𝐀𝐍 𝐌𝐀𝐍 𝐌𝐀𝐊 𝐌𝐀𝐍𝐆 𝐄

Puithiam Putar kum 83 mi, hrisel lohna chi hrang hrangin a tlakbuak lehnghalin man a han tawk leh pandemic laia mi tam tak kara jail bang a han zut mai chu a rapthlak mang e. Mi chhumchhia leh rethei zawkte tana hun puma thawk leh thahnemngai taka bei fat fat a ni tih hriat phei chuan a lainatawm lehzual a ni. Zawhna tam tak kan rilruah a piang lo thei lo a. Eng kan ti nge India ram hi! Kan va che chau sawt ve le! Pawi tihna mai a ni thei tawh lo va, thinurna leh beidawnna te a chhuak rum rum mai a ni. Hei hi i vei lo a nih chuan eng tak vei ang che maw? Hei hi pawi i ti lo a nih chuan eng tak pawi ti ang che maw? Hei hian a ko harh lo che a nih chuan muhil der kaihthawh tum ang maiin i muhil lui a ni mahna le.

Fr Stan an man

Kan sawi mek chu October 8, 2020-a Catholic puithiam Fr Stan Swamy (83) chu Jesuit ho hmunpui pakhat Ranchi-a awm National Investiagation Agency (NIA), terrorist do tura an dinten an man chungchang kha a ni a. India ram pumpui a nghawr a ni ber awm e. Ranchi khawpuiah zan khat an riahpui hnuin Mumbai lamah an hruai thla ta a ni. Hetah hian he thu ziak a nih thleng hi chuan a la tang a ni. Fr Stan hi Tamil Nadu-a Virahalur khaw chhuak a ni a. An man lai hian a hriselna pawh a pan viau a ni awm e. October 9-a a thusawi chu, “Bhima Koregaon thil thlengah (an man chhan) inhnamhnawihna ka nei lo va, Maoist ho nen inzawmna kan nei miah lo. Ka nun pumpui adivasi (hnam hnuaihnung) tan ka hmang a, Constitution-a inziak ang leh Supreme Court rorel te ka bawhzui mai a ni,” a ti lawm lawm. Mahse vawiin thlengin a la tang si a.

Bhima Koregaon thil thleng

An man nachhan hi kum 2018-a thil thleng daih tawh kha a ni a. Maharastra state Bhima Koregaon khuaah Dalit (hnam hnuaihnung) ho leh hnam tha ho inkarah buaina a chhuak a; mi 2 thi, hliam 35 leh mi 300 lai man an ni a. He hmunah hian kum tinin Dalit-te hian kum 200 hma lama hnehna an chan hriatrengnan leh lawm nan kut an hmang thin a. January 1, 1818 khan Mahar (dalit hnam) Regiment leh Marathi lal Peshwa Baji Rao II nen an inbei a, Mahar ho hian anmahni chunga roreltute lakah hnehna ropui tak an chang a ni. 1928-ah Dalit hotu BR Ambedkar khan he hnehna lawmna hman hi a ching tan a, chuta tang chuan kum tinin Dalit rual rawn pung khawmin anmahni rapbettua an ngaih Maratha Lalram hnehna an lawm ho ta thin a ni. Buaina a chhuak ngai lo a ni awm e.

Kum 2018-ah thung kha chuan boruak a dang hle a. A hma lama Maratha lal Sambhaji Maharaj ruang hlawma vuitu nih inchuh vang a ni ber a. Marathi lal Sambhaji chu1689 daih tawh khan lal Aurangjeb-an a nghaisa hlum a. Govind Mahar (hnam hnuaihnung)-in a ruang a hlawm a, Hindu danin a halral ta anga sawi a ni reng thin a. Hei hi Maratha lam hian an pawm hleithei ta lo va (hnam hnuaihnungin hnam tha chunga an thiltih pawm harsa an ti ta aniang), nasa taka inhnialna a awm ta a ni. Buaina lo thleng thei hre lawkin Bhima Koregaon khaw Panchayat (khaw roreltute) pawhin khawchhung mite chu dawr zawng zawng khar veka, hemi kutah pawh tel ve lo turin an lo hriattir vek nghe nghe a ni.

Mil lohte puhchhiatna hmanraw tha tak

He thil thleng nena inzawm hian mi tam tak an man a, case kal zel chuan UAPA (Unlawful Activities Prevention Act) behchhanin Fr Stan Swamy chu an man ve ta a ni. Naxalite (hel pawl chi khat) te nena inkungkaihna nei anga puh a ni. Terrorism chungchanga man tawk tawh upa ber a la ni an ti. Covid 19 tamna Mumbai lama a tuk lawka an han phur chuk chuk phei chu awm lo ti an tamin, boruak a tithar nasa hle a. Kil tin atangin thuneihna hman khawlohna thil leh hnawksaka hriatte dah bo tumna thil ni ngeia ngai an tam hle. Fr Stan hian a thil tawn hi thil danglam lutuk bikah a ngai lem lo va, ram pum huapa thil thleng mek a nih thu a sawi mai a. ‘Mihring kalphung pangngai a rawn inher chhuah mai chu ka beisei, a nih loh pawhin kan tawn tur tur chu kan tawng ngam mai tur a ni e,’ a ti et mai bawk a. Hemi case kaihhnawih hian activist leh mi hnuaihnung te tana thahnemngai mi 16 lai an man tawh a ni. Sorkar laipui hian minority te thlavang hauha awka chhuah ring deuhte khuahkhirh a tumna hmanrua atan a hmang emaw tih theih a ni.

He Father hian eng nge a tih sual?

Naxalite nena inzawm anga puhna hi Fr Stan hian a pha chiang hle: “Tun kum 30 chhung hian Adivasi (vai tribalte) te tana thawkin zahawmna leh dinhmun tha an neih ve theih nan ka tang nasa hle a. Harsatna an hmachhawn chi hrang hrangah an lam ka tang nasa hle zel thin tih chu ka pawm. Sorkar policy thenkhat, Constitution kalha ka hriatte pawh sawiselna lehkha ka ziak fo bawk a,” a ti. A thiltih hi a zep lem lo va, ama sawi ngeiin hetiang hi a ni:

(i) Adivasi-te thatpui tur dan siam tawh Constitution 5th Schedule sorkarin a la hman loh chhan a zawt fo thin a. He schedule ang hian Adivasi chauh member an nihna ‘Tribes Advisory Council’ din a, Governor hnena thurawn pe thin tur a ni.

(ii) Engvangin nge Panchayats (Extension to Scheduled Areas) Act 1996 chu tun thlenga hnawl a nih a zawt fo thin. He Act hi a tum khatna atana Gram Sabha hmanga Adivasi ten khawtlang leh culture humhim pawimawhna hriatpuitu a ni.

(iii) Supreme Court-in 1997-a a rel tawh, Adivasi hovin an delh leilung hausakna an chan ve theihna tur sorkarin a ngawihpui rei lutuk avanga a beidawnna thu a sawi chhuak thin.

(iv) Adivasi leh ram hnuaia chengte tana dikna thlentu tur Forest Right Act, 2006 tihlawhtling tura sorkarin a thawk nasa duh lo lutuk chu sawiselin a au chhuahpui bawk.

(v) Supreme Courtin a pass tawh ram neitute chuan leilung hausaknaah chanvo an neih thu hi sorkarin a tihhlawhtlin loh avangin a sawisel a.

(vi) Adivasi te chhiatpui tur tun hnai maia an pass ‘Land Acquisition Act 2013’ (thlai chinna ramte thil dang atana sumdawng hausate an pek zung zung theihna dan) chu a duh lohzia huai takin a sawi chhuak.

(vii) ‘Land Bank’ an tih Adivasi te tana chhiatna ngei ngei tura a ngaih chu a duh lo hle. Sorkarin ‘ram awl’ a tihte chu hemi hmang hian industry din nan a pe chhuak zung zung thin a ni.

(viii) ‘Naxalite’ nia puha Adivasi leh Moolvais thalai tam tak an man thin chu a dik lo a ni tiin a tang nasa.

He thil duhawm lo tak atang hian eng nge lang

Mit kan meng duh a nih chuan tunlai India ram nihphung thui tak a hmuh theih tih kan hria ang. Sorkar hmalakna han sawisel nasa zualten tingmit an hlawh nghauh nghauh zel ang tih hlauhthawnawm tak a ni. Chu chu democracy zepui a tihchhiat telh telhna a ni dawn si a. Democracy kan tih hian kan hriat dan pangngai a ‘a tam ber rorelna’ ni mai lovin ‘mimal tin ngaihdan ngaih pawimawhna’ a kawk thuk zawk tih hria ila. ‘Bhima-Koregaon thil thleng avanga man tawk tam tak hi thil lian zawk nena inzawm tlat- a tir atanga Hindutva ram din tura hmalakna kal zel a ni’ ti pawl pawh an awm a ni. Saphaiin sakhi dawlh tuma a che tual tual ang hian India ram hi Hindu lalrama siam tur hian Hindutva movement chu a che tual tual a ni ber mai. Chu chuan sum leh pai leh nihna chanvo, therhlo tawk tarhin mite a thlem reng a, a tul chuan force pawh hman a hreh lo a ni awm e. Pawi sawi lo ber awma ngaih, Fr Stan Swamy, hun puma Pathian rawngbawl leh mi hnuaihnung te tana beitute meuh pawh hetianga sawisak an nih tawh chuan; tawngtai nasat leh ngaihven a va hun tehlul em!