𝐏𝐑𝐎𝐒𝐏𝐄𝐑𝐈𝐓𝐘 𝐆𝐎𝐒𝐏𝐄𝐋 𝐋𝐄𝐇 𝐊𝐎𝐇𝐇𝐑𝐀𝐍𝐓𝐄

 

Prosperity Gospel chungchang hi mediaah chhiar tur a awm leh zauh thin a. Kei pawhin ka ziak nual tawh bawk a. A thil tawktarh hi a itawm em avang leh Pathian malsawmna ringtute tana luang chhuak thin leh ringtute hlimpui mekte nen a inhnaih em avangin a herh deuh lai hi mi tam tak chuan an man mai lo fo. Mizo Kristian, thlarau boruak danglam deuh ngaina takte phei hi chu he bumna target awlsam tak hi kan ni sa. Chuvangin he thil hi kan hriatfiah hle a pawimawh a ni.

Prosperity Gospel dik lohna lai tak chu Pathianin ringtu tana a tiam miah loh ‘thutiam’ anga a zirtir tlat mai hi a ni ber. Leilung hausakna, taksa hriselna leh hmuingilnate tawktarhin Chanchin Tha an sawi miah miah mai a. Chu chu rinna kan neih mil zela neih tur leh rinna chak leh chak loh tehfung ang hialin an sawi ta thin a. Thenkhat phei chuan Pathian hnena kan inphal leh inphal loh ang chin zela hausakna leh hriselna hi neih turah an ngai. Thilpek khawnna hmanrua atan te hial an hmang nia! An thilpek lah chu an nin an dawng leh daih si!

Mizo Speaker pakhat thu sawi youtube lama mi ka ngaihthlak chuan Isua tlannaah hian he lei malsawmna leh taksa damna hi a tel angin a sawi miah miah mai a. Chu chu Prosperity Gospel ho sawi dan chiah a ni bawk. Thlarau damna/piantharna hi rinnaa kan chang ang chiah hian lei hausakna leh hriselna te pawh rinna hmanga neih theih vek angin a sawi! Retheihna leh natna hi sual vang vek ang hiala sawi duhte pawh zu awm a! He lai tak hi kan inven pawimawhna chu a ni. He khawvela hmuingilna leh taksa hriselnate hi Pathianin ringtute tan a ui hauh lo, mahse thutiam a ni lem lo. Harsat leh retheih huamin a hnung kan zui tur a ni zawk si a. Ringtu nih vanga hausak emaw, hrisel tur emaw a ni kher lo.

Social media vela han sawi ho chang hi chuan he Prosperity Gospel hian tantu a ngah ve viau thin a. Mak ka ti hial zawk thin. Pathian thu dik hi kan va han zawng lo hlawm tak em! Phurna thar min pe thei nia kan hriat leh miin an thatpui nia kan hmuh te hi kan tehfung hman thiam te chu a ni mai mai a. Khuareia a sawhkhawk lo awm thei tur te, beiseina dik loa mi tam tak an lut tur ang te, Pathian hmuh dan dik lo a zirtir mek ang te hi kan ngai pawimawh pha lo a ni. Rinna hrisel tak kan nei mawh ngawt ang. Than dan dik lovin kan thang uak uak a nih pawhin kan pian a chhe hle dawn tihna a ni mai. Mizo Kristiante hi chu nihna chu kan nihna a ni mek zawk em?

Kan hriat tur pawimawh tak chu Prosperity Gospel hi a him lo tih khawvela kohhran pawl tinten an hriat avangin an hnawl tih hi a ni. He thu kalpuitute chu heng thu zirtir thin mahnia kohhran nei te an ni tlangpui a, kan kohhran hriat anga changtlung taka inzawm khawm lian tak ang chite hi chuan buaipui chiah an ngai lem lo tlangpui. Tun hma phei kha chuan he ‘Health and Wealth’ Gospel leh Pentecostal-Charismatic lam hi an sawi zawm mai thin a. An ni meuh pawh hi an inla hrang ta zel a, he Prosperity Gospel an pawm loh thu hi an sawi chhuak ta fo a nih hi.

Pentecostal theologian lar Gordon D. Fee phei chuan, ‘The Disease of Health and Wealth Gospel’ tih buthelep a ziak hial a, India ramah pawh hian lei tur tam tak a awm. 1980 daih tawh khan The General Presbytery of the Assembly of God (USA) chuan ‘Believers and Positive Confession’ tih thuchhuah siamin he Faith Movement hruaitu lar Kenneth Hagin te, Kenneth Copeland te zirtirna a hnawl a, sum leh pai, taksa hriselnate hi ringtute chanvo tur chiang saa ngaih tur a ni lo tih te, natna leh retheihnate hi sual vang a ni kher lo, tihte pawh an puang. Assembly of God ho Chanchinbu Enrichment Winter 2015 issue chuan Prosperity Gospel chungchang sawiin, “Bible-in hmuingilna chungchang a zirtir dan dik tak han bihchianin Prosperity Gospel-in hmuingilna chungchang a zirtir dan hi chu sir khat chauh a nihzia a chiang a, a tlangpui thuin lei sum-pai leh hausakna a zirtir dan hi Biblein thlarau lam malsawmna a zirtir dan nen chuan danglam tak a ni,” a ti.

Hetih lai hian evangelical think-tank, mithiam inzawm khawm pawl pakhat hnuaia Lausanne Theology Working Group te chuan 2008 leh 2009 vel khan zir chianna an lo nei daih tawh bawk a. An thuchhuah chu internetah duh duh tan chhiar theihin a awm. Mi harsa leh retheiten Pathiana malsawmna chi hrang hrang kan beiseina hi dik leh tul chin thui tak awm mah se, ringtuten kan nawm kan maka hriselna leh hausaknate hi kan sawr chhuah theih mai mai a nih lohzia an puang nasa a. Tin, he Prosperity Gospel zirtirtu tam takin hleihluak tak taka thil an ti thin hi Bible zirtirna nena inrem lo tak a nihzia an sawi. “Pathian thiltihtheihna mak hi mihringten kan thiam thil avanga kan thunun theih emaw, kan thu chham, thiltih, serh leh sang hmanga kan duhzawnga her theih a ni lo,” an ti hmiah mai.

Kohhran pawl pakhatah chuan Catholic hi a lian ber an la ni lawr lak a. Protestant te hi kan han induh viau lai hian tunhma atang tawh khan anni ho hi chuan min hmu ‘adajat’ riau lehnghal a ni awm e. Mak angreng deuh mai chu Pope Francis khan a thih hma khan Prosperity Gospel hi a lo sel chiam mai a ni awm a. Vatican khan Evangelii Gaudium (2013) te, La Civilta Cattolica (2018) te tichhuakin ‘Prosperity Gospel hi chuan Chanchin Tha dik tak a pho chhuak lo a, kan duhzawng neihna hmanrua atan Pathian a siam a, mi retheite a hne ral a, Biblein tuarna, khawngaihna leh Pathian sum enkawl chungchang a zirtirna te hi a ngainep,’ tiin a sawi.

Prosperity Gospel hi US chhul chhuak theology a ni a. Baptist kohhran hrang hrang chet natna US lamah khuan Prosperity Gospel duh lohna a lian hle bawk a. Mi tam takin tuipuiin American culture nen inrem ru riau mah se Baptist kohhrante chuan a dik lohzia an man pha a, lehkhate chhuahin an hnawl thu hmuh tur a tam hle a ni. Southern Baptist Convention (2022) Annual Meeting Resolution 2 chuan ‘zirtirna dik lo’ tiin a hnawl hmiah a. Baptist World Alliance lam pawhin an thuchhuahah zirtirna dik lo a nihzia an puang tawh bawk. US lama Prosperity Gospel sawisel nasatu ber ber Albert Mohler te, John Piper te, David Platt te hi Baptist Pastor lar an ni.

Presbyterian kohhrante hian an thurin, Pathian thu zirtir dan leh nihphung reng rengah Prosperity Gospel hi chu do hle tur an ni ringawt a. Reformed theology nena inpersan lutuk thil a nih miau avang hian pawm zam theih vak a ni lo. PC(USA) website pcusa.org -ah chuan, Rev. Dr. Charles Wiley III, Associate Director of Theology, Formation and Evangelism for the Presbyterian Mission Agency article pawimawh tak a awm a, “Prosperity Gospel zirtirna dik lo hi a hlauhawm riauna chu thutak a hnaih em em mai hi a ni,” a ti. “Kan au chhuah emaw, kan chham emaw avanga min pek bat Pathianin engmah a nei lem lo,” a ti bawk. Hei bakah hian World Communion of Reformed Churches te, Africa ram lama Presbyterian kohhrante chuan Prosperity Gospel preacher te thiltih dan leh zirtir dan an hnawl tih a chiang thin.

Heti taka kan ringtupui, khawvela mi hrang hrangten an hnawl hian eng emaw zawng tak chuan ram a la ve zel tho. US lamah hian an tuipui hlawm angreng a, mi tam takin thutak leh dawt an thliar thiam si lo. Africa lamah pawh a hluar angreng viau. Awm nawm tumna ringawt theology nen a inmil em avang leh mihring te duhzawng ber ‘sum-pai’ leh ‘hriselna’ a tawktarh avang hian duhtu leh heti zawnga Pathian thu hril chak pawh an awm zel ang. Africa ramah he Chanchin Tha suak hi a hriltu an tam an ti. Mahse, Bible zirtirna enin a tling lo hle a, khawvel kohhranten an hnawl tlang a ni tih hriat a tha. Kan ramah pawh hian a lo lan det det chuan hmeh mih vat zel tur a ni.

*****