𝐂𝐄𝐒𝐒𝐀𝐓𝐈𝐎𝐍𝐈𝐒𝐓 𝐊𝐀 𝐍𝐈 𝐊𝐀 𝐓𝐈𝐇 𝐂𝐇𝐇𝐀𝐍 𝐓𝐇𝐄𝐍𝐊𝐇𝐀𝐓

  

1. Cessationist tih tawngkam hi a mawi lo angreng a. A ‘negative’ deuh hu  a. Pathian Thlarau Thianghlim hnathawh ring lo kan ang riau a. Chuvangin sawi fiah lehzual chu a ngai dawn a ni. Chhiartu pawhin uluk taka chhiarin ngun takin i lo ngaihtuah dawn nia. Cessationist tih hian thuang hnih lian deuhvah a then theihin ka hria. Pakhat zawk chu Liberal deuh tak leh Atheistic deuhva ‘Tunlai khawvelah hian Thlarau Thianghlim hnathawha ‘thil mak’ (miracle) a awm tawh lo, beisei tur pawh a ni lo,’ tih a ni a. He ngaihdan hi chu ka pawm hauh lo tih sawi chiang hmasa ta ila

2. Cessationist ka ni ka tih chhan chu Reformed Evangelical Cessationist te ngaihdan nia ka hriat angin ‘Tunlai khawvelah mak danglam deuhva Thlarau Thianghlim thilpek chang bik, a bik takin, ‘Tihdam theihna’, ‘Hrilhlawkna’ nei hi an awm tawh lo, tih hi ka pawm dan a ni. Mizo Kristiante tan ‘tawnghriatloh’ hi chu issue a tling lovin ka hria a, ka sawi thui lovang. An lo ‘tawnghriatloh’ bawrh bawrh a nih pawhin a tha ka ti mai, an hlim ve a, Pathian pawhin a pawl nasa pawh a ni mahna, mahse Pentecostal-Charismatic te angin ‘thlaraua khah chhinchhiahna’ angah chuan ka ngai teuh lo. Tawnghriatloh chungchanga ka ngaihdan hi chu Mizo Kristiante ngaihdan tlanglawn niin ka hria.

3. I Korinth 12:9-a ‘tihdam theihna’ tih hi han sawi ta ila. Pianpui ve reng a midangte natna chungchang leh a tihdam theihna pawh nei tha an awm tih ka hria. Hetiang mi hi chu ka pawm thui thei viau mai. Tin, a zira zir chhuakte pawh hi ‘tihdam theihna’, Thlarau thilpek an dawngah ka ngai mai tho a. Mahse, pawm harsa ka tih ber chu ‘tawngtai dam theihna’ an tih mai, ‘healing gift’ neia inchhal te hi a ni. A chiang lo a tam ka ti.

4. Tawngtai dam thei nia kan hriatte hi belhchian dawl ka la hre miah lo va. Natna tuar hi a hrehawm em avang hian an ‘survive’ hle ni maiin ka hria. Tawngtai dam theihna nei se, engvangin nge hospital a la awm thleh thluah le? An tawngtai dam chur chur tur alawm! Pathian chuan a duh chuan a gift thei tih ka hre teh meuh mai, mahse pek bik hi chu a nei tawh lo a nih ka ring. An thawm hriat tur a tlem em mai. Hla deuha mi hi kan sawi ropui duh phian bawk a.

5. Hetiang mite hi an ‘theology’ hi a dik lo tlangpuiin ka hre bawk. Hei hi ka rin loh chhan lian tak pakhat a ni a. ‘Pathian hian kan dam a duh vek a, kan rin chuan kan dam ang’, tih te; ‘inpuan dam’ tih ang chite hi an thu kalpui dan a ni a, ka pawm hleithei lo. Nunphung pangngaiah a dik lohzia kan hre theuh a ni. Tawngtai dam thei nia inchhalte tawngtaisak zawng zawngte hi an dam em? An dam vek teuh lo. Mizo zingah chuan follow-up research te hi kan ti lem lo va. Dama inchhal te pawh hi kan pawm liam zui mai mai a. Sapram lama thil an duh chekngelna hmuna follow-up ti kan hriatte hi chuan chuti taka buaipui tlak an hmu lo thin niin ka hria. 

6. Tawngtai dam theihna rawngbawlnaa beiseina nena kal dam ta si lote hnena thuchah eng nge ni ang le? An ni tan eng theology nge kan neih? Tawngtai dam thei nia an hriat an pana an dam si loh chuan anmahni thiam loh em ni? An ring tawk lo em ni? Engvangin nge mi thenkhat an dam a, thenkhat an dam loh bik? Nu pakhat dam tum dam si lo beidawng angreng tak chuan, “A rin zawng ka ring asin le!” a ti vawng vawng mai an ti.

7. Tawngtai dam thei awm bik nia hriatna hian Thuthlung Tharin tawngtaina chungchang a zirtirna hi a ngai holam ka tia. Hei hi ka venthawn pakhat a ni. Ringtuin tawngtai dam thei lo bik, mi thenkhat chu tawngtai dam thei bik, anga inngaih hi Bible zirtirna nena inhlat tak niin ka hria. Tawngtai dam thei bik lo awm ta pawh ni se, ringtu dangte hi an tawngtai dam thei ta lo bik tihna em ni dawn? Pathianin tawngtaina ngaihthlak duh bik a nei em ni ang le? Nge Isuan ‘In dil apiang pekin in awm ang’ a tih kha dik loh chin a awm em ni dawn le? A nih loh leh, chutia kan tawngtai a ngaihthlak theuh tho si chuan, tawngtai dam thei bik an awm lo tihna a nih chu. Kan tawngtai dam thei vek.

8. Tawngtai dam theihna gift nei nia hriatna hi Kohhran kal zel atan a him lo ka tia. A chhan chu hetiang mi nia inchhalte hi ‘spiritual hero’, ‘dawng chhah bik’, ‘Pathian hnaih zual’, ‘Thlarau rawngbawltu’, ringtu leh rawngbawltu dang phak ve loh angin an ngai tlat thin. Chuvangin, pure biblical teaching te pawh an hmu ‘thlarau’ zo ta thin lo va. Kohhran pumpui tan thain ka hre thiam lo.

9. Cessationist ka ni, ka tih vang hian Thlarau Thianghlim hnathawh hi ka ring lo a ni teuh lo va. Harhna te pawh a awm theih ka ring a, mi sual piantharna hi ‘miracle ropui’ Thlarau Thianghlim hnathawh liau liau a nih ka ring a. John Calvina angin keimahni leh khawvela thil tha awm apiang hi chu ‘Thlarau Thianghlim hnathawhah ka ngai zawk. Ni tina lawmna leh harsatna kara Thlarau Thianghlim hruaina zawk hi ngaih pawimawh ka zir zawk a ni.

10. Ringtu leh mi sual berin Pathian hnena an tawngtai chuan kan Pathianin a chhang thin a, kan beisei leh duh aia thain a chhang thin a. Kan duh leh dil ang kherin min chhang lo tih ka pawm a. Ringtu nunah hian mihring hriat thiamnain a sawi fiah zawh loh thil mak tam tak hmuh tur a awm tih pawh ka pawm a. Mahse ‘miracle’ ti thei bik an awm hi chu pawm harsa ti ve tak ka ni.

11. Pathian chuan tu tawngtaina pawh a chhang thei vek tih ka hria. Tawngtai dam thei nia inchhal bikte tawngtaina pawh a chhang thei ang a, inchhal lem lote pawh a chhang thei vek ang. Ama thu a ni a, kan thu a awm loh avangin sawi theih kan nei lo. Amaherawhchu, hetiang rawngbawlna thlir hian hetianga inchhal ngam an awm hi an huai ka ti. Pathian pawh an hlau zawk lo emaw ni?

12. Tawngtai dam theihna ‘Healing Ministry’ an tih leh Chanchin Tha hril hi kal kawp lo se kei chuan ka duh zawk. A chhan chu Chanchin Tha ‘pure’ hi an tizahawm lo ka tia. Bakah hetiang thil, kuttling lo methodology, ka tih hmanga Chanchin Tha hril hi a fuh lo zawkin ka hria. Dam lo tawngtai sak leh engkima Pathian hruaina dila tawngtai ka hnawl tihna erawh a ni hauh lo thung. Tunhma chuan ‘tawngtai dam thei’ tih te, ‘hrilhlawkna’ tih te hi ringtu kan nih angin kan pawm mai turah ka ngai a. Reformed Theology (Calvinism) hian pawm kher a ngai chuang lo tih min zirtir niin ka hria a, Reformed Continuationist te pawh awm ve thluah tho mah se kei hi chuan Cessationist te pawh ka inti ngam ta a ni ber e.