𝐊𝐎𝐇𝐍𝐀

  

Ringtu tinin kan chian ngai em em, kan ngaihthah fo thin si chu Pathian kohna chungchang hi a ni awm e. Kohna thu hi chhandamna leh piantharna thu nena inzawm, thil inang reng sawi dan danglam hret a ni chauh zawk a. Han thler sin zel chuan ‘piangthar’ chu ‘Pathian kohna chhangtu’  a ni mai a ni. Mahse, tunlaiah  chuan Pathian kohna thu hi kan dah awl daih a, chatuan nunna neih nen kan sawi zawm vak lo niin a hriat thin. Hmaih palh kan nei em ni? Chhandamna chang tura min kohna hian  kan nun pumpui a huap a, ama rawngbawl tura min kohna nen a inzawm reng a ni.                                                                                                                                                                            

1.     Pathianin min ko a ni tih hriat chian a pawimawh

Kristian nuna thil pawimawh ber pakhat chu Pathianin min ko a ni tih hriat chian hi a ni. Chu thila kan chian loh chuan kan buai fo ang a, kan mawhphurhna hlutzia leh pawimawhzia kan theihnghilh fo ang a, kan inthlahdah thuai mai dawn a ni. Tirhkoh Paula hi thahnemngaihnaa a khah thin vang chu Pathianin a ko a, Isua Krista khan Jentailte hnena Chanchin Tha hril tura a kohnaa a chian em vang a ni. Ringtu i nih a, kohhran member i nih chuan Pathianin a ko che a ni tih kha lo hre phawt teh. Tin, nuamsa turin tumah min  ko lo a, mahni duhzawng uma phe vawn vawn tura koh kan ni lo tih hriat tel nghal tur a ni.

Krista Chanchin Tha hril a, Pathian Ram zau zelna hna thawk tur hian tih tur i nei. I awl thei bik lo. I hmaa awm i tih tur bil kha i tana hna pawimawh ber a ni. I ai awh tur tumah an ruat lo. Mahni tih tur an nei ve vek. Koha i awmna kha i ta bil a ni. Tin, Pathian Ram hna hi Pastor leh Missionary-te thawh tur bika ngai deuhroh an awm thin. A pawi hle. He khawvela Pathian Ram a lo thlenna tur hna hi a ropui lutuk a, Pastor leh Missionary ten an thawk seng lo. A pui lutuk. An thawh bik tura ruat pawh a ni lo. Ringtu zawng zawng thawh tur a ni. Kan hmazawn theuhah kan tih tur bik fel takin a awm vek. Kan tih tura Pathianin a dah hi kan tih loh chuan tih lohvin a awm mai ang, tuman min tihsak dawn si lo. Chutiang a nih chuan a va pawi dawn em!

2.     Min Kotu hriat chian a pawimawh

Min ko a ni tih nena inzawm reng, a pawimawhna pawh intluk reng chu min Kotu chu tunge a ni tih hriat chian hi a ni. Min kotu azirin kan tih tur chu kan ngai pawimawhin kan ngai pawimawh lo mai dawn a ni reng a. Chawkidar kohna aw leh Officer kohna aw a inang ngai lo a, ngaihzawngte kohna leh khawlai leng mai mai kohna a dang a, fate kohna leh thenawmte kohna a inang thei ngai lo vang. Min Kotu hi lei leh van Lal, Engkimtithei, Hmangaihtu Pathian Thianghlim, mi zawng zawng chunga Roreltu tur, A bul leh a Tawp,  a ni tih hriat nawn a tha e. A tawpa che fuh tur a ni tih pawh hi hriat tel nghal a tha bawk.

Tin, ‘min kotu hriat chian’ kan tih hian Pathian nen kan inkarah ‘inkungkaihna tha’ (personal relationship) tha kan neih thu sawina a ni bawk. Pathian hi Officer lian hriatin kan hre thei, Sipai lal hriatin a hriat theih, mahse Thuthlung Tharin a uar tak chu ‘Pa’ anga hriat hi a ni. Pa leh fa inkar boruak dik chuan engkim a ngam a, engkim a tuar chhuak ang. Fa chu pa angchhunga a awm chuan a thla a muang a, a pa a ring zo a, a lungawi a, a huai thin a nih kha. He inkungkaihna tha hi kan neih loh chuan kan rawngbawlna leh kan nun hi a ‘ro’ an ti thuai mai dawn a ni. Hlimna thuruk pawh kan chan thuai ang. A hming maia rawngbawl kan ni thuai mai dawn a ni. Min kotu hrechiang turin amah kan pawl tam a ngai bawk ang.

3.     Min koh chhan hriat a tul

Min ko a ni tih hriat a tul a, min kotu hriat a ngai bawk a, min koh chhan hriat a tul leh bawk a ni. Kan han sawi hrang nang a, heng ‘kohna’, ‘kotu’, koh chhan’ te hi Pathian ‘kohnaah’ hian a inzawm vek a ni tih hriat tur a ni. Min koh chhan chu Ama Ropui nan a ni mai. Ama tan min siam a, Ama tan min tlan a, Ama tan min ko a ni. Amah hi a hmasa zel a, keini ho chuan keimahni inhmuh hmasak kur kan ching bawk. Kan Pathian thu chai dan meuh pawh hi ‘self-centred’ rem rem tak a ni. Chhandamna chungchangah pawh hian keimahni chan lam bak kan hmu pha lo fo a ni tih chu a chiang thin.

Mi tam takin Pathian Chhandamna, Kristan min tlanna kan ngaihtuah dan hi a tawi mah mah thin niin a lang. Chhandamnaa Pathian thiltum hi keimahniah kan chhui tawp tlat thin a. Chuvangin, chhandam nia kan inhriat chuan kan duh tawk hle a, Pathian pawhin a duhtawk deuh maiah kan ngai fo a ni. Hei hi a ni teuh lo tih hriat a tha. Pathianin min chhandamnaah hian Pathian thiltum a la tawp reng reng lo a, Pathianin nang leh kei Kraws lera min tlanna chhan chu Ama Ropuina lei leh vana puan darh a nih zel theih nan a ni zawk. “A chhandam chhan che chu A ropuina puan chhuahna hmanrua i nih theih nan a ni,” i han ti hial teh ang.

A kohna phu-in

Pathian kohna chungchang kan ngaihtuah hian hun pum rawngbawlna hi kan kawhtir chawk a. Chutianga koh loh nia kan inhriat chuan mahni inhaivur leh inchhekarbawm lama tuan pawh pawi lo leh phalsakah kan inngai chawk a ni awm e. Mi tam tak chuan kan tisualin ka ring thin. Pathian kohna hi ama mi zawng zawng tan a inang vek a, engti tur nge kan nih erawh chu a inang lo. Ama ta tura kohna, ama ropuina tura thawk tura kohna, ama tana inserh hrang tura kohna hi kan dawn theuh leh kan chhan tur hmasa a ni a. A thuah hnihna khawi hmunah nge, eng ti turin nge, eng mawhphurhna nge tih erawh chu ringtu tin tan a inang lova. Kohna hmasa rinawm taka kan chhanna lan chhuahna tur a ni ber mai. Nang i kohna dawn phu-in i nung em le?

 *****