𝐃𝐀𝐖𝐓 𝐊𝐇𝐀𝐖𝐕𝐄𝐋

 

Hmanniah Pastor senior tak pakhatin, “Tunlai khawvel hi dawt thu lengvak leh dawheh tam ber hun a ni ang. Heti em em hian mipuiin dawt thu kan la hre hnem ngai lo,” a tih ka lo hria a, rilru a thawng dawt mai. Tunlai khawvel han thlirin dik riauva hriatna ka nei lehnghal a. Thil siam thiamna a lo thang a, khawl thiltihtheihna a lo sang zel a, a bik takin internet hmang tangkai (digital information) kan thiam zual zel. Social media – youtube, facebook, whatsapp, instagram …adt., kan hmang nasa telh telh a. Thatna tam tak a awm laiin a tha lo lam pawh a lo tel ve zel a, dawt thu te pawh a lo leng nasa ta em em mai a ni.

 

Social Media

 

US mihang President hmasa ber Barack Obama kha Youtube zar zova tling ta ni pakhatin an sawi thin a. Thawk leh khatah Youtube-in mi thenkhat hringnun a sawi danglam zawk hriat tur a awm thin. Chutiang chu social media dangte pawh an ni ve tho a. Rang lutuka a darh mai theih zel avang hian a hlauhawmna pawh a awm tam bawk a. Kan beng han verh riau ang chite hi thu tangkai em em lo, mi leh thil thleng dangdai tak tak an ni duh a. Nunphung tawp tak tak leh sualna pawhraw deuh deuh hi kan tui duh phian mai lehnghal a. Che maksak leh mipat-hmeichhiat lama ngam huai deuh deuh hian viewer leh buaipuitu ngah an ni fo thin hi social media that lohna lam chu a ni chiang. Heng social mediate hi kan chhiatpui hle ang nge kan thatpui zawk dawn tih chu hunin a la hril ang chu.

 

Social media zingah pawh Youtube hi a sawhkhawk na ber turah ka ngai a. Nileng lenga ina awm thin, in nghak leh nauawmtu ten an buaipui zual turah ka ngai ngawt a. Tih tur dang em em nei loten TV hmai liana Youtube thil ho te te en mai loh chu tih tur dang an hre vak lo. Hei bakah hian mahniin phone kan hum theuh tawh a, kan duh duh kan en tawh mai a ni si a. Tin, Youtube-a thil upload te hi a entu tam azira sum hmuh theihna ni ta hian thil a tidanglam nasa bawk a. Zaithiam leh talent nei tha tak takten sum hmuhna hmanraw pawimawha an hman hi a that tehreng nen, sum hmuh nana hman tum hrim hrimte hian viewer ngah tumin engkim mai an chhawp chhuak a, tingaihnawm tuma ‘thutak’ tling chiah lo thleng thlenga belh an hreh lo thin hi a pawi lai chu a ni. Kan ngaihdan milpui deuh zawng chu a dik leh dik loh chhui lem chuang lovin kan thutak pawm zung zung mai bawk a.

 

Inven leh Invawn

 

Heti khawpa social media-in kan hringnun a sawi lawih lawih lai leh tui lian ang maia dan zawh rual lohva a chim san tual tual lai hian engtin nge kan awm tak ang? Kan fimkhurin kan invawng lehzual tur ni awm tak a ni. Video ‘viral’ zawng zawng te, mi tuipui thil zawng zawngte buaipui ve nuaih kher a ngai lo. En loh tur awm chite pawh thliar thiam tur a ni. Nu leh pate phei chuan a theih ang angin fate ven leh vawn thiam a pawimawh. Mi zawng zawng hian thu rintlak leh tlak lo thliar thiam dan pawimawh tak kan neih a tul. Social media kan hun hman thlengin kan vawn a ngai a ni. Han awih that duh loh hmasak phawt hi a him zawmah awm asin.

 

Mizote hi kan la tam tehchiam loh avang hi nge ni hneh kan la awl viau mai niin a lang. Awihawm loh zawk deuh leh ni lo zawk deuhva ngaih theih pawh kan rilruin a awn laklawh chuan tihdanglam harsa tak a ni. Hman deuhva Pastor senior thihna chungchang angah te khan mipui rilru leh a chhui chiangtute hmuh dan chu vawiin thlengin a la inmil thei meuh lo emaw ni tih theih a ni a, Pastor pakhat MPSC member ni ta, technical leh theological taka han sawisel tur awm meuh lo, chungchanga kan rilru put dan tlangpuite kha mak angreng tak niin ka hre thin, tun hnaia Pastor an sel deuh luai luai (awmze awm mang hauh si lo) te thleng thleng hian!

 

Ka nuih tiza angreng deuh tak pakhat chu Covid boruak tir lama PM Modi-an thil min tihtir vel chungchang kha a nia. A tir khan thil ri thei thleng, bel, adt., min khawn tira, ihe lovin kan khawng sup sup mai a. Kha kha Hindu ho practice dana thlarau sual hnawh darhna thil a nia. A hnu lawkah mahni Pathian theuh biaa tawngtai tur tiin a hun a rawn ruat thlap a. Keini ho chuan kan hmu ‘Hindu’ ta tlat a, kan ti tha duh ta lo a nih kha. ‘Bati chhi duh ve lem lo ten torchlight pawh hman mai ni se,’ tih a nih reng lai khan torchlight sihen ringawt pawh kan hmu ‘ramhuai’ zo titih vek mai kha a nia. Mizote hi mak ve angreng tak chu kan ni. Kei khami hunah khan ka Van Pathian hnenah ka lo tawngtai ve hmak mai asin.

 

Tan a ngai

 

Eng hi nge pawi zawk ang? Mi tha loten thil tha lo an tih thin hi nge, mi thaten engmah ti lova an enliam mai mai hi? Hei hi zawhna lar tak a ni. Khawtlang tana thil tha lo leh duhawm lo a lo pun hian a pawina hmu phate hi an ngawi mai mai thiang lo a ni. Mimal nun a rawn kang kai ang a, kan tuar ve chin a awm ngei ngei dawn si a. Digital technology hi a sang zel dawn. Vawiina kan hriat phak loh mak tak tak a lo la awm zel dawn a ni. Chutiang hmachhawn tur chuan kan khawtlang hi engtin nge a inbuatsaih a, Kohhran pawh engtin nge a inralrin? Thu tling lo, thil tha lo, kan sawtpui loh tur theh darh thiam leh theh darh thei an lo tam a, an theh darh nasa a nih chuan - thu tling, thu tha, kan sawtpui ngei ngei tur thu leh en tur chhawp chhuah hi ringtu kan nih anga kan batah kan ngai thei ang em?

 

Mi pakhat ka hriat chu kum tam lam deuh hnuah Pathianah harhna a chang a Youtube sermon te hi a ngaithla nasa khawp mai a. A speaker ngainatte pawh Pathian hman tak tak leh an zirtirnate pawh him tak tak an ni a. Rinna kawngah a puitling tha chho hlein ka hmu. “ ‘Youtube (theological) graduate’ i ni e,” ka ti a, kan hlim dun hle. Social media thatna lai tak a man fuh a ni reng mai. Tunlai tak, hmuhnawm tak, awmze nei tak, zirtirna tha tak nei chhawpchhuah hi Camping, Crusade ang chite tluka pawimawh a nihna  hria ang u. Kohhran mawhphurhna a nihzia hi pawm bawk ila. Thangtharte khawvelah hian he hmun hi kan inbeihna hmunpui tur a ni ang. Media influencer ten audience an ngah em em mek lai hian Kohhran pawhin a en liam mai mai thiang lo a ni ber mai.