐌𝐀𝐖𝐇

Mizo Kristianten kan ngaihtuah nawn theuh a, kan zir thiam turte zinga pawimawh em em chu kan ni tin hna chungchang hi a ni. A ‘thlarauna’ kan man a, kan zah a, kan hlimpui theih a ngai. Chutih hunah chuan kan ramin hma a sawn ang a, kan Pathian Ram a lo zau telh telh bawk dawn a ni. Kan ni tin hnate hi Pathianin ama rawng kan bawlna atana min pek, min dahna hmun leh a ropuina par chhuahna tura min thlansak a ni tih kan hriat tluka thil hlu hi a vang khawp awm e. Hei hi kan hriat ngai miah loh leh kan inzirtir thelh thil ni lovin kan zir thiam hleihtheih loh niin a lang zawk a ni.

𝐀 𝐟𝐮𝐡 𝐥𝐨 𝐥𝐚𝐢 𝐚 𝐚𝐰𝐦 𝐞𝐦?

Kan ni tin hna hi Kristian taka kan hriat thiam loh vaih chuan kan thanmawhbawk a ni dawn tihna a ni nghal bawk ang a. Entirnan, kan ni tin hna chu kan eizawn nana kan tawn fuh leh remchang, sum a tam thei ang ber kan lak luh theihna thil anga kan ngaih mai chuan thuk lehzuala ngaihtuah tur kan nei a ni tihna a nih hmel a. Kan hringnuna Pathian hnathawh kan hmu thiam lo pawh a ni mai thei e. Kan ni tin hna hi Pathianin kan thlarau nuna a bilh tel leh a chatuan thiltuma hmun pawimawh tak luahtu a nihna kan hriat loh chuan kan ta bil leh kan duh ang anga kan tih theih angah kan ngai ang a,  a hlutna leh pawimawhna mai bakah a hlimawmna kan pawh ngai dawn lo a ni.

Ringtu chuan a ni tin hna chu a ei zawnna thiltih mai mai angah a ngai ngawt thei ngai lo vang. Pathianin amah leh a chhungkaw mamawh thawh chhuahna atana a pek a ni si a. Mi dangte tanpuina hmanrua atana a pek a ni lehzel bawk. Sumdawng chuan a hlawk thei ang bera a tih ngawt a rem lo vang. Miin an ngam san em avang emaw, loh theih lohva an lei tho avanga chhiar to ngawt a rem lo. Mi ina inhlawhfa chu a remchan em avanga zelthel ruk ngawt tur pawh a ni lo bawk. Sorkar hnathawkte phei chu mipui rawngbawltu, an program leh project zawng zawng hi mipui tan a nih deuh vek avang hian an hna hi a rawngbawlna hna ngawih ngawih bik. Sorkarin engkim a nei thei vek emaw ti a, a laka a tam thei ang ber sawr chhuah tum tur ngawt pawh a ni lo bawk a.

𝐓𝐡𝐥𝐚𝐫𝐚𝐮 𝐥𝐞𝐡 𝐒𝐚𝐤𝐡𝐮𝐚

Kan tih sual a, kan nun sualpui fo chhan chu sakhaw thil leh thlarau thil kan bel kawpa, ni tin eizawnna leh hna lam Thlarau Thianghlim hnathawh pawn lama kan dah daih thin vang hi niin a lang. Kan nun pumpui Pathian rorelna chhunga dah kan thiam lo a niang e! Nge kan phal lo thin zawk? Sakhaw thil kan tih – Pathian biak inkhawm te, Zai khawm te, rawngbawlna ki hrang hrang te chu kan hmu ‘thlarau’ thiam hle. A vawrtawpah hlim luih luih a ni bawk. Chutih laiin sakhaw thil pawn lama ngaih hlo thlawh, inhlawh, leh hnathawh lamah chuan Pathian lo inrawlh ve lo tura ngaihna leh duhna a lian thin ni tur a ni.

 ‘Kan ni tin hnaah Pathian duh dan zel ni se’ tih hi ka thupui a ni lem lo. Heti zawng hi chuan kan infuih harh tawh dawn lo niin a lang. A dik tawk lo niin a hriat theih bawk. Kan ni tin hna theuh hi sakhaw thila Pathianin min duh dan a awm ang tho a Pathianin a lo rem a ni a. Chuti ni lo se hna a siam lo vang. Min chawm tawp anga, kan ei heuh heuh mai ang. Pathianin mamawh neia min siam te, kan mamawh thawk chhuak tura mi ti te, thawh chhuah kher ngaia a lo siam te hian thiltum a ni a ni tih a chiang a. Kan ni tin hna hi Pathian hna a ni theuh va, uluk leh fimkhur takin, rawngbawlna rilru dik puin kan thawk tur a ni tih hi kan ram hmasawnna leh thlarau nun hriselna kawng a ni tih hi kan hriat theuh a pawimawh ngawt mai.

𝐊𝐚𝐧 𝐯𝐞𝐢 𝐭𝐥𝐚𝐧𝐠

Hemi chungchang hi keini ho chauhvin kan vei a ni hauh lo mai. Zoram khawvel aia zau fe dinhmun atanga Pathian thu ngaihtuah miten an lo vei a. Croatian-American theologian Miroslav Volf, Yale Divinity School Professor-in 1991 -a a ziah Work in the Spirit: Toward a Theology of Work, tih phei kha chuan ni tin hna te hi Thlarau Thianghlim hnathawh atangin a chhut daih mai a. Ani chuan Thlarau hnathawh leh ni tin hnate hi a hmer kawp vek a, thu pawimawh tak a phawrh chhuak a ni reng mai. Tunlai khawvel ringtu zawng zawngte mamawh a ni ngei awm e.

Miroslav Volf hian hna zawng zawng hi Pathian pek vek a ni a, chu chuan Siamtu anga mihringte siam kan nihzia a lantir niin a ngai. Chuvangin hna zawng zawng chuan zahawmna thuk tak a nei vek – hlawh tam leh changkangah a innghat lo. Kristiante hna reng reng chuan Thlarau Thianghlimin hmun lailum a chang zel a, hlawk taka hna an thawh theihna turin thilpekin a thuam thin. He Thlarau thilpek zulzui hian hna pawh kan thlang thiam tur a ni a, hna ropui bik a awm chuang lo. A chhan pawh Kristiante hnathawh chu mi dang tanpuina leh mi zawng zawng that tlanna tur a nih zel vang a ni.

Hna hi eizawnna tura thiltih a ni mai lo va, Pathian hnathawha kan tel vena, khawvel siamthat zelna hmanrua atana min kohna zawk a ni a. Hlawk tum luat avanga mi thenkhat hnek dak tak mai te, hlawhtlinna tehfung atana sum lak luh tam ringawt hman tak mai te, Kristian mawhphurhna dang ngaihthah veka mahni hnaa inhmanzawh mai te hi Kristian hnathawh dan tur niin a lang lo a ni. Ringtu chuan hna zawng zawng hi Pathianin a thil siam tawh sa a tuai tharna hna – he khawvelah hian dikna leh mawina a pun theih nana thiltih, mi tin tana malsawmna thlentu tura hna thawh niin a ngai. Chu thila leng loah chuan Kristian chu a inhnamhnawih thei lo a ni mai bawk awm e.

𝐒𝐮𝐢𝐡 𝐤𝐚𝐰𝐩 𝐟𝐮𝐡 𝐚 𝐩𝐚𝐰𝐢𝐦𝐚𝐰𝐡

Zofate hian crusade leh camping boruak kan tawng hnem theuh. Harhna chang tam kohhran kan ni. Chutih laiin duhthawhawmna ruam kan la ngah tih chu kan hre theuh. A chhan pakhat ni thei chu Thlarau Thianghlim leh ka ni tin hna kan suih kawp thiam loh vang te pawh hi a ni mai thei e. Kan hun tam zawk kan hmanna kan eizawnna leh ni tin hna nena Thlarau hnathawh kan suih kawp thelh chuan kan hlah thui ngawt ang. Tun atang chuan kan ni tin eizawnna hna ngei mai hi Pathian Ram zau zelna hna nena a inzawmna hmu thiamin i tang sauh sauh teh ang u.