𝐊𝐀 𝐋𝐀 𝐍𝐔𝐈 𝐓𝐇𝐈𝐍 - 𝐏𝐀𝐑𝐓 𝟐

 

Hman deuh khan ka thil tawn nuihzatthlak deuh deuh thenkhat chungchang ka ziak a, chhiar a hlawh phian a. Tunah hian rawn chhunzawm ka tum leh ta. Tun tum chu nuihzatthlak hrim hrim aiin mak tel lam pawh a ni mai thei. Thu zangkhai leh hlimawm lam deuh te chhiar chang a awm pawh a tha. Hringnun tifamkimtu pawimawh tak an lo ni mai thin a. Kan nun kawnga thil kan theihnghilh ngai loh tur an ni bawk a. 

        

     𝐏𝐚𝐬𝐭𝐨𝐫 𝐤𝐮𝐭 𝐢𝐧𝐝𝐚𝐢𝐡 𝐥𝐨𝐡 𝐭𝐮𝐦 𝐛𝐞𝐫

 

Pro Pastor ka nih tirh laiin ka pu Pastor nen pass lawmnaah kan kal a. Ka pu kha mi fel tak mai a nia. Kei kha fuihna thu mi sawi tir a, ani khan tawngtaisakna nei turin ruahmanna a siam a. Khatih lai khan smartphone a la chhuak lova, Nokia phone lar vanglai kha a nia. Kei phei chuan neih pawh ka la nei zo lo a. Ani pawh khan ken nuam deuh, te reuh te kha a nei chauh a. A lu chunga kut nghata tawngtaisak hun a lo thleng ta a. 

Phone kha a kawr hma ipteah a thun a, a kut dinglam kha a pass kan lawma lu chungah a nghat a, a kut vei lamin microphone a keng bawk a, a tawngtai ta hluam hluam mai a. A tui vanglai tak chuan a kawr hmaa phone chu a rawn ri ta! (Switch-off nachang a lo hre lo!) A kut a indaih tawh si lo, tawngtai chham kal lai a ni bawk si, a buaithlak kher mai. Ringtone lah chu ring ropui!  Ka han lak chhuahsak dawn emaw ka tih leh a ni em si lo va. Buai deuh nuaiin kan tlingtla ta a nih kha.

𝐏𝐮𝐥𝐩𝐢𝐭 𝐡𝐧𝐮𝐧𝐠𝐚 𝐭𝐡𝐢𝐚𝐫-𝐢𝐧 𝐧𝐞𝐢𝐡 𝐭𝐡𝐚𝐭𝐳𝐢𝐚

Ka Pro Pastor lai tho hian Pastor 3 zuiin kohhran pakhatah seminar kan nei a. Kei chu ngaithlatu rinawmah ka tang a. An fel hle a niang keimah ber chu Pathianni zana thu sawi turin min ti a. Chumi zan inkhawm kal dawn pawhin ka pum lam check-in ka han sang vel a, a tha viau mai a. Confi takin biak inah chuan ka thu vang mai a. Secretary thu puan vel dawn chuan ka pum a rawn na ta riai riai a, palzam mai theih ka inbeisei phawt a. Chuti mai mai chi a ni lo tih a chiang chho tha viau mai. An biak inah lah khan pulpit hnung lamah engmah a awm lo a, a sir lamah chhuahna awm bawk lo va. Chairman ka bekbawr zawhah mi zawng zawng kal pelin kawngka puiah ka chhuak ta a!

 

A bul hnai in quarters hnai ber ka pan a, mahse in nghak awm lovin an lo inkhawm vek niin! Compound chhunga school thiar in te beiseiin kan tlan leh thuak thuak a, chung pawh chu an lo kalh vek niin, ka va han buai tak em! School thiar in bulah chuan ka thu tawp mai dawn emaw ka tih hnuah quarters kha a hnung lam atangin a hawn theih tih ka han hmu ta a. Ka thaw ta huai mai a ni. Mi pui khan hla pahnih an lo sa zo hman niin ka hria. Vawiin thlengin pulpit hnung lama vestry leh thiar in (toilet) neih hi tha riauin ka hriat phah ta a ni.

 

 𝐑𝐮𝐚𝐡 𝐬𝐮𝐫 𝐳𝐚𝐧 𝐫𝐚𝐰𝐧𝐠𝐛𝐚𝐰𝐥𝐧𝐚 𝐡𝐥𝐢𝐦𝐚𝐰𝐦

 

Ka Pro Pastor lai hian ka boss khan ka kalna tur leh tih tur min detail vek thin a. Fur ruahtui tam lai tak hian kan bial chhunga kohhran te ber, khaw dang hla vak lovah inrinni zana thu sawi turin min ti a. Khami ni khan ruah a cheng nileng a. Kan nu chuan thulh mai turin min rawn hman nghe nghe a, mahse ka tuang ka tichhah tlat. Thu sawi tura min ruatna mawhphurhna chu ka hlen ngei tur a ni, ka ti rilru a. Ka kal loh chuan kohhranho an lo hawihai dawn asin! Upate pawh an zahawm a!

 

Ka scooter tlan tawk tawk khawpa hlui tawh chu ka hawl chhuak a, kawng nal em em maiah tawlh zawk zawk chungin kan Upa pakhat in ka thleng thei hram a. An ni phei chu inkhawmin an lo kal vek tawh a. Upa in atang khan scooter khalh theih ziazang a nih tawh loh avangin nihliap kap parhin km chanve vel a ni mai ang, ka phei ta a. Chirhdiak pawh kephah tlum thaih thaih a ni a, ruah a sur reng bawk. Ka rilruah ringtu hmasa ruahpui vanawn sur zana khawchhung atanga an hnawhchhuah chanchin te kha a rawn lang uar uar bawk a! Phur angreng takin ka phei zel a.

 

Min lo beisei thup tura ring chunga Biak In ka va thleng chu pulpitah chuan Tual Upa pakhat hi a lo thu vang mai a! Thu sawi tur ka nih reng reng an lo hre lo! Inkhawm hruaitu kan Upa pakhat chuan beisei loh taka ka hmel an hmuh thut avanga lawmthu te a la sawi ta deuh deuh! Banah chuan thuhriltu chuan, "I lo kal dawn tih hria ila nangin sawi zawk la ni tur a nia," te mi tia, Kohhran Chairmanin, “Surprise visit a ni maw?” te min la ti zui! Nuih a za ru hle mai. Kan thingpui in honaah thil awmzia ka han sawi chu kan nui ho nasa khawp mai!

 

𝐅𝐮𝐡 𝐥𝐨 𝐥𝐚𝐧𝐠𝐬𝐚𝐫 𝐳𝐮𝐚𝐥 𝐭𝐮𝐦 𝐡𝐧𝐢𝐡

 

Pro Pastor ka nih lai tho hian tum khat chu kohhran member thi tate sunna inkhawm, kum tawp zan inkhawm ka hruai a. Khami tum khan ka inbuatsaihna a lo tha tawk lo ni ngei tur a ni, ka tibuai chho deuh nawk nawk a. Hla hnuhnung atana sak tur ka han bih deuh thuak a ‘Ka hunte nangin i vawng a, ka hun zawng i ruat a ni,’ tih hla kha kum tawp zana sak atana inhmeh riauvin ka hre ta thut a. Kan han sa ta a le! A chang tawp lamah chuan ‘He kum thar hi, Aw Pathian, malsawm ang che!’ tih te a ni ta nuai mai a! A va han fuh loh char char! Nula ho an la teh hak lenghal a! Then thu chungin kan sa zo tha hram a nih kha. Banah Upa seniorin min kamkhat hlak pawh lungawi takin ka pawm hmiah mai. A awm a ni. Kum thar lawm a la hun lo em a ni!

 

Ka Pro Pastor lai khan thil mak tak tak ka tawng nual a. Pastor ka nih hnuah chuan a tlem zawk a ni awm e. Tum khat chu a tira ka sawi ka Pastor nen khian kan inzui leh a. Kan bial chhungah khan kan kohhran original ni lo, tlai khawhnua mi rawn zawm mi tlem te an awm thin. Enkawl an buaithlak ve khawp mai a, tih ngaihna kan hre vak lo va. Anni lam pawhin vuina thuk tak an lo nei ni tur a ni. Pastor khan ‘chawhmaah thu i sawi ang a, zanah keiman ka sawi ve thung ang,’ tiin rem a ruat a.

 

Kei chuan boruak hriain thupuiah “In hotute thu thuin awm rawh u,” tih ka thlang a, ka theih ang tawk tawkin kan sawi ve piap piap a. An ngaithla tha viauin ka hria a. Min en kar mai hlawm a. Ka sawi zawhah chuan an hotupa ber chu a ding a, vui thu eng eng emaw a sawi zawhah, “…tun bak hi chu mi rawn tlawh tawh lo ula…” a ti ta mai! Ka boss nen chuan kan hrilhai dun rem rem hle. Nuih a za ru bawk. A scooter hlui tawh lam nena kan han inphur haw hnek hnek mai kha chu lainatthlak tak chu kan ni. Ka sermon tlak that loh lan chhuah hma tum ber a ni hial awm e!