𝐖𝐎𝐑𝐃 𝐎𝐅 𝐅𝐀𝐈𝐓𝐇 𝐙𝐈𝐑𝐓𝐈𝐑𝐍𝐀 𝐇𝐋𝐀𝐔𝐇𝐀𝐖𝐌

 

Mizo Kristiante hi boruak thar zawng reng mai kan ni a. Eng emaw tak a awm loh rei deuh hi chuan kan lung a leng a, boruak thar tawn kan chak ngawih ngawih thin. Chutiang boruak lo thlen thei reng reng chu kan hmu thlarau viau zel mai lehnghal a. A dik leh dik loh lam chhut chian aiin kan hlimpui tur lamin min kaihruai nasa a. Midangte vei luatah tui fim leh tui nu pawh thliar hleithei lo khawpin kan tang a. Pathian ring lo, Communist-ho, thupui hman rim, “The end justifies the means,” (a hmanrua dik leh dik loh chu a rah chhuah atanga teh a ni) tih Pathian ringtute duh loh em em thin chu hman kan chak fo a, kan fimkhur zo lo thin lo niin a lang. He kan panna lai tak hi a nuam kan tihna lai a ni a, Setanan hman tangkai a tum nasat tak leh kawng tam taka a lo hlawhtlinna ruam a ni tawh awm e.

Word of Faith chu eng nge?

Hetiang hi kan dinhmun a nih avangin Kristian zirtirna dik pangngaite chu kan hne hma hle a. Hmun dang ram danga mite sawi dan mak deuh deuhte pawh chawk luh tum phet kan awm thin a ni. A bik takin United States lam khu kawng engkimah kan ngaisang zual emaw a tih theih a. Kristianna lamah phei chuan a ti nasa ram an lo nih ve tlat avang te leh an tih dan phung celebrity culture thleng khuan kan ngaihsan zawng tak a nih tlat avangin a lar zual te khu kan hmu lian a. Ngaisangtu neih tam leh thutak kan hmet belhbawm a. Tihsual a awl em em a ni. Tunah pawh hian thangthar tam takin Word of Faith Movement an tih, Kohhran ziding zirtirna pangngai nena inmil miah lo, Pathian Thu thiam tam takin an vei leh a dik lohna an hai lan tawhte chu thangthar mi tam takin an tuipui leh ta a. Kohhran hruaitu leh ngaihtuahna hmang thiam deuh hlek tura ngaihte chuan kan chhut chian a tul hle mai. Word of Faith zirtirna chuan rinna thiltihtheihna chu kan tawngkaa kan puan chhuah ang zela kan chan turah a ngai a, Isua Krista thihna khan sum leh pai thlakchhamna leh taksa natna atangin min chhandam tel, tiin a zirtir thin. Chuvangin, sum leh paia hausak hi ringtu chanvo a ni a, natna leh hrehawmna atangin ringtu chu a fihlim tur a ni, an ti a ni ber. A tawi zawngin, ‘name it and claim it gospel’ an ti thin a. ‘Damna puan a, dam mai; tlakchhamna hauh bo mai’ te hi an zirtirna a ni.

Word of Faith hril thin chu tute nge?

He zirtirna mak danglam tak hi Mizote zingah a lang ve zuau zuau thin a. Kohhran zirtirna erawh chu he zirtirna atang hian a fihlim hneh hle awm e. Tunlai TV leh Youtube vela thu hril chak leh ngaihthlatu duh tam te tan heti zawnga thluk hi a hlawh viau niin a lang. Tin, Word of Faith thuhriltute hi tam tak an ni a, an style leh thu thluk dan pawh a danglam hret hret ang tih hria ila. Mi tam takin kan thlit fim theih loh avangin kan lo tuipui tawh bawk thin tih pawh pawm mai tur a ni. Evangelical Reformed Fellowship website–a Phillipines rama missionary hna thawk mek Dr Steve Curtis sawi danin Word of Faith thu hril thin te chu - Paul and Jan Crouch, Kenneth Hagin,  Kenneth and Gloria Copeland, Benny Hinn, Myles Munroe, Robert Tilton, Morris Cerullo, Joel Osteen, Paul Yonggi Cho, John Avanzini, Joyce Meyer, Frederick K. C. Price, Marilyn Hickey, Kathryn Kuhlman, Creflo Dollar, Charles Capp, Robert Schuller, Paula White, Jesse Duplantis, Dutch Sheets, Bill Johnson (http://www.erfm.org/word-of-faith-movement-a-doctrinal-critique.html). Tunlaia lar pawl tak Andrew Wommack leh Steven Furtick te hi a sawi tel lo ve teh mial. Hengte hian taksa damna leh sum leh paia hmuingilna tawktarhin Chanchin Tha ‘suak’ an hril a ni ber awm e. Kristian fimkhur lo tak chuan ngaihnawm leh pawmawm a ti ngawt thin ang tih chu a hriat theih mai bawk a.

An zirtirna laimu-ah eng nge awm?

Christian Apologist Hank Hanegraaf, zirtirna dik lo chin chhuahna lama hma la nasa tak hian kum 1993 daih tawh khan Christianity in Crisis tih lehkhabu ziakin Word of Faith zirtirtute thu sawi mak danglam takte chu a lo phawrh chhuak tawh a: Kenneth Copeland, “Setana khan krawsah Isua a hneh a ni,”; Morris Cerullo, “Morris Cerullo hi in lo en a ni lo – Pathian in en a ni zawk. Isua in en a ni,”; Benny Hinn, “ ‘I duhzawng a nih chuan…’ tiin Lalpa hnenah tawngtai ngai reng reng suh u. Chutiang rinna tichhetu tawngkam chu in ka atangin chhuak ngai suh se,”; Frederic KC Price, “Pathian chu he khawvelah hian mihring aiawha hna a thawh kan phalsak a ngai…A ni! Nangma thu thu a ni zawk! Tichuan, thununtu ber mihring a nih tawh chuan tunge thu nei ve tawh lo chu? Pathian,”; Kenneth E. Hagin, “Mihring kha Pathian tluka siam a ni a, Pathian hmaah te zawka inngai miah lovin a ding thei a ni,” (p, 11). Hei hi an thusawi duh dan thenkhat a ni a. A rapin a rapthlak zawk! Missionary Steve Curtis khan, “Word of Faith movement hi chu Kristianna, Christian Science, New Age leh Khawchhak lam sakhaw zirtirna phuah khawm a ni ber a. A zungpui atangin Pathian ngaih hniamna leh mihring dah sannain a intan a. A kalkawngah hian Chanchin Tha a her danglam vek a, mi nun a tichhe thin. Kohhran hian Isua zirtirte thu chah II Korinth 11:3,4 te, II Petera 2:1,2 te ngun taka chhiara a fimkhur nasat a ngai mang e,” a ti. An zirtirna tawi tea khai khawm tum chuan – (i) Pathianin rinnaa kan puan a piang a tih a ngai (ii) Mihringte hi Pathian te (little gods) kan ni, (iii) Pathian malsawmna chu hausakna leh hriselna-ah a lang chhuak, tih a ni a. Kristian zirtirna pangngai a hlat em avang hian aniang Christianity Today Magazine, Evangelist ropui Billy Grahama din ngat chuan, “Theology kal sual, Pathianin rinna hi sum leh paia hmuingilna-in mal a sawm thin tih zirtirna,” tiin a sawi hial                     (https://www.christianitytoday.com/ct/topics/p/prosperity-gospel/)          

Kan rinna hi kan ring tur nge Pathian kan ring tur zawk?

Word of Faith zirtirna hin rinna a sawi nasa hle. A sawi nasa mah mah a ni hial awm e! Pathian rinna ni lovin rinna zawka innghat rinna a sawi daih mai! Pathiana innghah ngam rinna aiin mihring rinna sawrbingna atanga thiltihtheihna hman tangkai lam zirtirin, rinna rin an zirtir! Kenneth Copeland chuan, “Rinna chu thiltihtheihna thapui a ni a…he rinna tel lo hian Pathianin i tan engmah a ti thei lo, a chhan pawh he rinna hi Pathian chakna lo chhuahna a ni si a,” a ti nia! Chu ‘rinna’ chu thiltihtheihna thapui, kan hman thiam phawt chuan engkim tih theihna lo ni ta a ni. Rin chuan taksa damna neih mai tur, rin chuan hausak mai tur! Rin loh chuan nat leh retheih! Pathian pawhin rinnain khawvel a siam a, chu rinna chu mihringte a pe a. Mahse chu chu mihring suala tluknain a tichhe tawh a, ringtuten kan neih let a ngai a ni, an ti thin. Han ngaihtuah chian chuan ‘rinna’ a sawi hi Pathiana innghat rinna ni lovin mihring rinna-a innghat rinna a ni. Word of Faith zirtiruten an zirtir ber chu rinnaa innghat rinna a ni ber a, Bible zirtirna erawh chuan rinna chu Pathian Thu-a innghah ngamna a ti thung. Rinna dikin a vawn chu ringtu rinna ni lovin Isua Krista-a Pathian kan hmuh hi a ni zawk a, Word of Faith ho rinna nen a danglam hle. Rinna chu duh duh tih theihna ‘magic power’ emaw, ‘super power’ emaw ang a ni mawlh lo ve. Westminster Seminary California Professor of Theology and Apologetics, theology lama kutchhuak tam tak nei tawh chuan 1990 daih tawh khan Word of Faith rinna ang chi, “Rinna innghat rinna hi chu milem biakna a ni e,” a ti thlawt (The Agony of Deceit, p. 146). Ani tho hian “Tunlai America ram nawmsip ringawt zawng, mahni indah hmasakna, hausak-thut-tum boruaka he Prosperity Gospel a piang hi a inhmeh thlawt. Kan nihpung chu dik takah chuan chhah tak kan ni a. Kan sakhuain min thlak danglam loh chuan keinin kan sakhua chu kan thlak danglam mai zawk dawn a ni,” a ti (The Agony of Deceit, p. 123)

Mawhphurhna kan nei lo maw?

Zoram Kristianna hmabak hi a ko hlein a lang. Tunlai media chak lutukah hian thut muan hun a awm lo a ni ber. Rinna kawnga hruaitu chan chang Pastor leh Upate tan hna a tam ta lehzual a ni mai awm e. Engtik lai pawhin zirtirna chi hrang hrang chu kan memberte phone leh TV-te a luhchilh mup mup mai a ni tih kan hria a. Kan mite hian chaw tha leh tha lo an thliar thiam lovang a, thliar thiam tura beisei tur pawh an ni lo. Amaherawhchu, kan Lalpa Isuan, “Ka beramte chawm rawh,”(Johana 21:15) a tihte hi chuan mawhphurhna pawimawh lutuk kan nei a ni tih kan hriat a tul. Thian pakhat tawngkama, ‘Amenzeli’ leh ‘Amenzela’ nih ringawt hi Berampu tha nihna nen chuan inkalh tak a ni ang. Tui lian anga zirtirna chi hrang hrangin min chim san telh telh lai hian puan ven sawi chhingin tan i han la tak tak teh ang u. Chanchin Tha hlu chung chuangin kan ram a rawn tihen tawh hnu hian ‘Chanchin Tha suak’ Word of Faith zirtirna, Prosperity Gospel, an tih bawk te ang lakah hian kan beramte i hum hram hram teh ang u.

 

*****