𝗕𝗜𝗕𝗟𝗘 𝗦𝗧𝗨𝗗𝗬: 𝗜𝗡𝗧𝗛𝗔𝗪𝗜𝗡𝗔 𝗡𝗨𝗡𝗚 (𝗥𝗢𝗠 𝟭𝟮:𝟭,𝟮)

Kum a lo thar hian rilru thar put kan duh fo thin a. Thil duhawm tawk lo kan nuna awm zawng zawng – kan thu ngeia kan lo pal sual leh kan lo tawn buak tawh bakah kan duh thu ni miah lova kan chunga thil tha lo thleng zawng zawng te – kum hluiin liam bo pui vek se kan ti ngawih ngawih thin a ni. Chutih rualin hun thar tha zawk rawn inher chhuak se kan ti bawk a. Pu James Dokhuma sawi danin hun chu danglam lova pangngai reng a, a danglam zawk chu keimahni pawh ni teh reng ila, a hma aia tha zawk beiseina nen hmalam hun kan thlir zel a nih hi. Chu thil chuan mifing chu tan la thar turin a ko a, puan ven sawi chhinga inhum ruh sauh sauh turin a nawr thin.

𝗖𝗵𝘂𝘃𝗮𝗻𝗴𝗶𝗻…

Rom lehkhathawn hi bung 16 laia sei a nih avangin bung 12-na chu a tawp lam a ni tawh tih a hriat a. He lehkhathawn a ziah lai hian Paula hian Rom a la tlawh lo va. Kohhran changtlung tak a ding tawh tih a hriat avangin Chhandamna thu hrilhfiah turin a ziak ta a ni awm e. Chuvangin Bible-a Chhandamna Chanchin Tha chungchang ziah chipchiarna ber a lo ni ta. A tirah Chanchin Tha chu mi zawng zawng tana chhandamna a nih avanga a zahpui lohzia a sawi tan chho nghal a. Mihring sualna – tumah mi fel tak reng an awm loh thu, rinna avang chauha khawngaihnaa chhandam thu, mihring hlui baptis a nih a mihring thara thawh leh thu, hringnuna sual leh tha insual thin chungchang, Thlarau Thianghlim avanga sual hnehna nun, Pathianin a thlan leh ruatlawkte chanchin, etc., a sawi vek hnuah bung 12-na a lo thleng ta a, ‘Chuvangin,” a ti ta a ni. Bung 1-11 a kan hmuh thil ropui em em avang hian, “Heti hian lo awm ang che u aw,” a ti ta a ni.

𝗣𝗮𝘁𝗵𝗶𝗮𝗻 𝘇𝗮𝗵𝗻𝗴𝗮𝗶𝗵𝗻𝗮…

Mizo Bible-ah chuan ‘Pathian khawngaihna avang hian…” tia dah a ni a, Saptawng Bible lehlin tam zawkah chuan helaia 'khawngaihna' hi ‘mercy’ (zahngaihna) tiin an dah zawk a. A tawngkam hi Gk. 𝘰𝘪𝘬𝘵𝘪𝘳𝘮𝘰𝘴 a ni a, ‘zahngaihna’ hi a hnaih zawk awm e. ‘Khawngaihna’ kan hmang dawn a nih pawhin kan hriat thiam pangngai Gk. 𝘤𝘩𝘢𝘳𝘪𝘴 (phu loh malsawmna) kha ni lovin mi chan chhia kan lainatna (compassion) lam sawina kha a ni zawkin a lang. ‘Pathianin min lainat em a, kan chunga zah a ngaih avang hian,’ a tihnaah ngai ta ila a dikin a rinawm. Pathian hmangaihna ropui hi mihringte chungah ‘Khawngaihna’ leh ‘Zahngaihna’ angin a luang chhuak a. Khawngaihna chuan ‘phu loh malsawmna’ a kawh laiin zahngaihna erawh chuan ‘phu anga hrem loh’ lam a kawk thung. Hmangaihna sawina ve ve a ni. Khawngaihnain kan chan loh tawp tur min pek laiin, zahngaihna erawh chuan kan phu ngawih ngawih hremna kha min tuartir ta lo a ni. Chuvangin, hemi changin a sawi tum chu, “Kan phu anga Pathian hremna chu dawng lo va, min lainat em avanga Chhandamna min chantir zawk takah chuan…” tiin inthawina nung hlan turin min ko ta a nih hi. Kristian nun sawi dan tawi ber chu ‘Khin zawh rual loh hmangaihna kan lama luang chhuak si khin letna’ a ni mai awm asin.

‘𝗜𝗻𝘁𝗵𝗮𝘄𝗶𝗻𝗮 𝗻𝘂𝗻𝗴’

Thuthlung Hluia an inthawinaah chuan ran an hlan thin a. Chutiang ran chu ‘sawisel bo’ tur a ni lehnghal. Chu ran (bawng/beram/thuro) chu puithiamin a lo talh a, maichamah Pathian tan an halral ta thin a ni. A awmzia chu Thuthlung Hlui inthawina chu ran tihhlum tawh hmanga inthawina a ni a. Meia halral tur chi a ni. Chu halral thil hlan chu Lalpan a lo pawm thin a ni. Thuthlung Thara ringtute inthawina tur erawh chu talh ngai tawh lo, nung reng kan taksa ngei hlana inthawina a ni a. Chu chu ‘inthawina nung leh thianghlim leh Pathian lawmtlak’ chu a ni ta a ni. ‘Lei taksa boral mekah hian Isua hmel duhawm lang zel se,’ tih hla hian a phawk fuh hle a ni. Kalvari tlanga Pathian Fapa inthawina avang chuan Pathian zahngaihna ringtute lamah a lang ta a. Chumi avang chuan ringtu tinte inthawina chu ran thisen chhuah zawng ni ta lovin, he lei maicham chunga Pathian ropuina atana ni tina kan taksa hlan hi a ni ta zawk. He khawvela a tul tul thawk mawlh mawlh a, lei mite nena inchiahpiah reng chung leh kil tin thleng phaa ‘thianghlim leh Pathian lawmtlak’ ni tura kan taksa chu he lei maichama kang ral zel tur ‘inthawina nung’ atana kan Lalpa tana hlan lam a ni tawh zawk a ni. ‘He khawvelah hian kan ralin lo awm tawh zawk rawh u,’ a tihna a ni hial awm e.

𝗧𝗮𝗸𝘀𝗮 𝘁𝗵𝗶𝗹 𝗮 𝘁𝗵𝗹𝗮𝗿𝗮𝘂 𝗯𝗲𝗿

Chutiang taka he lei maichama ‘inthawina nung’ atana inhlan chu Mizo Bible hman pangngai chuan “in rawngbawlna awm reng a ni,” tiin a sawi a, Lehlin Thar thung chuan peh hel leh thu khuh tum vak lovin, “chu chu in rawngbawl dan tur tak chu a ni e,” tiin a hrilh tlang hmiah mai thung. Bung 1-11 –a Chhandamna duhawm tak kha kan chanvoa kan ngaih ve chuan kan rawngbawl dan tur chu a chiang e - ‘inthawina nung leh thianghlim leh Pathian lawmtlak ni tura kan taksa hlan’- a ni tawp mai. Tlan chhiat san leh peh hel deuh a kawk lo hle tih a hriat theih. ‘Ka chhandamna hi a bo leh thei em? Bo lo ang em? Hei hi Pathianin a phal em? Phal lo em?’ tih thuartham a kawk lo. Bung 12-ah chuan ‘I rawngbawl dan tur chu inhlan ralna a ni’ a ti mai a nih hi. Hetah chiah hian Saptawng Bible leh Mizo Bible te thu dah dan danglamna a rawn fiah leh kawk mai a. English Bible-ah chuan ‘your spiritual act of worship’ tih te, ‘spiritual worship’ tih te hi an dah dan tlangpui a ni a. A Grik tawng lamah chuan Mizo tawnga dah dan hi dik thei tho mah se Paula zirtirna pumpui atanga ngaihtuah chuan Sap Biblea an dah dan hi a fiah fak mai awm asin. Rom lehkhathawn ziaktupa hian Pathian tana taksa hlanna chu ‘thlarauva Pathian in biak dan tur dik tak a ni’ a ti mai a nih chu. A chiang khawp mai. Mizo Kristianten ‘rau leh rau lo’ kan buaipui rei ta e. Rau leh rau lovin min then a tum rei lu deuh ta e. Thangtharte chu i fing tawh ang u. A rau ber chu kan taksa ngei ‘inthawina nung leh thianghlim leh Pathian lawmtlak’ ni tura hlan hi a ni tih a chiang a ni.

𝗧𝗮𝘄𝗺𝗽𝘂𝗶 𝗹𝗼𝗵 𝗮 𝗽𝗮𝘄𝗶𝗺𝗮𝘄𝗵 𝗯𝗮𝘄𝗸

Chutianga inthawina nung atana kan taksa hlan leh he khawvel dan hi a inmil theih thlawt loh avangin “Tunlai khawvel dan ang hi tawm suh u” a ti leh chat mai a. Kan rilru tihthara awma kan nunphung danglam vek turin min hrilh bawk a. Heta ‘tihthar’ a tih pawh hi a awm sa chawh thar (reform) lam aiin a hlui a thara thlak hlawk (transform) lam a sawina a ni. Chhinchhiah tlak tak mai chu he rilru thar kan neih hnuah chauh hian a ni ‘Pathian duhzawng, tha leh lawm tlak leh that famkim’ hi kan hriatthiama, kan hmuh thiam dawn ni. Kan rilru tihtharin a awm tak avangin nunphung thar kan nei ta a, chumi nunphung danglam chuan khawvel dan a tawmpui tur a ni tawh lo. Chung zawng zawng chu ‘thlarauva rawngbawl dan’ nen khan a inmil vek a ni.

Inthawina maicham chunga an hal khan a chhehvel thil kha a tawmpui lem lo a, a kang ral raih mai a ni. He inthawina nung pawh hian he khawvel dan ang hi a tawmpui tur a ni lo a, lei chungah hian tisa thil chu a kang ral ve mai tur a ni ang. He khawvel rilru hi chuan midangte chungtlak, mahni inchhekarbawm, a nuam thei ang bera khawsak leh chapopui tur a zawng ngar ngar a, rilru thar erawh chuan Krista chungnunna, mahni intihtlawmna, midangte rawngbawlsakna leh Pathian hmangaihna chen a tum tlat thung thin a ni si a. Khawvel rilru chuan mahni san nan midangte tihhniam a hreh lo va, mahni hmingthat nan midangte tihhmingchhiat a tim ngai lo; thil tha a hmuhin pumbilh a chak a, thil hlawk a hriatin a zep thin bawk a, ama channa tur hlek a tel chuan midang a itsik mai thin a ni. Rilru thar erawh chuan midangte nena san ho a hreh ngai lo va, midangte an hmingthat nan a bei a, thil tha ber a duhsak zel avangin a lar lo zawk nih a hreh ngai lo. Chumi rilru atang chuan inthawina nung atana taksa hlanna chu a lo awm thei ta a ni.

"𝐶ℎ𝑢𝑣𝑎𝑛𝑔𝑖𝑛, 𝑢𝑛𝑎𝑢𝑡𝑒 𝑢, 𝑃𝑎𝑡ℎ𝑖𝑎𝑛 𝑘ℎ𝑎𝑤𝑛𝑔𝑎𝑖ℎ𝑛𝑎 𝑎𝑣𝑎𝑛𝑔 ℎ𝑖𝑎𝑛, 𝑖𝑛𝑡ℎ𝑎𝑤𝑖𝑛𝑎 𝑛𝑢𝑛𝑔 𝑙𝑒ℎ 𝑡ℎ𝑖𝑎𝑛𝑔ℎ𝑙𝑖𝑚, 𝑃𝑎𝑡ℎ𝑖𝑎𝑛 𝑙𝑎𝑤𝑚 𝑡𝑙𝑎𝑘 𝑛𝑖 𝑡𝑢𝑟𝑖𝑛 𝑖𝑛 𝑡𝑎𝑘𝑠𝑎 𝑐ℎ𝑢 𝑎 ℎ𝑛𝑒𝑛𝑎 ℎ𝑙𝑎𝑛 𝑡𝑢𝑟𝑖𝑛 𝑘𝑎 𝑛𝑔𝑒𝑛 𝑎 𝑐ℎ𝑒 𝑢, 𝑐ℎ𝑢𝑡𝑖𝑎𝑛𝑔 𝑐ℎ𝑢 𝑖𝑛 𝑟𝑎𝑤𝑛𝑔𝑏𝑎𝑤𝑙 𝑑𝑎𝑛 𝑡𝑢𝑟 𝑡𝑎𝑘 𝑎 𝑛𝑖 𝑒. 𝑇𝑢𝑛𝑙𝑎𝑖 𝑘ℎ𝑎𝑤𝑣𝑒𝑙 𝑎𝑤𝑚 𝑑𝑎𝑛 𝑎𝑛𝑔 ℎ𝑖 𝑡𝑎𝑤𝑚 𝑠𝑢ℎ 𝑢; 𝑖𝑛 𝑛𝑢𝑛 𝑝ℎ𝑢𝑛𝑔 𝑐ℎ𝑢, 𝑖𝑛 𝑟𝑖𝑙𝑟𝑢 𝑡𝑖ℎ𝑡ℎ𝑎𝑟𝑎 𝑎𝑤𝑚𝑖𝑛, 𝑡𝑖ℎ𝑑𝑎𝑛𝑔𝑙𝑎𝑚 𝑛𝑖 𝑣𝑒𝑘 𝑟𝑎𝑤ℎ 𝑠𝑒; 𝑡𝑖𝑐ℎ𝑢𝑎𝑛, 𝑃𝑎𝑡ℎ𝑖𝑎𝑛 𝑑𝑢ℎ𝑧𝑎𝑤𝑛𝑔, 𝑡ℎ𝑎 𝑙𝑒ℎ 𝑙𝑎𝑤𝑚 𝑡𝑙𝑎𝑘 𝑙𝑒ℎ 𝑡ℎ𝑎𝑡 𝑓𝑎𝑚𝑘𝑖𝑚 𝑐ℎ𝑢 𝑖𝑛 ℎ𝑟𝑒 𝑡ℎ𝑖𝑎𝑚 𝑡ℎ𝑒𝑖 𝑎𝑛𝑔." (𝑅𝑜𝑚 12:1,2).

*****