𝐀 𝐋𝐄𝐌 𝐌𝐀𝐈𝐀 𝐋𝐔𝐍𝐆𝐀𝐖𝐈 𝐓𝐇𝐈𝐍 𝐇𝐈

Kan ram kan thlir hian Kristian ram nih dan tur hi a ni pha lo hle hian a hriat thin a. Hei hi mi thahnemngai tam tak rilru tihrehawmtu a ni. ‘Eng kan ti nge keini chhung hi?’ tih ang deuhvin keini ram tan hian mahni inenfiah a pawimawh thin a ni. Khawi ruam hi nge kan sut fuh lohva, eng hi nge kan man fuh loh? Kan khawtlang rilru leh kohhran rilruah engte hi nge her rem ngai? Kan kal ngaia kan k
al tlut tlut chuan kan nihna pangngaiah kan su tluk tluk dawn tihna a ni dawn si a. Inhawng taka ngaihtuahna sena, kan khawtlang kan lepse a, kan phuar khawm leh a ngai dawn a ni. Theih ang tawka chutiang ka tihna kawnga ka hmuh phak ve pawi tak chu thil tak tling zo lo, a lem mai maia kan lungawi mai thin hi a ni.

𝐂𝐨𝐫𝐫𝐮𝐩𝐭𝐢𝐨𝐧 𝐥𝐞𝐡 𝐒𝐨𝐜𝐢𝐚𝐥 𝐒𝐭𝐚𝐭𝐮𝐬

Mizote hian khawtlang nun inpawh tha tak kan nei a. Hei hi kan vanneihna leh kan chakna pakhat a ni a. Mizo nih nawmna lai pawh a ni tel bawk tih kan hria. Inhrilh lawk tehchiam lova kan han leng lut tawp mai thin te leh hlim taka kan han indawngsawng thei tlat maite hi thil hlu tak a nih hre lo kan tam viau mai thei. Khawtlang leh kohhran thiltih kan la zaha kan la ngaithlu viau maite hi a la lawmawm. Hetiang hi kan ni reng ang tih sawi theih a ni lo va, kan ngaih viau hun a la thleng ang tih a hlauhawm hial a ni. That lohna te pawh a lo awm ve thei reng bawk a.

He nunphungin a hrin pakhat chu ‘social status’ kan ngaisang em em hi a ni. Kohhrana nihna sang leh lar nia kan hriat chan phak te, YMA thila hotu chanvo chan theih te, khawtlang nun hrim hrima pa ‘challang’ han nihte hi kan ngaihlu hle ni tur a ni. Hetiang mi kan nih chuan kan mimal nunah a rukin tawp ru viau mah ila pawi tiin kan zak phal lo. Khawtlangin mi ‘corrupt’ tak nia an hriat Kohhran rawngbawlnaa phur leh hlim viau tho ang chite hi thil inkawlkalh tak, awm ngei si niin a lang. Engtin nge ropuina lemah hian kan lungawi theih tlat thin? Engvangin nge hetiang mite hian an lawmna tawka ngaihsan an hlawh theih tho le? Hei hian kan nun a pawnlanzia a tilang thin a ni.

𝐒𝐮𝐚𝐥 𝐳𝐞𝐩 𝐫𝐮𝐤 𝐥𝐞𝐡 𝐫𝐚𝐰𝐧𝐠𝐛𝐚𝐰𝐥𝐧𝐚

Thlarau rawngbawlna ngei ngeiah pawh hian a lem inhnangfak leh lo lungawipui ta mai mai tam theih tak a ni. Kohhran leh a rawngbawltu seltute selna hi mi tam takah a dik ang tih a hlauhawm thin. Nuthlawi pakhat, kohhran thiltiha tui ve tak pakhatin min hrilh ruk danin, a fala a laka mawi lo taka khawsa thin zingah kohhrana neitu chan changte hi an tam zawk niin a sawi a. Mi hla zawk leh tawp zawka ngaihten an zah thiam zawk thin thu a sawi bawk. Hei hian kan Mizo Kristian nun ropui lohzia a hril pha mai thei. Pastor pakhat a laka che mawi lo tak phei chuan, “Tuman an hre dawn hleinem,” te a ti hial a ni awm e. A va zahthlak thin em! Revival Speaker nih tling khawpte meuh pawhin mawi lo deuhvin an lo message rawl nen! A ruk thilah chuan kan lo fimkhur lo hlawm hle ni tur a ni!

Mi hmuh phak lohva kan khawsak dan hi kan thlarau nun tehfung dik tak a ni tih hi kan hriat a ngai a. Mi hriata kan nun kan pho chhuahah hian lawmna i zawng ber lo teh ang u. Heta kan hlawhchham chuan a pumpuiah kan fail a ni zawk. Khawtlang hmelma, kohhran leh a rawngbawlna tithuanawptu kan ni zawk. A pawi ber chu mahni mimal nuna tawp ru tak si hian kan nihna hre kim lo midang nena kan tih honaah kan lungawina tawk kan hmu tlat thin hi a ni. Piangthar lo viau mah ila miin min faka min chawimawi chuan kan hlim tho! Thlarau mi lo tih inhre reng mah ila miin min ‘thlarau mi’ anga min ngaih chuan kan lungawi tho tho. Kan sum lak luh dan leh kan inthenawm khawvenna nun thlengin a dik lo tih hre mah ila, hotu nihna leh hruaitu nihna kan chan chuan kan lungawina tawk a tling tho thin nia! Kan va han nep tehlul em! Hetiang ‘vervek’ nun hi Isuan a ‘attack’ nasat ber pakhat kha a ni. Ram leh hnam, Kohhran leh khawtlang tichhetu ka ti lo thei lo. Hlimna leh lawmna tluantling a pe hauh lo bawk ang.

𝐓𝐚𝐡 𝐭𝐢𝐜𝐡𝐡𝐮𝐚𝐤

Kan chhia leh tha hriatna hi a chhe zo ta em ni? Kan Pathian Thu thiamten kawng dik min khawh hmuh tur an hre ta lo em ni? Thu hriltuten thlarau nun dik kan sawi zo ta lo em ni? Rawngbawltuten chung lam tehfung hnawlin khawvel tehfung kan hmang thiam ta zawk em ni le? Hmelmapan a tak ni lo a lema lawm thiam turin min lo zirtir reng zawk em ni ta? A lem mai maia lungawi hi a va atthlak em aw! Chu chu hre lovin kan intihlim chawp a, chutianga kan awm rei tawh avangin thil nih dan phung ve rengah kan ngai a, mi zingah kan lam hlim viau thei tho va! Kohhrana thuhriltu pakhat pawh a chauh a chhuak a, a rui leh hnep mai a. Chutih lai chuan a thu hril hun a rawn chhuak fo si a, a tlingtla ve zel tho a. Sawi tha an la ti fu lehnghal! Kan lawmna hi a chau hlawm mang e!

Hetiang thil hi tah tichhuak a ni - mite hmuhsita Kohhran siamtu leh khawtlang nun tihrehawmtu chu. Mahni thisena ‘sugar’ sang hle si nupuite hmuh lohva vawk thau hmawm ru zauh zauh ang chauhva mahni inbum chiang, leh thin chhiat hle tawh hnua zu in ru ang chauha mahnia let tur ngei ngei thil pawi tih ang a ni. Mi a nileng bawl ang chauh. Ni emaw intia hlimpui ve em em, ni miah si lo!

Zoram harh rawh! A lem mai mai lungawipui tawh suh. A tak chu pawh la, a danglamzia i hre thei ang. I lo hlimpui zawng zawng leh i lo lawmna ve mai mai nen khaikhin chi a ni lovang. Mahni lawmna tawk tur phuah chawp zel ai chuan thutak atanga lawmna lo chhuak ngei chu a tha zawk em em dawn si a.

*****