𝐍𝐀𝐔𝐏𝐀𝐍𝐆 𝐓𝐈𝐇𝐋𝐀𝐑 𝐀 𝐇𝐈𝐌 𝐄𝐌?

 

Mizote hi fa enkawl thiam lo tak kan ni thin a. Tun hma phei kha chuan mi awm thei deuh kha chuan fa sual an nei deuh ngei ngei emaw tih theih a ni. Nu leh pate sual vang hrim hrim aiin fa duat dan tawk an thiam loh vang a ni ngei ang. Tunlaiah chuan hei hi inthlak daihin mi awm thei apiangin fa an chher puitling tawh emaw tih tur a ni. A lawmawmin Mizo culture hmasawnna pakhat a ni thei ang.  Amaherawhchu, social media lo lar hnu hian venthawn tur pakhat a awm leh ta tlat. Naupangte hi kan leklam nasa lutuk deuh em? Naupang tihlar hi a him em? An tan a tha ang em? Social media-a pho lan fo hi a tha em? Ngaihtuah a ngai khawp mai.

 

1.      𝐂𝐡𝐢𝐥𝐝 𝐒𝐭𝐚𝐫 𝐛𝐮𝐚𝐢𝐩𝐮𝐢 𝐚𝐰𝐦 𝐭𝐚𝐤 𝐭𝐚𝐤 𝐚𝐧 𝐭𝐚𝐦

Hnam changkang zawk ho zingah khuan naupan laia lar ‘Child Star’ an tih ang hi an lo buaipui viau tawh thin a ni awm e. Television lo lar hnuah TV serial leh program chi hrang hrangah khawvel huapa lar an rawn chhhuak leh thin, naupang film star duhawm leh lar fe fe pawh an awm a, zai thiam thlengin ram pum huapa celeb ni ta an tam mai. Tunlai khawvelah phei hi chuan an tam lehzual tih loh theih a ni lo. Mipui hian kan lo lawm viau zel bawk si a. Anni lahin mi hriat hlawhna leh sum leh pai hui luh tawk tawkna hmanrua atan an lo hmang zel bawk si a. Lar thei tan chuan han hnar phal chi rual a ni lo.

Hetih lai hian rilru lam zir mi (psychologist) ho chuan naupan laia han lar hluai hi a hrisel em, naupang tan khan thil tha ber a ni em? tih hi chhui thamah an lo ngai thin a ni. Fimkhur a ngaihzia an hria. A chhan pawh Child Star/Child Celebrity tam tak buai chho zui ta, depression/anxiety nei chhunzawm, drugs leh ruihtheih chi hrang hranga intat lut buai ta viau an tam tak em vang a ni. Kan han hriat ve maiah pawh Macaulay Calkin, Britney Spears, Justin Bieber, Lindsay Lohan, Drew Barrymore, Amanda Baines, Miley Cyrus,  ang te hi naupan laia lar tawp, nun khawbaw takin a zui takte an ni. Kristian rilru atang phei chuan ‘An awhawm lem lo’ kan ti thei ang.

 

2.     𝐍𝐚𝐮𝐩𝐚𝐧𝐠 𝐜𝐡𝐮 𝐧𝐚𝐮𝐩𝐚𝐧𝐠 𝐡𝐚𝐧 𝐧𝐢 𝐩𝐡𝐚𝐰𝐭 𝐦𝐚𝐢 𝐬𝐞𝐥𝐚

Naupang kan tih chin a inang chiah lo mai thei. A chunga hming ka han ziah tlarte phei khi chu ‘tleirawl’ laia lar an ni mah mah zawk awm e. Khitiang ho pawh khian an buai phah a nih chuan kum 10 hnuai lam atanga ‘Celeb life’ titih nei ho phei chu ngaihtuahawm angreng tak an ni. Mahni fate tihlar tum phet te, chhuan ruk avanga social mediaa pho lan tum phette hi thil tul lo tak a ni. In-promote tum phet lohna lam tur tak niin a lang. Kum tling lo na na na chu kum tling lo anga kan enkawl thiam hi hnam pumpui leh chhungkaw tin tan a pawimawh dawn a ni.

Rilru lam zir mite chuan mi hi kum 25 a tlin hma chuan a rilru hi a la puitling tak tak thei lovin an sawi a. Sorkar chuan kum 18 hi puitling thawkhatah a ngai a ni tih kan hria. A awmzia chu mi pangngai hetiang chin chuan thil an hre thiam thawkhat tawh a, a chhia leh a tha an thliar thei thawkhat tawh tihna a ni. Chumi hma fe, kum 10 hnuai lam te lama a lar thei awm chu tihlar kan tum mai zawngin nakinah anmahniin khawvel pangngaiah in-adjust har an ti ang tih a hlauhawm thei hialin a hriat thin. Naupang chu naupang takin, rilru thianghlim tak, mawlmang tak, holam takin an thiante nen an naupan ‘life’ hi chen ve mai se a hrisel ber awm e. An puitlin hunah an duh ang kawng an la zawh ve ang chu.

3.     

      𝐊𝐚𝐧 𝐫𝐚𝐦 𝐡𝐢 𝐧𝐚𝐮𝐩𝐚𝐧𝐠 𝐭𝐡𝐚𝐧 𝐥𝐞𝐧𝐧𝐚 𝐡𝐦𝐮𝐧 𝐭𝐡𝐚 𝐧𝐢 𝐬𝐞

Vanneihna hi engtia teh nge fuh ber ang? Sum leh pai hniang hnar, khawtlang dinhmun tha luah leh mi zah kai leh kai lohte hi a tehfung tha pawl an ni mai thei. Mahse, heng zawng zawng aia tehfung sang zawk nia lang chu fa neih that leh that loh hi ni berin a lang. Nu leh pa fa nei puitling apiang an hlim mai dawn a ni. Mi awh ruk an ni bawk ang. A tawpkhawka fa tha chher tur hian lar tura induhsak nghal ringawt a chi loh, lar tir tum nghal em em tur a ni lo vang. Rilru puitlin hnua lar pawi miah lo hi rilru no leh insiam lai chuan dam chhung chhiatna thlentu a ni thei tih hriat a va pawimawh em! Intihhlimna hmuna rik hut hut, sahawkna boruak chawmtu bera tan, mi lawm hlawh tuma tan hram hram te hi naupang ‘innocent’ rilrua tuh loh tawp tur a ni.

Sikul kal rual hi chu sikul kal bak eng tehchiam chawmin hawp tir hran lo ila. College leh University rap pha chin chu an zia deuh a nih pawhin kaihhruai ngai tak an la ni tho. Eng pawh ni se, ‘formative years’ an tih rilru leh taksa an than lai hi chu zahsak hram hram a. Nu leh paten kan duhzawng tihtirna hmanrua atana kan hman emaw, an hriat thiam phak loh thil an duhthlanna piah lam thleng thlenga kan nawr lui a nih phei chuan a dik lo hial ang. Tin, social media a lar leh boruak neih lo buaipui chi an awm phei chuan kawng tha zawk kawhhmuhtu kan nih a ngai zawk dawn a ni. A khawtlang huap pawhin naupan laia intihlar hi a tul ber lo a, naupang chu naupang ni mai se a tha ber, an hlim ber bawk tih hi kan inzirtir tam a ngai ta a nih ber hi. Mizote entertainment khawvelah hian naupangte hi i telh tam lo hram hram teh ang u.

*****