𝐀 𝐓𝐀𝐖𝐍𝐆𝐕𝐀𝐈 𝐏𝐀𝐖𝐋 𝐊𝐀𝐍 𝐀𝐖𝐌 𝐋𝐄𝐇 𝐓𝐇𝐈𝐍

 

Hmanni lawk khan youtube channel pakhatah mi pakhat, sorkar hna lian tak thawk tawh thin leh tuna politics-a zuang lut ta, pa titi thiam tak leh hriatna zau tak nei chu thil pakhatah a tawngvai nasa leh hle mai. ‘An hlauhawm loh, keini ho hi Hindua min siam an tum lo, ho mai maiah kan insawithaih nasa’ te a ti teh nuai a. He ‘Mizo Kristian Tribal’ hian Hindutva ideology leh a lan chhuah dan chi hrang hrang hi a hre tha duh lo lui nge, a man vak lo ve hrim hrim?  Chumi hnuah columnist lar tak pakhat hian sorkar laipui zawm thiam a pawimawhzia a rawn sep rawtui chiam bawk a. A tawngvai pawl kan awm leh thin hi a mak zawk mang e. India ram hi sakhaw zalenna leh Chanchin Tha hrilna tarmit atang hian kan thlir thiam thlawt lo emaw ni dawn ni, ka ti thin. Pathian Ram zauna hi an vei pha lo emaw ni le? Chu chu ringtu tarmit vuah thiam ber tur chu a ni awm si.

 

𝐅𝐂𝐑𝐀 𝐀𝐦𝐞𝐧𝐝𝐦𝐞𝐧𝐭 𝐁𝐢𝐥𝐥 𝟐𝟎𝟐𝟔 𝐩𝐚𝐰𝐢 𝐭𝐡𝐮𝐢 𝐭𝐮𝐫𝐳𝐢𝐚 𝐡𝐢 

Kan tarmit vuah a dik a nih chuan hmanni lawk March 25, 2026 -a Winter Sessiona BJP MP pakhatin a rawn put luh deuh thut FCRA Amendment Bill 2026, an pass duh leh tak rih lovah te khan kan sorkar laipui fawng chelhtute rilru chu a lang fiah mai mawle. Thenkhat chuan thuneihna pumhmawm tumna thilah an ngai nghet hle a, a then thung chuan sakhaw dangte nekchep tumna hmanrua ni ngeiin an hria. 

He bill hi an pass ni a thlen vaih chuan ram dang tanpuinaa din institution (school, college, hospital, etc.) zawng zawng chu an FCRA permit cancel emaw, tih tawp emaw a nih hunah sorkarin laksak theihna dan a nei dawn a ni. India ram Kristiante nak nemah an zen a ni deuh ber e. Chutih laia huat nachang leh ngaihmawh nachang pawh lo hriat miah loh hi chu a vengvat lo thlak ka ti lo thei bik lo a ni. 

Kan sawi ‘Foreign Contribution Regulation Act’ (FCRA) hi India ram pawn lam atanga tanpui sum lo lut phalna pek theihna dan a ni ber a. He FCRA dan hmang hian kohhran leh pawl hrang hrangin rawngbawlna atan sum an hmu thin a. Tunlai huna dan an siam kherkhiapzia leh Kristian pawl tam takin an tawrh nasat dan chu  pui tak a ni. A then an tihtawp sak a, registration hmuh thar leh pawh a har viau bawk a. 

Kristian rawngbawlna pawl lian tak ni thin Compassion International, World Vision International te, Church Auxiliary for Social Action te pawh an che chau zo tawh a nih hi maw. Sapram nena inthlunzawm kohhran tam tak an rum mek bawk a. Kan politiciante hian tawngvai mai mai lo tura heng thilte hi an hriat ve kilh kelh se tih a duh awm thin. He bill thar phei hi chu an pass lo theih ngeina turin kan tan theuh pawh a ngai ang.

 

𝐂𝐡𝐚𝐧𝐜𝐡𝐢𝐧 𝐓𝐡𝐚 𝐥𝐚𝐢𝐦𝐮 𝐚𝐧 𝐛𝐢𝐭𝐮𝐦 𝐦𝐞𝐤 𝐞 

India ram state 12-ah sakhaw inleh khapna dan Anti-Conversion law hi hman mek a ni a. Maharastra hi a hnuhnung ber a ni a, a hmasa pawl Arunachal Pradesh-ah erawh a ‘active’ takin an tinung lem lo a. State dangah pawh hian an pass chho zel dawn niin a lang. Hetiang thil te hi lo ngaihzam luih phet phet chi a ni lovin a lang. 

Anti-conversion law kan tih te thatna lai chu tihluihnaa sakhaw inlehtir (forced conversion) khapna hi a ni a. Hei hi Kristiante tan chuan pawina awm miah lo, Chanchin Tha nihphung kalh a ni. Tumah hi tihluihnain vanram kan kaitir thei lo hrim hrim, anmahni duhna leh rinna a ngai tih kan hria. Amaherawhchu, he dan chipchiarna leh kikawina hmang hian Chanchin Tha hrilna kawngah kan rawngbawltute an tibuai erh thin a ni. 

Kan ngaihtuahnaa lut tur pawimawh tak erawh chu kan Chanchin Tha hril chhan thuk berah min bitum tlat mai hi a ni a. ‘Forced Conversion’ tih hian sakhaw dang betute vanram kai lo tur bika sawi telh tlat mai hi a ni. ‘Isua Krista chauh hi Pathian thlenna kawng, chhandamna kawng awmchhun a ni,’ tih hi Anti-Conversion Law chuan a pawm meuh lo a, tih chiah a ngai lo. ‘Divine displeasure’ (Pathian lungawi lohna hmanga intihthaihna) huangah khungin hetianga thu sawitute chu ‘forced conversion’ huangah a rin lut thei tlat mai hi a ni. 

He thu hi hmanni lawka High Court pakhat thu sawi pawh khan a rawn nemnghet a. March 2026 khan Allahabad High Court chuan sakhaw zalenna ram India angah hi chuan sakhaw pakhat dik bik a, a dang chu dik lo anga sawi hi thil dik lo tak a ni, tiin a sawi. A chhan pawh sakhaw dang betute rilru tihnatna thil a nih vang tiin a sawifiah nghal bawk. 

Heti a nih chuan ring lote chhandam an nih theih nana Chanchin Tha kan hril chu an khap dawn tihna a ni a. Isua Krista chauh ring tura zirtirtute chu dan kalh kan lo ni reng dawn tihna pawh a ni a. Kan chep telh telh a ni ber e. Tin, thlarau lam thilah sorkar a inrawlh thuk hle tihna a ni ang a, Hindu sakhua zirtirnain sakhua zawng zawng a thlir tihna a ni nghal bawk ang.

 Chhandamna chungchangah phei hi chuan Mizo Kristiante kan din ngheh a pawimawh khawp mai. Tunah hian kan Kristianpui tam takte hian sakhaw dang betute pawh hian an sakhua theuhvah hian chhandamna chang ve thei tho turin an ngai a. Thlarau chhandamna hrim hrim hi chu an ngaimawh vak lem lo niin a lang. Chuvangin, sakhaw inleh khapna dan te an lo ngaimawh em em a nih pawhin mihring zalenna hup behsak an duh loh vang te, an nihna (identity) ngaih hniamsak an nih vang te a ni deuh duah thin. Keini erawh chuan lei leh van hawlh tlang rawngbawlna vangin i do zel ang u.

 

𝐊𝐫𝐢𝐬𝐭𝐢𝐚𝐧, 𝐈𝐧𝐝𝐢𝐚𝐧, 𝐓𝐫𝐢𝐛𝐚𝐥, 𝐌𝐢𝐳𝐨 𝐥𝐞𝐡 𝐕𝐞𝐧𝐠𝐯𝐚 

India ramah hian political ideology pahnih nasa takin a insu mek. Pakhat zawk hian a ngam riau emaw tih theih a ni. Hnam tin, chi tin, sakhaw tin zalenna hmun ‘Secular India’ nih tir tumna leh ‘Hindutva Ideology’ - India hi Hindute mila siam tumna leh thil dang chu ‘India original’ lova ngaihna leh huatna, te an ni. Hindutva ideology hian hma a sawn riha hriat a awl viau nghe nghe. Mahse, beidawn tur a awm lo va, a tluk hun a la thleng tho turah ngai ila. Chumi chhung erawh chuan puanven sawi chhinga kan lo tan ve a ngai a ni. 

Hindutva ideology hian ram hmasawnna, development tawktarhin state hrang hrangah tan a khawh nasa hle mai. Mi tam tak chuan kan nep zo lovin kan inhawng duai duai thin a nih ber hi. Chhuanlam tenghneng tak tak siamin kan la insawi fiah fo zui a. Hetiang mite sangawi lo zawnpui fo hi ram leh sakhua phatnaah kei chuan ka ngai hial a ni. A Chanchin Tha hril vei lo thlak a, ‘ideological thinking’ neih loh thlak bawk! Chutih laiin mi tam zawk hi chuan kan hrethiam thui tawh khawp mai a, a lawmawm. Kan politiciante phei hi chu fiah hle sela, hma te pawh la nghe nghe rawh se! Mizo, Kristian, Indian Tribal nih pah hian kan vengvat tel theuh a ngai a ni.

 *****