𝐓𝐀𝐖𝐍𝐆𝐓𝐀𝐈 𝐃𝐀𝐌 𝐓𝐇𝐄𝐈
Ka tawn ve leh chu El Bethel Camping kan khuaa kan neihah khan a ni a. Chhawng tam tak kan nei a, kan hlim mup mup khawp mai. A boruak vanglai Pathianni zingah chuan dam lote hruai khawma tawngtai rualna neihsak tur tih kha an puang a. Speaker khan chiang takin, “Tihdam theihna kan keng kan ti lo va, amaherawhchu Pathian mite pungkhawm tawngtaina hi Pathianin a ngaithla thin a, kan tawngtai ho dawn a ni,” a ti mai a. Ka ngaihtuah let hian a sawi dan kha a dik khawpin ka hria. ‘Damna chu i chanvo a ni. Puang la i dam a ni mai, I dam loh chuan i la ring tawk lo a ni,” tizawng chuan mipui min thlukpui lem lo a ni. Tichuan, damna inkhawm chu kan bei ta a. Sound system, a hunlaia tha ve thawkhat tak nen, “Aw Isu tui nung lui i ni…” tiin an sa ruai ruai reng bawk. An lam nasa tiah tiah khawp mai. Boruak chu invawrh nasa tak a ni. Kan thenawm pitar ke nat avanga kal tha thei lo pawh kha a ‘Haleluiah’ that that mai a. Ka pu khan beiseina a nei a niang chu, ka pi, hrisel lo, tap tawm ringawt tawh pawh kha kan phur phei ve a. Ka pi pawh kha a hlim ve hle aniang kan haw kawngah chuan, “Ka’n lam tlang zak chu le!” a ti a, a dam tawh turah ka ngai ka lawm ve hle. Mahse, a tuk lawkah chuan a ngai tein a chak lo leh viau chu a ni si a. Hetiang thil hian ka rilru a tibeidawng deuh tan a. Damna tak tak hi a awm lo emaw ni tehreng ni, tiin a chhanna ka zawng tan ta a ni.
Rinna leh hriatna lamah pawh ka thang chho ve zel aniang. Engtik laiin nge ‘tawngtai dam theihna’ nei bik deuh anga mi thenkhat inchhal hi ka ngaihsan lem loh viau tih pawh ka hre ta chiah lo. Thlarau nunah hian a pawimawh ber a ni lem lo tih hi pawm nghet ta hle a. Pathian chuan tu tawngtaina pawh a chhang thei tih ka ring nghet a. Intawngtaisak thin tur pawh kan ni. Ka naupan zual laiin ramhnuaiah ka nu nen pauithin kan zawng a. Kan hmu mai lo mangang chuan ka rilruin ka tawngtai a, a hnu lawkah kan hmu ta teuh mai a. Ka theihnghilh thei lo. Pathian chuan thlarauva te ber nia kan ngaihte tawngtaina pawh a chhang thin. A chang chuan chawplehchilhin a chhang ang a, a chang chuan hun rei deuh a duh a ni mai thei. Kan thu a awm lova, a chhangtu thu a ni. Tawngtai dam theihna chu pek bik nei ta se, midang zawng tawngtaina chu a nep bik deuh em ni ta ang? Chutianga tidam thei an awm chuan engah nge hospital te hi kan la mamawh le? Damna chang lo an va tam thin si ve. Eng vang nge ni ta ang? Chhan fiah tur a tam khawp mai. Hetiang thilah hian ka intibuai peih lo ta law law a. Ka ngaithei lo riau ta mai lehnghal a. Thenkhat chuan ti lutuk te pawh min ti ta ve ang! An ni pawh ti lutuk ka ti ve tho! Thu tling tak ni lem lo buaipui viau mai hi a ho ka ti zawk tlat. Rah ropui tak a chhuahin ka ring lo a ni.
Tum khat chu campingah ka tel ve a. Tawngtai dam rawngbawlna hi a tel a lo ni a. Tawngtaitu ber chuan thlarauva hria niawm takin a tawngtai lai chuan ‘I chuti lai chu a na….lo khawih la…’ ti zawngin a bei leh ta a. A tactic hman dan kha fing riauvin ka hria. Khati zah mihring thu khawmah chuan a risk fuh nualin ka ring, a fuh loh pawhin hriat theih a ni chuang si lo va! Tum khat pawh facebookah mi pakhat nen kan sawi dun ngial a. Tawngtai dam theihna hi a tan hle mai a. Kei pek chuan, “Hetiang thilpek dawng tak tak an nih chuan eng vangin nge mi zawng zawng an tihdam loh?” ka ti ve tlat a. Ani chuan, “An rin loh vang a ni mai alawm,” a ti a. Keia dang duh lo chuan, “A tihdam tura te rinnaa innghat a nih tho chuan, a tawngtaitu role chu a va ho awm si ve,” te ka ti a. “A tawngtaitu tihdam a ni hleinem, Pathianin a duh duh a tidam mai alawm,” a rawn ti leh a. “E…chutia a tidamtu tih ang anga dam an nih tho chuan kan tawngtaina nen a danglam chuang lo a nih chu,” hlim takin ka ti ta a. Kan lungawi tlang ta emaw ni. Ka hre zui ta lo. Hei hi uar thiam theuh ila ka duh – Tawngtai dam thei vek kan ni a, Pathian hnathawh kan beisei tlang mai a ni, tih hi. Tul a tih chuan tu pawh, eng hunah pawh a tidam ngei ang. Pek bik awm deuhva hriatna hi chu chhut chian a dawl lo ka tia, ringtu tinte chanvo a tinep zo vekin ka hre hial mai.
Kan khuaah bawk tihdamna boruak na deuh hi a awm lehpek a. Chu phei chu nasa tak a ni. Shah Rukh Khan meuh pawh rawn kal a tum anga sawi te pawh an awm! Khami tum kher kha thih ngam deuhthawa ka dam loh nen a innang lehnghal a. Thenkhatin pan ve tura mi rawn pawh an awm, mahse damna chan tumin ka pan ve ta lem lo. “Kohhranhovin min tawngtaisakna a tawk, a aia ropui a awm chuang lo ve,” ka ti a nih kha. Ka pa zawk, rei tak stroke vanga che hleithei lo kha chu an va hruai a ni awm e. Kan hmuh theih chinah chuan eng phei chu a nih phah chuan lem lo va. Chumi tuma an sawi vung ber pakhat Kristian ni lo mi pakhat damna changa an chhungkua pawh Kristiana inpe ta chungchang a ni a. Thutak niin ka lo ngai ve mai a. Engemaw hnuah chuan damna chang nia an sawi nau nen chuan kan inkawm hlauh mai a. A u dam thute kan sawi kai hnu chuan chutiang a nih lem loh thu a sawi ta daih mai a, ka phawk hle nghe nghe, “Thenkhatin dama an inngaih chuan ka sawi thei lem lo va, mi zawng zawng chu an dam lem lo a nih hi,” te a la ti ta deuh deuh! Tlangkam nen chuan a dang hle mai! An chhungkuaa Kristiana inpe hialin an sawi kha a ni sia!
Covid len vang lai pelh hretah khan lehkhabu dawrah Vai Evangelist, tualto deuh chi ni ngei tur a ni, pakhat nen kan intawng leh bawk a. Covid kan hlau em em hlawm kha rinna chak lo min ti hlawm hle a. Covid nate pawh a tawngtai dam thu te kha a sawi a. A duhthawh ve hlaih hlaih khawp mai. Kei pawh kha ka thin a thawk ve ta deuh a, awki pawh a sang thawkhat! ‘Chutia i tihdam theih chuan hospitalah te kal ta che,’ te ka ti ve nuai mai. Ka lo nuih liam ta mai mai lo kha ka inchhir deuh. Pu Faktea vanglai khan Aizawlah ka awm a, engemaw chan tumin inkhawm kha ka chhim ve lem lo. A thu kalpui dan kha chiang lem lo tam tak a awmin ka hre tlat. Ngaihtuahna kan hmang tha duh lo lui mai mai a ni. Kan thianpa thlakip chhuak chanchinbu siamin interview-pui turin mi rawn sawm a, zawhna kan zawt nasa angreng khawp mai a. A chanchinbua a han chhuah meuh chu issue dang hralh hleithei lo khan a chhut zawng zawng a hralh zo duak mai a nih kha. Pu Faktea lar vanglai kha chuan a lar vet vet em bawk a ni. Bangalore-a lehkha kan zir laiin Benny Hinn-a pui roh hi mi thenkhatin an chah chhuak a. Mi nuai tel an pungkhawm a ni awm e. Ka pawm dan a lo nghet lehzual ta bawka kei chu ka kal lo hmak thung. Kalna tlakah ka ngai vak lem lo aniang. A pui lo em! Bible hian tawngtai dam thei pan run run turin min zirtir ka hre lem lo va. Ringtu zawng zawng hi, “In dil apiang tihin a awm zel ang,” tiin min tiam zawk a ni. Heti a nih avang hian tawngtai dam thei bika mi thenkhat ngaih tlat ai chuan Pathian khawngaihna avangin tawngtai dam thei vek kan ni, tih hi ka pawm dan nghet tak a ni ta zawk a ni.
Tum khat chu Pastor ka zui a. Chhungkaw pakhat mo pahnih nei kan tlawh a. Mo senior zawk chuan nau a pai thei lo va, a junior zawk erawh chuan pahnihna tur a pai mek bawk si. Senior zawk kha a hmanhmawh tawh hle a niang. Pastor hmaah khan a tap hawm hawm mai a ni. Chumi tum chuan tawngtai rualna nen kan bei ho va. Thla engemaw zah a liam hnu chuan a lo ruak ta bik lo va. Inhmuh pawhin a nui var var a, kan lawm tlang hle mai. Tawngtai chungchangah chuan Lal Isua khan ‘pahnih emaw…’ a ti kher kha a nia. Ringtu pungkhawm, Kohhran hovin lungrual taka kan dil ho hi a ropui ber tih hi ka pawm dan a ni. Mi thenkhat tawngtaina ropui bik deuh leh Pathianin a chhang bik deuh dawna zirtirna hi Thuthlung Tharah-ah hian hmuh tur a vang a ni. Hetiang thil nena rawngbawlna phei hi chu thu tling lem hlei lo nena rawngbawlna a ni hial lo vem ni, ka ti thin. Kut tling lova sum hmuh pawh tha kan tih loh chuan ‘thu tling lo’ hmanga Chanchin Tha hril fo hi a pawi theih ka ring. Chhandamna atana Isua rin leh rin loh nena a han kal kawp thin phei hi chu ngaihtuah nawn chi a ni. A issue a inang mawlh lo va, a tum a inang bawk lo. Chanchin Tha hi an tibawrhbang hialin ka hria. Boruak siam len nana theih apiang hman tum leh pawmzam thei kan nih chuan Thutaka inhruai luh hi kan tum ber a ni ang em? Ngaihtuah tur a va tam tak em!
Tunhma deuh kha chuan tawngtai dam thei te ngat chu rinna sang bik leh Thlarau lama dinhmun sang zual angtein ka lo hmu ve fo a. Tihdam leh dam loh lam hi thlarau nun tehna tur a nih lohzia te pawh ka hre chhuak ta zel a. Sakhaw dang pawh hian ‘tidam thei’ te hi an lo neiin an lo uar viau mai tih te pawh ka hre chhawm ve ta zel a. Tin, zirtirte meuh pawh khan mi an tidam reng bik lo tih te leh Paula pawh khan damdawi anga uain hmang turin a nau Timothea a fuih mai zawk thute nen lam ka ngaihtuah thiam ta a. ‘Ka rawn kal ang a, kan tawngtai dam mai dawn nia,’ emaw, ‘I dam thu lo puang ang che,’ emaw a ti lem lo tih chu Bible-ah pawh a lang chiang si a. Mipui hma emaw, social mediaah emaw tawngtai dam show ang maia han pho chhuah phei hi chuan a tum a thelh chiang awm mang e, ka ti. Pathian hnena tawngtaina hi publicity zawnna hmanrua tur a nih loh hmel mai piahlamah dam lo chunga Pathian hnathawh dan tur hre lawk tumah an awm dawn si lo.
*****
Comments
Post a Comment