𝐂𝐇𝐀𝐑𝐋𝐈𝐄 𝐊𝐈𝐑𝐊 (𝟏𝟗𝟗𝟑-𝟐𝟎𝟐𝟓) 𝐈𝐍 𝐌𝐄𝐌𝐎𝐑𝐈𝐔𝐌

 

Charlie Kirk an kah hlum thu a rawn than khan kei pek chuan Charlie Kirk hi tu nge a nih ka lo hre hauh lo! Kan lo hlui tawh viau emaw ni dawn tehreng ni? A lo lar hle tih ka han hre ve hnuhnawh chauh a, mi ngaihsanawm tak a nihzia te pawh ka hre chhawm ve zel bawk a. Naupang te ni mah se a kum phu lovin miin an ngai thutak a, United States leh khawvel hmun hrang hrangah Lal Isua a zahpui lo hle tih pawh ka hre chhawm ve ta zel a. Mi kut tuara a thi ta mai uiawmzia te nen!

 

𝐄𝐧𝐠 𝐯𝐚𝐧𝐠𝐢𝐧 𝐧𝐠𝐞 𝐧𝐠𝐚𝐢𝐡𝐬𝐚𝐧 𝐚 𝐡𝐥𝐚𝐰𝐡 𝐞𝐦 𝐞𝐦?

 

Kum 2024-a US President thlannaa Pu Trump-a a tlin taknaah khan a thawh hlawk hlein an sawi. Thalai ho  rilru a hnehin vote tam tak a seng khawm sak a ni. MAGA (Make America Great Again) movement vawrh chhovin politics huangah a che nasa a. Kirk-a that riauna hi chu zahpui map lovin Kristianna leh American nihna a suihzawm hmiah mai hi a ni a. Kristianna pawn lamah United States ropuina tur hi a hmu thiam lo a ni ber. Pathian thu a dah sang hle tih a chiang a ni.

 

Keini hovin kan lo ral ngainat chhan pawh chuvang chu a ni lo thei lo va. Tim hauh lova Lal Isua rin pawimawhzia a sawi te, zahpui hauh lova sakhaw nun hlutna a champion te hi a ropui. Kristian zirtirna mil lo nunphung a dik lohzia a pho lang hneh thin bawk sia. Khu lama an tih dan phung ni chek tur a nia, College campus-ah neih inang inkawp chungchang, nau tihtlak chungchang te a debate hmiah hmiah mai leh, thiam taka a \hat lohzia a au chhuahpui thei te hi a ropuina a ni. Pathian remruat dan hi chu a mak \thin e, a thawh hlawk zel dawn tehreng nen a la ta mai si a.

 

𝐌𝐢 𝐛𝐢𝐤 𝐚 𝐥𝐨 𝐧𝐢

 

Charlie hi US middle-class chhungkua atanga lo zi chhuak a ni a, mi rethei tak an ni lem lo tihna a nih ber chu. Sipai tan te pawh tumin US Military Academyah inziah luh a lo tum tawh a, an lo admit duh lo a ni awm e. Hlawhchhamna chu a tawk ve tho tih a lang. College pawh a zir chhuak ta lem lo a, mahse kum 18 chauh niin Turning Point USA tih pawl an din a, he pawl hi a thang duang ta viau a ni ber mai. United Statesa High School leh college hmun hrang hrangah ‘branch’ an din ta thluah a ni.

 

Thu sawi leh debate (inhnial) a thiam avang hian a lar chho hle mai a. Ram pum hriat a hlawh rang hle. Donald Trumpan a rawn hre fuh hma hle bawk a ni. Amah tan lotute pawhin beih thama an ngaih thinna chu a dinhmun sawh nghettu an lo ni zel zawk a. College pawh zir chhuak lo a ni na vang vangin a inchhiar zau hle thung. Kum khatah lehkhabu 100 a chhiar chhuak thin ni in a sawi. Ani pawhhin lehkhabu 6 lai - Time for a Turning Point: Setting a Course Toward Free Markets and Limited Government for Future Generations (2016); Campus Battlefield: How Conservatives Can WIN the Battle on Campus and Why It Matters (2018); The MAGA Doctrine: The Only Ideas That Will Win the Future (2020); The College Scam: How America’s Universities Are Bankrupting and Brainwashing Away the Future of America’s Youth (2022) ; Right Wing Revolution: How to Beat the Woke and Save the West (2023); God Bless the USA Bible: The One Book America Needs Again (Editor, 2021), tih te a lo ziak tawh bawk. Zir sang lo mah se mi thiam a ni, kan ti ngam ang.

 

𝐔𝐧𝐢𝐭𝐞𝐝 𝐒𝐭𝐚𝐭𝐞𝐬 𝐝𝐢𝐧𝐡𝐦𝐮𝐧 𝐤𝐡𝐮

 

United States kan tih, America kan han tih liam mai bawk thin hi hun pawimawh takah an ding mek niin a lang. Kristian hmun hrang hranga mite tan phei chuan an sukthlek khuan sawhkhawk thui tak a nei a ni. Khawvela ram ropui ber an nih thin angin an hawi lam lam khu khawvel tan awnze thui tak a la nei a ni. Chutih lai reng khan culture lamah thil insu a tam em em mai a. Charlie Kirk rawn lar em em chhan pawh hi a conservative lam dinhmun fiah tak leh chiang taka a sawi vung thiam em thin vang a ni deuh ber awm e.

 

Sapram kan tih tak tak zawk, Europe hi chu secularism ‘Pathian tel lo nun’ hian a hneh tawh hle a. Kohhran pawh an chau ngawih ngawih a ni ber awm e. United States-ah hian 63% vel chuan Kristian an la inti a, 30% vel hi sakhua pawh nei mumal lo anga insawi an ni an ti. Chutiang mi atheists(Pathian awm ring lo), agnostics (Pathian awm leh awm loh hre lo) tih angreng vel chu an pung riau bawk a. Hetih lai hian neih inang (LGBTQ) movement leh sakhaw dangte hian an chiahpiah nasa a, nau tihtlak (abortion) a hluar em em bawk si. Hetiang hi an dinhmun a nih laiin Charlie Kirk te ang, thu sawi thiam, rilru chak, leh rin dan bulfuk tak nei hi an mamawh ve hle ni ngei tur a ni.

 

𝐂𝐡𝐚𝐫𝐥𝐢𝐞 𝐭𝐡𝐮𝐩𝐮𝐢 𝐤𝐡𝐚 𝐚 𝐭𝐡𝐚 𝐡𝐥𝐚𝐰𝐦 𝐞𝐦 𝐚 𝐧𝐢

 

Politics nena Pathian thu a kaih kawp thin avangin inven deuh chin neih chu a tha hrim hrim a. A debate leh thil sawi thenkhatah hian trained-theologian a ni lo tih a lang mai bawk. Chuvangin a sawi zawng zawng pawm duak duak a tul ber lo vang. Amaherawhchu, a thupui ken hi chu Kristian rilru atang chuan tha tak niin a hriat thung. Heti taka sawi thiam, mi hneh thei Pathianin he ram ropuia a rawn din hi a lawmawm thlawt a ni. Mi dang pawh an rawn ding chhuak zel turah ngai ila.

 

A vui nia an poster tar chhuahah khan a thu ken chu a chiang hlein ka hria: “Get married. Have children. Build a legacy. Pass down your values. Pursue the eternal. Seek true joy.” |ha veng vawng tak a ni. “Nupui/pasal nei la. Fa nei rawh. Hnuhma tha hnutchhiah ang che. Ngaihhlut tlak i neihte hlan chhawng zel la. Chatuan thil um la. Hlim leh lawmna dik tak chu zawng ang che,” tiin. Nupaa insiam a, fa neih pawimawhzia hi keini ho pawh kan inzirtir mek a nih hi. Chu kan chhungkuaah chuan ‘christian values’ (Kristian nun dik tak) kan inhlan chhawng ang a. Chatuan nunna chu vuan nghetin khawvel chen ringawt ni lovin hlimna dik tak chu kan um ang.

 

𝐈 𝐡𝐫𝐢𝐚𝐭 𝐫𝐞𝐧𝐠 𝐭𝐮𝐫 𝐞𝐫𝐚𝐰𝐡 𝐜𝐡𝐮

 

Kristian zingah pawh Charlie Kirk-a thiltih dan kha tha ti lem lo an awm ve nual tho. American nationalism leh Kristianna a chawm pawlh nasa mah maha hria an awm. A dik chin a awm ka ring. Hnam rilru leh Kristianna kan kaihkawp hian tih lutuk awm thei tak a ni. Tin, mingo lam tan a tan nasat luata mi dang tana inkharkhip riaua hmu te leh dawhtheihna leh hmangaihna nei tam lova ngaite pawh an awm a ni. Heng an hmuh dan hian dik chin a awm vek ang tih chu a rin theih mai.

 

Kan hriat tur chu Charlie kha evangelist a ni lo va, theologian a ni bawk lo tih hi a ni. A ngaihdan tam tak kha thlit fim em em a ni hran lo va, politics rilru takin Gospel kha a kalpui ve mai thin chu a nia. Tih that tam tak a nei. Hnam politics te pawh hi Chanchin |hain a luan chhuah vek tur chu a nia lawm. Nunphung tehfung atana Bible a hmang ngam tlat leh America ram ropuina tura Kristian sakhua hlutna a hmu pha tlat hi a tanawmna a ni lo thei lo. Politics huang chhung hrim hrima Kristian zirtirna pangngai a champion ngam tlat leh hneh angreng taka a ti thei mai hi a uiawm em emna a ni.

 

Charlie Kirk is dead, Long live Charlie Kirk!

 

******