𝐃𝐄𝐋𝐇𝐈 𝐓𝐀𝐖𝐍𝐇𝐑𝐈𝐀𝐓 𝐓𝐇𝐀𝐑

 

Mi fate angin khawpui te hi kan zin tam ve lo va. Han kal tum hi chuan mak tih tur leh sawi tur kan ngah viau zel. Tu emaw sap ram kal ang maiin rem leh rem lohva rawlh ve kan tum palh ang tih pawh a hlauhawm thei mai dawn a ni. Tunah pawh hian ka kar hnih chhung vel chauh cham thu hi han titi ve lawk ka chak leh riau peka, thenkhat tan ninawm a ni em lovang chu. Mi khawpui kal ve te!

 

Ka kal chhan ber hi ka fapa vang a ni a. Rev Dr B Lalnunzira te nupa sawihmuhin Ashoka University, Sonipat, Haryana-ah Admission a hmu ve hlauh mai a. Private University senso sang tak, a fee kan pek zawh rual loh turah ‘Need-based Scholarship’ an lo pe lehzel bawk a. Pathian malsawmna a nihzia hriain ka zu dah ve thawr mai a ni. He university hi a la upa vak lo a, mi thiam thahnemngaiten ‘Nobel Prize’ hmu khawpa mi thiam chher chhuah ‘aim’ neia an din a ni awm e.

 

A hmun kan han thleng chu ka zam thar lek lek a. Mi hausa leh awm theite lawina hmun dik tak niin a lang. Engkim mai hi keini thingtlang pa tan chuan a changkang em em vek mai a ni. Kan college kalna ve te nena khaikhin phei chuan a standard inthlau vai vai tak a ni. He university hian sum leh pai harsatna avanga zirna tha dawng pha ve lo tur zirlai tan scholarship an pe thei thin a lo ni a. Keini pawh hi chutiang case-a lut thei mai kan ni a, lehkha thiam tum tak takte tan kawng a inhawng a ni tih kan hriat tlan a tha bawk a.

 

Kan thleng thla chu Mizoram House, Vasant Vihar lamah kan han innghat ren rawn a. Room pangngai a remchan miau loh avangin dormitory-ah kan pafain kan han riak ve a. A nuam phian mai. Delhi khaw lumah khu chuan AC tha taka a awm chuan a nuam hle a lo ni zel. House-a thawktute an fel hlawm hlein ka hria. An tawngkam a zangin biak an nuam em em vek a. Vai thawktute hlei hlei khu an fel emaw tih tur a ni! A lungawi thlak hle. Administration a tha tih a hriat e. Sorkar hian fund te han nei se chuan chei that deuh (renovation) a mamawhna ruam a lang tam ve tawh hlein ka hria. Mizoram leh Mizote hmel pakhat a ni ve si a.

 

Chutia dorm-a patling han mut tak chu thian tha thenkhatin inhmeh an lo ti lo ni ngei tur a ni, hmun remchang dang min han ngaihtuah sak zung zung a. Kalkaji lama Mizoram Synod Transit Accomodation-ah kan insuan phei ta hna hna a. Kan vanneihna a inthuah nasa hle. A hmun a lo nuam em em mai a. A enkawltu Rev Laltharzuala, Delhi Mission Field Secretary te nupa lahin min lo duat thiam em em mai niin, tifuh ka inti ta hle. An inah ka titi suam suam a, chaw ka ei leh mai thin bawk! Ka va thleng chu an buai phah ta erh nangin ka tan chuan lap hlir a ni mai e.

 

Tlai khat erawh chu ka haw kawngah thil nuihzatthlak deuh hlek ka tawng a. Keima hriat thiam danah ka chian thawkhat em avangin thlenna te pawh phone lawk duh lovin thim thet thetah ka haw chho vel a. Ka bo titih deuh ta tlat mai. Kal lohna tur tur ni awm tak ui rual tawm khawmna deuhvah te ka va thleng phei a. Min lo bauh chuah chuah mai a, min um titih dawn ta mai. Ka tlan duh lova, pen erawh a rang hret. An kawlh lutuk lo hram a, a vanneih thlak a ni.

 

Hmawlh han ban mai tur ka melh deuha ka hmu mai si lo. Ka ipte ah lai chuan ka vai kiang hlawm a. Ui pakhat chuan ka kaihza a rawn hap hman hram a, na phei chu a ni lo. Eng tehchiamah ka ngaih loh laiin ina kan han check chu a lo thi ser ser a. Pu Thartea nena tlan chhuakin in bul hnai hospitalah vaccine kan va chiu ta chung chung a ni. Vawi 5 chiu lai mi lo chawh lehnghal a, buaithlak ngawt mai! Intih smart lutuk pawh hi a pawi thei a nih hi maw.

 

Pathianni cham ka tum loh avangin thawmhnaw pawh a zang thei ang berin ka inkeng a. Suit, tie leh inkhawm pheikhawkte inah kalsanin sneaker nen ka tei vet vet mai kha a nia. Pathianni cham a ngaih leh tak thut avangin ka buai angreng hle. Delhi khaw lumah te chuan chuti takin an inchei smart ka rin loh laiin Delhi Presbyterian Kohhran lam chuan Synod takin an lo uluk hle a lo ni a.

 

Ka inkhawm tur ni ber kha Lalpa Zanriah Sakramen inkhawm hun a lo ni bawk si! Kan nau pakhat tie chu awrh hawhsak hram mah ila, kamis ban tawi chauh ka ken miau avangin dawhkan kilpui tura Pastor MS Dawnga min sawmna chu zahawm hle mah se ka tihhlawhtling ngam ta lo a ni. Sneaker pawl a sena tial nena tie han awrh vang mai chu kan thlalak lo hmutu kan nu a lawm lo hle! Tu lo va thawn nge maw ni? Tih ngaihna awm nghal lo! Savun pheikhawk kha lei duh mah ila hun kan nei lo va, leina mai tur keini mikhual chuan kan hre bawk si lo va! Eng pawh ni se kan sermon ngaihthlak a ropuiin Pathian chibai bukna hun hlu tak kan hmang ho a ni.

 

Pathianni vawi khat pawh awm lo tura inngai chu vawi hnih lai ka awm ta a. Delhi Mizo Inkhawmah remchang deuhvin ka inkhawm ta bawk. Hmelhriat leh thian hluite an lo awm nual mai. A nuam thin e. Dr Lalrinawman Chanchin Tha hril pawimawhzia tui tak leh thiam takin a sawi. A ngaihnawmin a bengvarthlak thlawt a ni. He hmun pahniha ka han inkhawm thei ve ve hi vannei ka inti hle. Mizo tan inkhawmna hmun hrang hrang awm deuh nual hi a tul tawh pawh a ni mai thei e. Pathian biak inkhawm duh dan leh tih dan phung erawh a danglam hret hret dawn tih a hmuh tlang theih reng.

 

Heng inkhawmna pahniha ka thil tawn lawmawm tak chu zai hova lam hmahruaitu ve vete hi Manipur buaiin Imphal atanga a rawn nawr chhuah, Delhia awmna zawng ta te an ni a. Delhi tlanga Pathiana lawm em avanga lam hmasa ber an han nite hian Pathian ropuina a pho chhuak tha hlein ka hria. Pathiana lawmna tak tak hi chu chan chhiat leh chhiat loh piah lam a lo nih dawn hi.

 

Delhi Mizo Inkhawma ka inkhawm tum hi chuan savun pheikhawk ka lo lei hman tawh a, sneaker pawl a sena tial bun ngawt ai chuan ka confi ve ta deuh. Ka ngaihtuahna awm ta mai mai chu, kha Delhi Munirka Bazar dawr, Kuki tlangval 2 inhlawhfain an lo nghah a, pheikhawk nalh angreng tak kha ka ta tur liau liaua Pathianin a lo siam tir leh dah ngat ni tur a nia, tih hi a ni. In lama savun pheikhawk bun tur ka indaih lai tak leh Delhia lei belh ka lo tum lohzia leh a leina bazar leh dawr kha ka suangtuah phak lohzia ka ngaihtuah hi chuan mak ka ti angreng. Dawr eng emaw zah luh hnuin ka va thlang nalh tehreng kha a ni sia!

 

Hetia ka awm rei hret chhan hi ka u hriselna tha tawk lo inentir tura ka chah thlak vang a ni a. MUHCS thatna hmachhuanin Max Hospital, Saket-ah kan va inentir ve ta lawp lawp a. Keini angin treatment kan lak phakna reng reng lo turah he scheme tha tak zar hi kan zo ve ta a ni reng mai. He scheme hi chu a tha thlawt a nih hi. Mi tam zawkin dam phah nan lo hmang zel rawh se! He scheme atan hian sorkar hnathawkten an thawh nasa viau a ni awm a, thinlung lawm takin thawh zel se ka lo ti ve ngawt. Mipuiin kan chhawr nasat em hi maw.

 

Chutih rualin he hospital meuh pawh hian beisei lawk ang phak lohna ruam chu an ngah ve viau mai (kan lo beisei sang lutuk pawh a ni thei a). Nikuma CMC Vellore-a kan tawnhriat nena khaikhin phei chuan an system a infel hleih a, room management leh nursing care hrim hrim a inthlauvin hlein ka hria. Kum 75 vela inupat hleih hospital an nih vang te pawh a ni mahna le. Doctor thiam leh thiam loh erawh ka sawi phak a ni lo thung. Bill reng reng a insan hleih viau tih erawh chu a langsar duh khawp mai.

 

Neihin han tlin sela, hun leh hriselna tha neiha khawvel hmun hrang hrang han tlawh kual te hi chu a chakawm ve reng mai. Mahse chu chu mi zawng zawng tan a ni si lo. Engtik emaw chu kan tan pawh a la inhawng mial mahna.