𝐊𝐎𝐇𝐇𝐑𝐀𝐍 𝐍𝐈𝐇𝐍𝐀 𝐑𝐈𝐋

  

 

Mi tam takin kohhran nihna hi an hmu fiah tak tak thei lo fo a. Mihring pawl dang ang lo hian an hmu thei meuh lo. Mi tam tak awmna pawl a nihna hi pawm thiam ila, chutih rualin chatuan nena inthlunzawm a nihna erawh hai lo ila. Keimahni sawi len leh tet aiin Bible ngei hian a lo sawi te lo hle a, kan man pha lo zawk mah mah thin a lo ni. Han bih chiang lawk ila.

 

1. Lungpui chunga din (Matthaia 16:18a)

 

Thil nghet leh daih rei, danglam ngai lo leh awm reng tur ang chi sawi nan hian ‘lungpui’ tih te ‘tlang’ tih tawngkam te an hmang thin. Lal Isua pawh hian a kohhran lo ding tur ngheh turzia sawi nan ‘lungpuichunga rem’ tiin a rawn puang chhuak a ni. Kohhran kan hmuh hi mihring chak lo te te pungkhawm kan nih avangin a zuam awm fo thin a. Thlarau lam pawl a nihzia leh Pathian zawm, lungpui chunga rem a ni tih hmuh hmaih loh a tha.

 

Heta ‘lungpui’ hi tunge niang? tih chhannaah ngaihdan inpersan tak tak a awm nual. Thenkhat chuan Petera angah an ngai nghet hmiah a, a chhan pawh he thu a sawi hma lawk khan Petera chungchang a sawi vang a ni. A dang leh chuan Petera thu puan chhuah, Isua hnena, ‘Krista, Pathian Fapa chu i ni,’ a tih kha ‘lungpui’ chu niin an ngai bawk a. Mi tam tak chuan lungpui chu Isua Krista ngei kha a ni, an ti a, Isuan amah leh amah a insawina angin an ngai.

 

Isuan he thu a puan chhuah hnu daih a ziak Petera lehkhathawnah chuan amah Petera ngei hian ‘a kil lungphum…a kila lung pawimawh ber’ (I Peter 2:6,7) a tih chu Lal Isua kha a ni. He thu hian ngaihdan pathumna hi a nemnghet thui hle. Petera ngei khan lungphum, kohhran inrem chhohna ang chuan a inngai lem lo niin a lang. Chuvangin, Krista Kohhran hi Amah Isua Kristaa innghat leh Aman a vawn tlat a ni tih i hre thar leh ang u.

 

2. Thihna ngam loh (Matthaia 16:18b)

 

 Thihna hi mi tinin kan rap leh kan hlauh em em, kan tawn ngei ngei tura kan hmaa awm ni si, a ni a. Hmanlai atangin pumpelh an lo zawng tawh thin a, nimahsela tunlai thiamna sang ber pawhin chu chu a la hmu chhuak teuh lo a ni. Mihring finna hian thihnapiah lam thil a chhuichhuak zo lo a, thihna anchhia tihdamna tur damdawi an la hmuchhuak lo a ni. Mi hausa leh rethei, mi fing leh mi mawl, hmeltha leh hmelchhia hrut rualtu, hringfate ngam loh, an hmelma hlun chu thihna a ni.

 

Bible-in thihna a sawi hian he kan nunna tawpna hi a ni lo fo lehnghal a. Thihnaa tih hian chatuan thihna, Pathian anchhia leh hremna tawp intai awm lo a kawk fo. Chu chu Pathian hmelma Setana leh a hote khawsakna hmun a ni a. Hremhmun emaw, meidil emaw tiin chumi hmuna thlen thlak chu thihna chu a ni. Mihring tawna thil rapthlak ber a ni, kan ti lo thei lo. Heta ‘Mitthi kulh kawngkhar’ tih hi ‘Hremhmun kawngkhar’ ti pawhin a lehlin theih reng a ni.

 

Isuan a kohhran hi a dah sang khawp mai. A nihna pawimawhzia leh ropuizia pawh a sawi tel nghal. Kohhran chu ‘mitthi kulhkawngkhar’ emaw, ‘hremhmun kawngkhar’ -in emaw ngam loh a ni. Mihring hmelma hnuhnung, hringnun anchhia, chatuan thihna meuh pawhin Kohhran chu a ngam lo a ni. He thihna hneha ngamtu hi thil dang reng reng, Kohhran chauh lo chu a la awm ngai bawk lo a.

 

3. Do hneh rual loh (Tirhkohte 27:14b)

 

Lei leh nana ran chhawr an chinna hi a rei tawh hle a. Ran tha hman thiam hi tangkai tak a ni bawk. Paula hunlaia mite hian an ran chhawrte thunun nan tiangzumin an chhun thin a. A chang chuan an ran chhawrte khan luhlulchhuahin an rawn khenglet thin a ni. Chutianga tihchu thil sawt lo tak leh a khengtu zawk ran tana nathlawn mai mai a ni thin. Chu dinhmun chiah chu Saulan kohhran a tihduhdahnaa a chan chu a ni.

 

Kohhran tihduhdah chu Amah Isua tihduhdahna a nihzia kan hmu bawk a. Hei hian kohhran chungchanga kan rilru puthmang tur pawh a sawifiah nghal awm e. Mi tam tak kohhran hlutna leh pawimawhna hrethiam lemlo an lo chhuak ta nuk mai. Social mediaah duh zawng apiang sawi theih a nih tak hnuah phei chuan an pung ta emaw tih theih a ni hial. Kohhran thianghlim nan hian thahnem ngaia infuih leh inzilh te hial pawh a that reng lai hian, huat avanga duh ang tawktawka cheksawlh mai te, er avanga tihthuanawp tum chiam te hi  a him lo hle a ni.

 

Chutianga tihchimih vek tuma a nun mek laiin Saula hnenah chuan “Nangmah leh nangmah i intina thlawn mai a ni e,” tiin a hrilh a ni. Kohhran hi chu a nihna Pathianchatuan thiltuma inthlung a ni a, a dotute aia daih rei tur a ni hrim hrim a. A tiduhdahtute chu chhunna tiang kheng lui a, mahni intina lehzual ang chauh an ni. Kohhran chu Krista taksa; Isua leh Kohhran chu pumkhat an nih miau avang hian, kan do vaih chuan a tawpa chan chhe tur zawk chu a chiang sa a ni.