𝐂𝐄𝐒𝐒𝐀𝐓𝐈𝐎𝐍𝐈𝐒𝐓 𝐋𝐄𝐇 𝐙𝐀𝐖𝐋𝐍𝐄𝐈 𝐈𝐍𝐓𝐈𝐓𝐄

Hmanni khan ‘Cessationist ka ni’ ka tih chhan thenkhat chungchang ka ziak a. Mi thenkhatin an an lo helh viau a ni awm e. Te deuh chel chul te pawh an awm. Ka nuih a za angreng hle a ni. ‘Cessationist’ tih tawngkam atanga phi ta deuh chung awm anga lang thei te pawh an awm a ni awm e. Tin, mahni lo pawm dan thin hi ngaihtuah chiang lem hlei lova sahuai thin vawn tlut te, an lo pawm dan sa a lo dik lohna miin an phawrh chhuah hlauh tak viau te pawh hi thil awm thei a ni. Bible tanchhan ni awm tak leh Bible zirtirna hre chiang ber emaw intiin kan han ‘quote’ thla zen bawk nen! ‘Liberal’ kan han ti nghal ngawt bawk a! Buaithlak ve angreng thin tak chu a ni.

Keini ang Cessationist dan te hi chuan Thlarau Thianghlim hnathawh hi a ring lutuk a, mimal thenkhat bik ni lovin ringtu tin kal tlangin a thawk theiah kan ngai zawk a. Mihring thenkhatah rinna nghat tlur lovin Pathian Engkimtithei-ah kan innghat zawk a nih zawk hi le. A pui fe zawkin ka hria! Tlangkam leh thil sawi pun lun mai maia Thlarau Thianghlim hnathawh ropuina hmuh tum kher lovin Thutak innghah tlaka hmuh kan tum thin. Hlim leh intihphur boruak lian liana inhnangfak tum huam lovin kawng engkima thianghlimna kawng zawh pawimawhna kan hria a. Thawm rinna hmunah Thlarau Thianghlim hmuh kan ngai pawimawh ber lo va, hmun khawhara Isua hnungzuitu nih a pawimawhna kan pawh pha a ni zawk.

Tawngtai thiltihtheihna hi kan ringhlel ngam reng reng lo va, mahse keimahni mihring duh ang a thil thleng zung zung tura ngaihna, magic anga ngaih mai mai hi chu kan ti ve lo. A chhangtu thu a ni. Ringtu theuh theuh tawngtaina ngaihhlut bik kan Pathian hian a neih kan ring lo. Bible zirtirna a ni lo bawk a. Tu emaw tawngtai vanga damna chang anga insawi lo awm ta se rinhlelh tum phet hi kan tih turah kan ngai hauh lo va, chutih rualin dam se tih luatah dam tak tak si lo dam anga sawi phet chu kan tum hauh lo. Thilmak tih theihna hi kan do hauh lo va, Pathianin tunlai khawvelah pe tawh lo se pawh kan ti chuang lo va, mahse chutiang ti thei bika han ngaih tur khawp mihring chu kan hmu lem lo a ni mai zawk awm e. Ringtute hi thilmak leh chhinchhiahna hian a zui reng tih kan pawm a, chu chuan ringtu zawng zawng a huap kan ti mai zawk a ni.

Sakhaw thil hi inbum nana hman thui theih tak hi a ni a. Chuti avang chuan sakhaw thil chu hnawl ngawt tur erawh a ni lo a, thil dik leh dik loh chu rilru hmangin thliar thiam kan tum tur a ni ang. Chutianga kan tih theih nan ngaihtuahna fim pawh pek kan ni si a. Hman tangkai nachang kan hre lo kan nih vaih chuan puithuna atthlakah te, buaipui loh tur buaipui vak vak a, beisei loh tur beisei chiam chiamna hmunah kan tlu lut thuai mai dawn a ni. Kohhran pawh kan fimkhur a ngai. Mipui nawi hriatthiam zawng leh tuipui zawng kan umpui lai hian kan mithiam zawk leh rilru hmang zawkte kan tihbeidawn hi hlauh ve tho tur a ni. Thangthar lehkhathiam leh thil chik mite kan ngaihthaha, kan tihbeidawn chuan Kohhranin a la tuar dawn tih a hriatthiam theih mai a ni.

Evangelical Cessationist ten kan ngaihtheih loh deuh mai pakhat chu thil lo awm tur hrilhlawk theihna, tunlaia mi tam takin ‘zawlnei’ an tih thin hi a ni.       Sap ram lamah phei chuan a group deuhvin an awm a ni awm e! Zawlnei nihna hi zir theih anga sawi pawl pawh an awm! Hetiang boruak hi kan ramah pawh a rawn thleng ve zel a, lo ngaisang leh ngaihlu riau pawh kan awm ve zel bawk si. Zawlnei nih tum phet an awm rawl bawk nen! Thenkhatin thlarau pawl bik leh Pathian mi ropui bik angah kan ngai awl lo leh bawk! A buaithlak a nih hi.   Pathian thutak buaipui ahnekin a thu tharlam nia an hriat buaipui chung pawl pawh an awm. Cessationist kan nih chhan pawh Bible kan ngaihsan luat leh a chhunga thu chiang tak taka inziakte aia tawnhriat awihawm lo tak takte kan buaipui hlauh luat vang zawk a ni sia maw! ‘Liberal’ anga inpuhte kan la tum ta dah chu a nia!

Kristian ramah hi chuan Kristian culture a lo awm a, chuti a lo nih chuan ‘heroes’ te, ‘celebrities’ te pawh Kristianna kaihhnawihin an lo awm thei a ni. Chumi thil chu thlemnaah changin mi tam tak an lut thei thin a . Kristian celeb nih tum luata inlak ‘healer’ (tidamtu), ‘zawlnei’ (prophet) nih tum phet theih a ni. Thlarauva sang kan ngaihsan miau avangin a lar zawnga nih chak ve mai chu mihring sual rilru atang chuan awl tak tur a ni e. Hei hian mi tam tak chu thutak lam aiin a kaihruai niin a lang. Rawngbawltu tam tak pawh an inveng zo lo emaw tih mai tur a ni.

Hei hi Biblea zawlneite laka tunlai zawlnei intite danglamna a ni a. Biblea mite kha chuan hreh ngawih ngawihin Pathian hnen atanga an thu dawn an puang tlangpui. Jona te, Jeremia te nunah khan kan hre mai ang. Zawlnei nihna leh celebrity nihna kha a inhlatin mi ngaihsan an hlawh lo nasa. Chu bakah zawlneite kha an rawngbawlnaah an hlawhchham tam hle a, mi ngaihsan an hlawh lo tlangpui a ni awm e. An thu sawi a hnawng a, a then phei chuan an thih phah hial a nih kha. Biblein a sawi zawlnei nih kha chu thil nuam a ni lo. Lo inlak ‘celeb’ pui chi a ni hauh lo a nia.

Zawlnei nihnaah hian thil awm tur lo sawi lawk theihna hi kan hriat lar ber chu a ni a. Chu ‘foretelling’ chu zawlnei hna pumpuia langsar lo tak a ni zawk a, Biblea langsar zawk chu ‘forthtelling’, Pathian rilru leh duh dan puan chhuah a ni. Hei hi vawiin thlenga Kohhran ho kuta Pathianin a dah chu a ni. Khawvel sual nasa tak karah hian thil dik lo leh tha lo puang chhuak ngam, zawlnei an pawimawh telh telh dawn. Hna nuam a ni lo va, mite ngaihsan zawng a ni lem lo. Pathian Ram tun din a nih theih nana Pathian duhzawng puangtu chu zawlnei a lo ni a. Suahsualna tenawm hmachhawn a, hailangtu pawh zawlnei a lo ni ta mai a ni. Thil ho te te lo hrilhlawk tum phet leh an sawi lawk dik loh avanga mualphona zakhua thlentu mai mai ang chite hi chu ‘inti-zawlnei’ an ni ta ve ang!

Tunlai khawvelah hian a hrilhlawk theih zawng hian zawlnei hna a awm vak tawh lo a nih hmel e. Hebrai 1:1,2, ah, “Tûn hma hun zawng khân kawng tinrêngin Pathian chuan kan pi pute hnênah zâwlneite hmangin thu a sawi ṭhîn a; tûn hun hnuhnûngah hian kan hnênah Fapain thu a rawn sawi ta thung a ni,” a ti daih tawh si. Tunlai khawvelah hian Isua Krista chanchin sawi hi zawlnei hna chu a ni mai tawh awm asin. Hei vang hi a niang Protestant Thurin ropui ber tih theih Westminster Confession chuan, Bibleah hian Chhandamna thu ringtu nuna kan mamawh zawng zawng chu a kim vek a ni, a lo tih mai. ‘Pathianin kan hnena puan thar tur a nei tawh lo, a puan tur ang ang chu Krista chanchin inziahna Bibleah hian a kim tawh,’ tih a ni ber e.

Hetia kan sawi hian Pathian pawlna mimal te tein kan dawn thin ang hi kan thlauthla vek tihna a ni lo. Chutiang chu a awm thin a, a awm ngei tur pawh a ni. Amaherawhchu, khawvel tana puan tur, kan zawm tlan tur, kan hriat tur chu kan nei tawh. Chu chu Bible a ni. Chu Bible thu chu kan zir ang a, kan nunah kan apply dawn a ni. A bak thil hi chu thlarau lama intih ropui tumna niin a lang zawk thin. ‘Intih-thlarau’ hi sual tenawm tak a ni awm e. Kan zawlnei thupuan tur hi Bible milin Bible thu huang chhung atang zelin a ni tur a ni zawk ang. Kan hmalam hun atan chu Pathian thu zawm tumin amah kan ring mai tur a ni. Thil lo awm tur lo hrilhlawk vel a, thlarau lam thil hi infiamna atana hman tur chi a nih hmel loh hle mai.

Thilmak leh hrilhlawk tih vel uar vak vak hi Pentecostal-Charismatics lam zia a ni a. Hemi zia hi Zoram kohhrante chuan kan kai thui tawh fu a ni. Mi tam tak an hruai sual tawh tih pawh a hretute kan ni. Protestant pangngai Reformed kohhrante uar loh lampang tak a ni thin tih hria ila. Pathian thutak ngaih pawimawhna leh nunphung pangngaia a thu awihna hi uar thiam zawk a tha. Chutih rualin Reformed theologian zingah pawh Continuationist inti (heng thilpekte hi a la awm reng nia ngai) an awm ve nual tho. An sawi dan thung erawh chu pentecostal-charismatic te inzirtir dan nen chuan inpersan tak a ni thung.  ‘Prophesy (Pathian hnen atanga thu dawn) hi a lo awm a nih pawhin Bible thu anga dah san tur a ni lovang, tin, tunlai zawlneite thupuan hi chu dik lo thei a ni,’ an ti tlangpui. Chutianga an ngaih tho chuan Cessationist position hi a him zawk tho tho niin a lang. ‘Dik lo thei’ a nih chuan innghahna tlak a ni lo tihna a ni ang a, ‘Dik lo thei lo’ Bible a awm reng laia lo buaipui vak tur ni awm lo tak a ni e! Han ngaihtuah chian chuan thil kalhmang hi chu a awm mai mawle.