𝟮𝟬𝟮𝟭: 𝗞𝗨𝗠 𝗟𝗨𝗡𝗚𝗖𝗛𝗛𝗜𝗔𝗧𝗧𝗛𝗟𝗔𝗞

Covid-19 chungchangah chuan hmasawnna awm hret hretin, nikum hmasa lam ai chuan 2021-ah zalen viau tawh mah ila, kum lungchhiat zawk a nih dan a awm nualin a lang. Kristiante dinhmun atanga thlirin chu chu a chiang lehzualin a hriat theih a. India ram sorkar leh khawtlang boruakah sakhaw zalenna a kiam telh telh a, hmarchhak meuh pawh a rawn thleng tituai tawh a ni tih kan hriat theuh tul tawh a ni. Tun hma atang pawhin sakhaw dang betute kara khawsa leh rawngbawl Kristiante tan harsatna a awm neuh neuh thin tih chu tu hai rual a ni lo. Mahse, India ram pumpui thlira hluar lam a pan zel mai leh state leh sorkar laipuiin a beng a chhu ngawng tlata hriatna hian a ti-lungchhiatthlak lehzual a ni.

𝗞𝗿𝗶𝘀𝘁𝗶𝗮𝗻𝘁𝗲 𝗰𝗵𝘂𝗻𝗴𝗮 𝗵𝗹𝗲𝗶𝗹𝗲𝗻 𝗻𝗮𝘀𝗮𝘁 𝗯𝗲𝗿 𝗸𝘂𝗺

United Christian Forum-in a report danin

Kristiante chunga hleilenna hi 2014 atang khan a zual zel a, pandemic kan chhawrna emaw tih theiha 2020 kumah tlema a tlak hniam laiin 2021-ah chuan a rawn pung hlut mai a. A hma kuma tum 279 chu nikumah chuan 486 a rawn ni chho ta dawrh mai a ni. Pawl thenkhat phei chuan tum 500 chuang a awm an ti. Kum tawp lamah a pung hlut mai pawh hi ngaihtuahna tithui tak a ni. Kristiante hun puia tihbuai an tum hrim hrim emaw tih theih hial turin Krismas ni takah khan hleilenna thleng hmun 16-ah a awm niin an sawi. Hmar lam state Uttar Pradesh, Chhastisgarh, Jarkhand leh Madhya Pradesh-ah ringawt tum 274 lai a thleng a. Heta tang hian ‘Hindu Heartland’ an tihah phei hi chuan Kristian nih a harsa telh telh a ni tih a hriat theih mai a ni.

𝗧𝗵𝗶𝗹 𝘁𝗵𝗮𝗿 𝗱𝘂𝗵𝗮𝘄𝗺 𝗹𝗼 𝘁𝗮𝗸

Kumina thil langsar tak duhawm lo tak mai chu India chhim lam Karnataka-ah Kristiante chunga hleilenna a hluar ta riau mai khu a ni a. Tum 59 lai an record a, Bible an hal lai video-te pawh a rawn darh chuai chuai a nih kha. Karnataka state hian Sakhaw Inleh Khapna dan Dec 23 khan an pass tawh tih hria ila. South India lam hi Kristian tamna hmun leh hman lai atanga an lo inbun nghehna a ni a, heti taka Karnataka state-a kut an tuar tam ta hi a pawi hle a ni. Thil hriat hrehawm tak thin chu thuneitute leh dan kengkawhtuten lehlam hawisan ang deuhthawa an hum zo lo tlat thin hi a ni a. Anni hian thil tisualtute man ngei tumin tan han la thin se chuan a zia awm hle a beisei theih UCF thuchhuak chuan a sawi.

𝗜𝗻𝗱𝗶𝗮 𝗵𝗺𝗮𝗿𝗰𝗵𝗵𝗮𝗸 𝗮 𝗹𝗮𝗻𝗴 𝘁𝗮 𝘁𝗹𝗮𝘁

Tun hma chuan Kristian tihduhdahnaah hian India hmarchhak hi a lang ngai lo va. Nikumah chuan Assamah tum 1 a lang ve tlat mai. A pawi hle a ni. Assamah hian Kristian leh Muslimte an chep sawt viau a, boruak neuh neuh a awm thin thu an sawi. Tin, Bangladesha Hindu hovin an tuar avangin Tripura-ah Muslim ho biak in (Mosque) 4, dawr 6 leh in 2 tihchhiat a ni a. Hetianga kan kawtchhuah meuhah pawh sakhaw zalenna nuai bo duhna hnuhma a lang ta zel mai hi ngaihtuah chian a pawimawh hle mai. A kaikuang kan zawna, kan theih ang anga kan tang ve a nih loh chuan nakinah a la pawi lutuk ang tih a hlauhawm a ni. India ram zepui pakhat ‘secularism’ chu lehkhaah inziak kelh kulh mah se a tak ramah chuan nek chepin a awm mek tih a hriat telh telh si a. Hetih laia mahni tanghma haina ni ngei tura puh theihin mi thenkhatin an lo mawngzawmpui hi chu Kristiante tan a inhmeh lo takzet a ni.

𝗠𝗶𝘀𝘀𝗶𝗼𝗻𝗮𝗿𝘆 𝗼𝗳 𝗖𝗵𝗮𝗿𝗶𝘁𝗶𝗲𝘀 𝘁𝗲 𝗯𝘂𝗮𝗶𝗻𝗮

Vadodara, Gujarat-a Mother Teresa-i pawl Missionaries of Charity (MoC) te chungah FIR an theh lut riap mai a. Mite mak tih a hlawh hle a ni. MoC te hi tu sawisel rual lohva ngaih deuhthaw an ni a. Mi chhumchhe ber berte tana an rawngbawlna hi khawvel pumpuiin a hriatpui a ni si a. Sakhaw inlehna dik lo taka kalpui thinin an puh chhe hle a ni. ‘Forced Conversion’ case hi sawi thin mah se India ram khawiah mah hian hetiang tia thiam loh chang hi an la awm lo a ni awm e. Vadodara-a FIR an thehluh atanga kar 2 hnuah chuan Office Pui lamah buaina a thleng zui a. MoC-in foreign tanpuina an hmuh thin chu an ‘block’ (hman theih lovin an dah) ta riap mai a, FCRA (foreign tanpuina dawn phalna) renew mumal loh vang niin an sawi. He thil phei hi chuan khawvel a deng dawt a ni ber mai. Missionaries of Charity te enkawl mi 22,000 te hmakhua ngai lovin an puh chhe lo thei lo. Sakhaw dang do ho hian FCRA dan hi an chelek nasa hle, hemi dan an siam kherkhiap tak hmang hian an lawm loh zawng rep ro an tum thin ni ngei tur a ni. Missionaries of Charity te FCRA chu tunah chuan an tinung leh tawh tih pawh hre nghal ila.

𝗧𝗵𝘂 𝗮 𝗿𝘂𝗺 𝗰𝗵𝗵𝘂𝗻𝘇𝗮𝘄𝗺 𝗵𝗹𝗲 𝗺𝗮𝗶

‘India ram hi puana hmai khuh thin Muslim leh Kristiante laka tihzalen’ hi an tum niin BJP MLA pakhat chuan hman deuh lawk khan Madhya Pradeshah mipui hmaah a sawi riap riap mai. Chumi hma thla 2 velah Surguja district, Chhattisgarh-ah mi 1000 vel ‘Sakhaw Inleh tihtawp ni rawh se,’ tiin an kal khawm bawk a. Parmatmanand Maharaj, an hotu pakhat chuan pungkhawm ho chu ‘hrei nena inthuama sakhaw inlehtir ching Kristiante chu bei turin’ a fuih a ni awm e. Hre loten an hriat ve theih nana Chanchin Tha hriltute hun thimin a nang zel a ni. Sudarshan News Editor-in-Chief Suresh Chavhanke chuan, “He ram hi Hindu Rashtra (Hindu ram) –a siam turin kan thawk tawp thlengin kan bei ang a, a tul chuan kan nunna kan hlan ang a, midang nunna pawh kan la mai ang,” tiin Hindutva group pakhat Hindu Yuva Vahini intawh khawmna pakhat Delhi hmuna December 19-a neihah a au chhuak bawk a, midangte pawh thu a tiamtir nual hlawm a ni awm e. He thil thleng avang hian social media lamah erawh chuan beih let a tawk nasa hle a ni awm e.

𝗦𝗮𝗸𝗵𝗮𝘄 𝘁𝗵𝗶𝗹 𝗽𝗶𝗮𝗵 𝗹𝗮𝗺

Human Rights Activist leh Writer Cedric Prakash chuan Indian Currents-a a article “A Year of Agony for Christians” tihah chuan tunlai India ramah hian Fascism (democracy nih dan phung kalha hnam lak vung leh ngaihdan dang neite rahbehna) zia 14 political scientist Dr Lawrence Britt-an 2003-a a chhawpchhuah ang chi kan a awm kim vek niin a sawi. Chung zingah chuan – midangte dikna chanvo namnulna, duh loh zawngte hmuh sakhina leh chhuah chhiat phet tumna, Mass Media control, sakhua leh sorkar kaihkawp tlat, sangawizawn pawlte hleihluak taka vulh, te a tel. Cedric Prakash chuan, “Vawiina India rama thil thleng mek hi Kristian emaw, Muslim emaw chungchang mai a ni lo va, kan Constitution: India ram nihna thuk ber chungchang a ni. He ramah hian mi chi hrang hrang kan len leh len loh chungchang a ni a. Dikna, zalenna, intluktlanna leh nunhona chungchang a ni…Constitutiona thu inphum chungchang … democracy chungchang a ni,” a ti ngawih ngawih mai. Kan hmuhpui phak a va pawimawh tehlul em!

*****