𝐊𝐇𝐔𝐀𝐕𝐄𝐋 𝐈 𝐋𝐀 𝐂𝐇𝐇𝐈𝐍𝐆 𝐍𝐆𝐄𝐈 𝐀𝐍𝐆

RD & the 3 Rappers tih zai group tun hma deuhva lar ve takte music video pakhatah khan pa pakhat motor tlan vel vanga kawngpui kan hleithei lo buai zet mai hi an rawn tilang a. Chu chu Mizoram nen tehkhinin hmasawnna kawngpuia kal tum ve si, kal hleithei rih lo, midangin tlan san fua fua mai si, angin a sawi ni tain ka hria. Dik pawh a dik hmel fu a. Keimahni huang chhungah chuan induh tawkin lungawi tawk viau thin mah ila V Thangzama’n, ‘Khuavel i la chhing ngei ang,’ a tih kha chu kan la thleng chiah lo tih kan pawm tlang lo thei lo a. Khawvel chhing tur hian thawk lehkhata tih rup theih pawh ni hek suh. A kawng hnai ber leh pawimawh nia ka hriat han sawi ila.

𝐊𝐨𝐡𝐡𝐫𝐚𝐧 𝐭𝐢𝐡𝐜𝐡𝐚𝐤 𝐳𝐞𝐥 𝐚 𝐧𝐠𝐚𝐢

Tunlai mi thenkhat rakna tur zawng hrim hrim ten Kohhran sel an han intihhmuh a. Miin an nuih liam mai mai dawn emaw tih laiin awih tuma beng dawh a mual mual chu an lo awm ve tho emaw ni dawn ni. Heti a nih avang hian Mizote tana Kohhran hlutzia te hi hmu thiam lo an awm palh ang tih a hlauhawm thin a ni. Thil nihna han chhut chiang sela Mizo hnam nun leh chanchinah hian Kohhran aia chhuan tur bik a awm dawn em ni, tih hi mi tam tak ngaihdan a ni ngei ang. Vawiin thlenga kan ram leh hnam chanchin hi sawi ta ila Mizote hi mite hriat kan hlawhna, miten min fak derna leh chhuanawma kan lan vena chu Mizo Kohhran leh a rawngbawlna mai te hi a nih hmel a. Thil dang hi chu a tam vak lo niin a lang. Sports lam han thlir ila national levelah pawh kan lang hleithei lo va, music lam han ti dawn ila kan ram chhungah kan intihlim tawk hle ringawt a, sumdawnna lam ti ila che lian tham tak tak pawh kan la awm meuh lo, hmelthat lamah lah Miss North East em pawh Zonu-in a la hring rih lo!

Chutih lai chuan mahni tawkah Kohhran leh a rawngbawlna chuan ram danga kan Kristian-puite fak leh chung en kan ni pha ve tlat a. Tam dan azir zela missionary tir chhuak tam kan nihna khawvelin a hriatna pawh a rei ve ta e. Mizo Kristiante Pathian hnena thilpek duhna rilru leh thilphalna mak tak mai hi hnam dangte mak tih a tling thin. Chu kan thilphalna chuan rah tha a chhuah hle tawh a, a chhuah mek zel. India ram Kristiante hian sum leh paiah pawh Zoram kohhrante lam a thlir thupna pawh hun engemaw chen a ni ve ta. India ram Pathian Thu zirna hmunpui Serampore College fung chelhtu atan Mizo an han inchhawk zar zar mai te hi a chhan a awm a ni tih hriat thiam tur a ni a. Mawhphurhna chanvo pawimawh chelh turin Zopa/Zonu ngei an duh thin hi an mimal that vang ni mah se a dawmtu Kohhran vang a ni tel tih chu tu han hai chi a ni lo. Hemi kawng hi sut thiam lehzual te pawh kan zir hial a ngai. Chumi atan chuan thangthar mi inpe leh Kohhran ngelnghet tak kan nih a ngai a ni. Kan thianpa sipai bang pa inngaitlawm tak chuan, “Kohhran hi miin lo selin chhunga mi thenkhat mualpho hial chang pawh lo awm mah se, keini ang min ngaihlu der a, kan tih theih awm tawk te te min hlut saka, kan thusawite hial min ngaihthlak a, mi pangngaia min pawmtu leh chhawrtu hi chu e...an sawiselna hi ka ngaithla duh loh tawp a ni,” a ti hmiah mai nia.

‘𝐖𝐨𝐫𝐥𝐝-𝐜𝐥𝐚𝐬𝐬 𝐞𝐝𝐮𝐜𝐚𝐭𝐢𝐨𝐧’ 𝐦𝐚𝐰𝐥𝐡 𝐤𝐡𝐚

Khuavel chhing tura kawng inhawng ruak mai chu Zirna lamah hian a ni. Northeast-a state ralmuang ber kan ni mek a, social life zalen tak kan nei hi kan ropuina pakhat a ni a. Mizote hi a tlangpui thuin hnam ‘friendly’ leh ‘polite’ kan ni bawk. Hei hi kan hman tangkai thiam phawt chuan state dang nu leh paten ram pawn hla tak atanga an fate rawn tirh hi an hreh miah lo vang. Kan zirna hmun te a that poh leh state pawn zirlai kan hip ang a, an rawn luh tam poh leh sum leh pai an rawn keng hnem mai dawn a ni. Kan zirlaite an lo changkang telh telh bawk ang a. Kawng tinrengah a tha a ni ber mai. Uluk lehzuala kan tih chuan zirna huang hi Mizote tana beiseiawm pakhat, Pathianin min duan dan renga kan thiam chi niin kei chuan ka hre thin a. Tunlai khawvelah phei chuan thiltih hi a awl telh telh lehnghal a. Tun hma deuhva ‘world-class education’ kan hotute sawi vung deuh kha tham ral mai lo sela, thangtharte tan buatsaih i han tum tak tak teh ang u.

Zirna kawngah hian Zoram kohhrante pawh kan inhawng zau telh telh a ni tih chu chhim leh hmarah Kohhran college tha tak a ding chho mek hian a tilang a. Kohhran leh sorkar tih tur chauha ngai lo hian kan mi hausate hian an neih robawm hawng phal sela, kan mithiamte rawngbawlna thinlung nen han pen chhuak tak tak bawk sela tih theih tur a tam ngawt ang. Tuna kan zirna dinhmun erawh a tawk lo nasa tih a chiang a. Thenkhatin ti tia an sawi ‘Mizoram University atanga zir chhuak Central Service tling an la awm lo,’ an tih te hi tak tak a nih chuan hmasawnna tur a la tamin Magazine thenkhat University tha tehfung ranking-a beisei aia sang nih ringawt hi a ni ber lo tih hriat a tha. Tunlai zirlai zingah examnaa ‘entawn’ a hluar riaua an sawi te pawh hi tak a nih chuan thangtharte hmabak a thim hle tih hriat thiam mai tur a ni. Hetiang thil hi muangchang leh zawi te tea ram leh hnam tihthuanawpna a ni lo thei si lo. School education atanga tanin University level thleng hian zirna tha, India ram leh pawn lam thleng pawha hriat hlawh pha din tura thil pawimawh han ban phak bik loh em em kan neiin a lang lo a ni.

𝐊𝐚𝐧 𝐳𝐨𝐭𝐥𝐚𝐧𝐠 𝐫𝐚𝐦 𝐧𝐮𝐚𝐦 𝐧𝐠𝐞𝐢 𝐡𝐢 𝐚𝐰

Ram tin hian chakna ruam leh chak lohna ruam kan nei vek a. Mizo society nawmna chu kan khawtlang nun zalen leh kan inpawhtawn em em hi a ni a. Hemi avang hian mipui huap inzirtirna (public education) pawhin awmzia a nei thuai thuai thin reng a ni. He thil hi vulh lian zelin pawn lam mite thlir thup khawp ram a din theih a. Chumi tur chuan mi tin kan tan rual thiam a pawimawh hle dawn a ni. Thailand ka kal ve tumin a lo awm tawhte hnenah, “Bazarah te hian mi sual laka inven nasat a ngai em? India ram anga min bum palh ang, min rawk ang tih hlau renga awm te hi a ngai ve em?” ka ti a. “Hlauh tur a awm lem lovang,” tiin min chhang thei a ni. An ram thawh chhuah 40% lai hi Tourism niin an sawi a, mikhual laka that chhuah pawimawhna an hre chiang vek ni ngei tur a ni. Keini pawh a ram mite inhung bikna dan fel taka kalpui chung si hian mikhual leh ram dang mi hip dan thiam a ngai. Kan zei sa tak a lo ni bawk nen.

Khasi driver pakhat ti tiah chuan, “Kawng lakah motorin harsatna nei ta thut ila, Mizoramah chuan mi hi an rawn pung khawm thuai mai a. Motor tlan lai te pawhin ding meuhvin puih min rawn tum hial thin! Hmun dangah chuan min tin san zung zung zawk a...” tiin Mizote danglamzia hahipin a saw. He thil, Mizo tlawmngaihna, keimahnia bet tlat, thil pangngai anga kan ngaih, thil danglam tak site hi kan vulh fuh zel chuan kan ram khawvel hriata vawrh lar lehzual zel thei a ni ngei ang. Tunhma deuha Rev Dr Vanlalnghaka sawi thin sap Mizorama kal ten an comment, ‘Mizote chuan smiling face an nei,’ a tih te kha a lawmawmzia ril tak a ni. Social media lar hnua vai pakhat Mizoram chhim lam thlenga zinin Zoram a fakna tam tak kara kuhva zuar nu pakhat a thil zawrh a leisak pawisa nawi neih loh ‘A pawi love,’ tia thial sen sang chunga a nuihsak thu a sawi te kha Zoram hmangaihtu tan chuan thu mawi ber pawl a tling hial awm e.

‘Mizoram state khi te reuh te ni mah se – mi an thain an changkang a, zirna hmun tha a ni bawk a, Kohhran a chakin sakhaw thilah an tha bawk nen, kan fate BA, MA, Ph D zir nan chuan ka duh ber a ni,’ an tih huai huai ni rawn inher chhuak sela, ‘General line chu thu dang ni se...IT leh job-oriented degree an tha em mai, ‘Silicone hills’ an ni ringawt alawm,’ an tih theih hun a nghahhlelhawm a ni.

****