𝗞𝗥𝗜𝗦𝗧𝗜𝗔𝗡𝗧𝗘 𝗟𝗘𝗛 𝗔𝗡 𝗖𝗛𝗘𝗡𝗡𝗔 𝗞𝗛𝗔𝗪𝗩𝗘𝗟

Tunlai khawvelah hian sakhaw ngaihhlutna hi a tlahniam nasa hle tawh tih mithiamte chuan an sawi thin. Chu chu sakhaw mite zingah a nih laiin, Pathian awm ringlo (Atheist) te zingah a ni nasa zual. Kum 2001-a World Trade Center an sutchhiat hnuah phei kha chuan Sakhua hi buaina thlentu anga ngai an tam ta hle a. Firfiak pawl rapthlak tak takin an che thin bawk si nen. ‘Sakhua kan mamawh lo, sakhua hi buaina thlentu a ni zawk,’ tih hi thangtharte tuh an tum ber a ni. Ziaktu lâr tak Salman Rushdie chuan, “Sakhua hi hmanlaia mihring mawl lai thil a ni a, tunlai indona hmanraw tha ber ber nena an tan kawp chuan thil hlauhawm tak a ni thei…Ngaihdan dang zawng zawng ang thovin sakhua hi zir chian, sawisel leh a tul chuan inthlahrung hauh lova kan endawng pawh a phu,” a ti. Thangthar tam tak chu sakhua hi thil hnawksak, Pathian hi awmze awm lo angah an ngai a. Hriatna tihpun nan science an duh tawk a, nun hona atan pawh sorkar tha neih chu a tawkah an ngai tawh a ni.

𝗣𝗮𝘁𝗵𝗶𝗮𝗻 𝗻𝗴𝗮𝗶𝗵𝘀𝗮𝗸 𝗹𝗼𝗵𝗻𝗮

Pathian awm an ring lo mai ni lovin, Pathian awm hi an duh lo va, an do a, sum sengin Pathian awm lohzia an campaign thin. Kum 1979-a Physics-a Nobel Prize dawng hial Steven Weinberg chuan, “Sakhua emaw, khua lo emaw, mi tha chuan thil tha a ti zel ang a, mi sual chuan thil sual a ti zel ang. Mahse, mi thain thil sual a tih theih nân chuan sakhua zuitu nih a ngai,” tiin sakhua a deu hle. Midangin, “Rilrua virus awm zingah sakhua virus hi a thi har ber,” a lo ti hial bawk. Mizo Upate chuan, “Sakhuain a ngêk a hlawh,” an lo ti hin a. Tunlai khawvelah chuan a ‘ngêk’ pawh a hlawh zo tawh lo a ni ber e.

Kristian ram nia chhâl thin leh thawh hlawk ber USA -ah meuh pawh Kristian an chêp sawt hle a. Homosexuality hian huhang a ngah dawn hle. Mipa leh mipa inneih te, hmeichhia leh hmeichhia inneih te an phal tawh avangin chutiang dotu leh duh lotu chu hnawksak an chang zel mai a. Lo inneihtir duh lote pawh court-a hek an ni thei tlat tawh a ni. Pastor pawh an chêp zel dawn. Kristiante chu midangte ngaithei lo, hnawksak angin an ngai zel dawn a ni ber mai. Heng zawng zawng avang hian Pastor ropui tak Erwin Lutzer chuan, “Awm mai mai Kristian nih hun chu a tawp tawh. Thutlukna harsa tak siam a ngaih loh beisei a, mi tihdan phung zui ve mai mai a theih tawh dawn loh a ni,” tiin a au chhuak tawh a ni.

Hei hi ngaihtuah teh. Hmanlai chuan Kristian ram chu ram hausa an ni a, chu chuan Kristianna pawh kawng tam takah chhanin ngaihsan pawh a hlawhtir a. Tunah erawh chuan Kristian ram changkangin Kristianna an hlat telh telh a. Tun atanga rei loteah chuan Kristian lo (Atheist ram) China hi ram hausa ber a nih loh pawhin a lian hle tawh ang a, Kristian ram kan tih khawthlangahte chuan tuna ringtu rinawm tam tak hi mual an liam tawh ang a, Islamin khawvel hi Muslim rama siam tumin thih ngam lupuin a bei reng bawk si.

𝗘𝗻𝗴𝘁𝗶𝗻𝗻𝗴𝗲 𝗻𝗶 𝘇𝗲𝗹 𝗮𝗻𝗴 𝗹𝗲?

India ramah pawh hian eng nge kan dinhmun tur ni zel ang aw? Thenkhat chuan, “Muslim nih ai chuan bawng nih a him zawk,” an ti leh tawh. Bawng talh nia puh Muslim an that duh tlat a. “Yoga hi sorkar sikul zawng zawnga zir tur a ni,” an rawn ti ut ut tawh chu a nih hi. Keini’n ringlo Chanchin Tha hrilh kan buaipui viau lai hian ‘Sakhaw Inlehna’ (Conversion) hi thil tha lo leh tul lova ngai taka ngai a, tih loh tawp tura ngai an tam telh telh. State 9-in hemi chungchangah dan khirkhiap tak tak an nei bawk. India ram pumpui huapa Anti-Conversion law dan siam duhna te pawh a ri tawh a ni.

𝗞𝗵𝗮𝘄𝘃𝗲𝗹 𝗖𝗵𝗮̂𝗸𝗻𝗮

Pathian awm ringlo ho chuan engang pawhin sakhua chu lo sawisel pawh ni se. A awm ringte pawh hian Pathian hi kan la serious lo sawt khawp mai. Pathian hi Pathian a nihna angin engkim mai hmaah hian a awm tur niawm tak a ni a. Kan nun laihrui vuantu atana hman harsa kan ti. Mahni châkna lam, kan nawmna tur, min tihlim tur atan chuan pawi kan ti lo a nih hi.

Tunlai khawvel hi intihhlim khawvel a ni a, midangte duhzawng ti thiam thiam an hausa a ni mai. Entertainment hi kan thil duh ber a nih hi. Kan nawmna tur hian kan rilru a luah ber mai. Chu chu Kristiannaah pawh hian kan lalût tlatin a hriat thin. Entirnan, khawvela Football pêt thiam ber Lionel Messi chuan thla khatah Rs. 290,855,583/- vel a hlawh an tih chu! A va han tam hem hem ve le aw. Enge a thiam? Eng dang ni lovin savun mum chawhkawi leh um a thiam hle a ni mai. A ho zawnga sawi chuan ho tak a ni. Thil dang a awm miah lo. Han khaikhin teh. Tunhma atanga ‘noble job’ an lo tih hna zahawm tak Zirtirtu hna hi. Midangte dinhmun siamtu, dinhmun thaa hlangkaitu hna a ni. Tunlai khawvela Sorkar High School zirtirtu hlawh pangngai leh private school teacher te hlawh nen han khaikhin ila kan thaw awk awk mai awm e. Ball mum um mai mai leh zirtir hna chu a inhlut hleih tehreng nen hlawh a va han intam hleih ve le. Engvanginnge a hlawh tam em em? Mite hmuhnawm tih zawng a thiam avang a ni mai. Mite a ‘entertain’ thiam avang khan…entertainment chu kan thupui ber a ni si a.

𝗔 𝗹𝗮𝗶𝗺𝘂

Hei hi sakhaw nunah pawh kan chawlut deuh tlat. Min tinuam zirtirna, min tihlim thu kan duh ngawih ngawih a; rilru leh taksaa kan nawm chem chemna tur zawngin Thlarau nia kan hriat kan um luih luih a nih deuh ber hi. America ram Pastor naupang te David Platt hi ngaihsanawm ka ti khawp mai. Sap Kristian ho pawh a thoh nasa a: “Eng nge Kristiante thuchah chu? Pathianin keimah min hmangaih êm avangin a Fapa Isua Krista keima tana thi turin min pe a ni. He thu hi a ropui hle lai hian Bible thu a ni em aw? Pathianin Keimah min hmangaih. Keimah. Kristian sakhaw tum ber chu Keimah mawle. Heti a nih avang hian kohhran zawm tur ka zawn hunah keima duhzawng music tumna hmun, program pawh kei leh ka chhungte duhzawng ngei ka ûm thin. Ka hmalam hun tur leh ka nun ka duan lawk pawhin keima tana nuam ber tur leh tha ber tur nia ka hriat angin ka siam thin. In sak ka tum, car lei ka tum, thawmhnaw lei ka tum, kan nun tum dan hrim hrimah Keima tana nuam ber tur nia ka hriat danin thuthlukna ka siam thin. Mahse, chu chu Biblein a zirtir Kristian sakhua chu a ni lo. Keimahni tan chauh anga ngaiha, ‘Pathianin min hmangaih’ tih tuah hum ringawt mai hi Bible zirtirna dik a ni lo. Bible thu anga kan sawi dawn chuan hei hi a ni, ‘Pathian chuan Ama duhzawng, Ama chhandamna, Ama ropuina, te chu khawvel hmaa ka tihlan theihna turin keimah hi min hmangaih a ni,’ tih hi. Tichuan, Pathian chu kan rinna thiltum ber a lo ni a, Kristianna chu Amahah a inphuar vek vek a. Keini chu Chanchin Tha tum ber kan ni lo va. Chanchin Thain a tum ber chu Pathian a ni si a. Chhandamnaah ngat pawh hian Pathian chuan a lailum a inchantir tlat. Ezekiela thuchah ngaithla teh: Min chhandam, keimahni tan ni lovin, Ama hming thianghlim tan a ni. Chhandam kan nih chhan chu A hming ram zawng zawnga a puan chhuah a nih theih nan a ni a. Pathianin Ama tan min hmangaih mai a ni.” Kan Pathian Thu thluk dante hi a inang lo mang e maw.

“𝑃𝑎𝑡ℎ𝑖𝑎𝑛 𝑛𝑔𝑎𝑖ℎ𝑠𝑎𝑘 𝑙𝑜ℎ𝑛𝑎 𝑙𝑒ℎ 𝑘ℎ𝑎𝑤𝑣𝑒𝑙 𝑐ℎ𝑎𝑛𝑡𝑒 𝑏𝑎𝑛𝑠𝑎𝑛𝑖𝑛, 𝑡𝑢𝑛 𝑙𝑎𝑖 𝑘ℎ𝑎𝑤𝑣𝑒𝑙𝑎ℎ ℎ𝑖𝑎𝑛 𝑖𝑛𝑠𝑢𝑚 𝑙𝑒ℎ 𝑓𝑒𝑙 𝑡𝑎𝑘 𝑙𝑒ℎ 𝑃𝑎𝑡ℎ𝑖𝑎𝑛 𝑛𝑔𝑎𝑖ℎ𝑠𝑎𝑘𝑖𝑛 𝑘𝑎𝑛 𝑎𝑤𝑚 𝑡𝑢𝑟 𝑎 𝑛𝑖 𝑡𝑖ℎ 𝑚𝑖𝑛 𝑧𝑖𝑟𝑡𝑖𝑟 𝑎. 𝐴𝑛𝑖 𝑐ℎ𝑢𝑎𝑛 𝑏𝑎𝑤ℎ𝑐ℎℎ𝑖𝑎𝑡𝑛𝑎 𝑧𝑎𝑤𝑛𝑔 𝑧𝑎𝑤𝑛𝑔 𝑙𝑎𝑘 𝑎𝑡𝑎 𝑚𝑖𝑛 𝑡𝑙𝑎𝑛 𝑡ℎ𝑒𝑖ℎ𝑛𝑎 𝑡𝑢𝑟 𝑙𝑒ℎ, 𝑐ℎ𝑖 𝑡ℎ𝑙𝑎𝑛 𝑏𝑖𝑘, 𝑡ℎ𝑖𝑙 𝑡ℎ𝑎 𝑡𝑖ℎ𝑎 𝑡ℎ𝑎ℎ𝑛𝑒𝑚𝑛𝑔𝑎𝑖, 𝑎𝑚𝑎 𝑡𝑎𝑛𝑎 𝑎 𝑡𝑖ℎ𝑡ℎ𝑖𝑎𝑛𝑔ℎ𝑙𝑖𝑚 𝑡ℎ𝑒𝑖ℎ𝑛𝑎 𝑡𝑢𝑟𝑖𝑛 𝑘𝑎 𝑎𝑖𝑖𝑛 𝑎 𝑖𝑛𝑝𝑒𝑘 𝑘ℎ𝑎.” (𝑇𝑖𝑡𝑎 2:13,14)

*****