𝐌𝐄𝐒𝐒𝐈 𝐋𝐄𝐇 𝐌𝐄𝐒𝐒𝐈𝐀

Kan thalai tam zawkte chu football boruakin a chiah hneh a. Euro 2024 leh Copa America 2024 ngaihvenin khawthlang lam kan thlir khup mai a nih kha. Zan khaw tairekah kan au uar uar a, ei tur tuihnai zawngin tunlai khawvel kut chi khat kan hmang a ni reng mai. Heti taka savun hlum (tunlaiah chuan savun pawh a ni tawh chiah lo!) ham puar inchuh mai mai-in khawvel mite min phuar khawm hi a lawmawm angreng hle zawk a. Player thar thiam tak tak an rawn chhuak zel a, an chhuak zel dawn bawk a. An han inkhel zo meuh hi chu mihring a danglam theihzia a lang thin. Patling meuh mittui nena khelmual sira an indawm kun ngawih ngawih laiin lehlamah lawmna vawr tawp changa lo zuang leh lam tawrh tawrh an awm mek bawk a. Hun tawp rorelna rapthlak thleng tur te pawh min ngaihtuah tir fo a ni. Hetih lai hian kum 37 lai ni ve tawh Lionel Messi ropuina leh football history zawng zawnga player ropui bera chhal theih tak tak turin a dinhmun a sawh nghet ve zel thu hi ngaihnawm tak a ni.

𝐆𝐫𝐞𝐚𝐭𝐞𝐬𝐭 𝐨𝐟 𝐀𝐥𝐥 𝐓𝐢𝐦𝐞 (𝐆𝐎𝐀𝐓)

Argentina-in Copa America a zawna (2021, 2024) an lak leh takah hi chuan Lionel Messi pawh Greatest of All Time (GOAT) nihna a sawh nghet tha ta viau mai. Tun tum chu a inhliam avangin ni dang a tluk pha lo tih a chiang a. Amaherawhchu, a captain-na hnuaia Nomawi chawi an nih miau avangin hming that a hlawh lo thei chuang lo va. Hei hian footballer piang tawh zawng zawnga Nomawi chawi tam ber (45 lawih) a nih tir ta vung mai. Chu chauh pawh chu ‘ropui ber’ nihna khawp a ni a, mahse chu chauh chu a ni hauh si lo. Messi hian kum tina thiam ber nihna Ballon D’or tum 8 lai mai a la a (a hnaih ber Cristiano Ronaldo in tum 5, midang vawi 3 aia tam la thei an la awm lo). Goal thum tam ber dawttu a ni mek bawk a (a chunga awm Cristiano Ronaldo aiin a goal thun rate a la tha zawk lehnghal). Playmaker award dawng hnem ber a la ni zui! A record hi kan sawi seng lo. Tehfung an sawi lar vak loh ropui ka tih em em thung chu a football khelh zawng zawng zah ve (51.6%) ah Man of the Match a ni thei (tum 324) hi a ni, a hnaih ber Cristiano Ronaldo chuan 28.8% tlinin tum 176 ah a ni ve chauh a ni. A che tha thin lutuk hi thenkhat chuan FIFA (khawvel football roreltu pawl lian ber)-in a tan bik a sawi tlat te, ‘FIFA Boy’ tia sawichhetu te, World Cup Nomawi a chawi theihnana engkim rel lawk vek angtein an puh hial! An selna hi chawimawina hlu takah a chang letling hlauh zel dawn a ni awm e.

Messi hian football chauh ni lo kum khat chhunga sportsman tha ber thlanna lawmman an pek thin Laureus Award chu tum 2 lai a dawng tawh bawk. Inkhel mi (athlete) piang tawh zawng zawnga ropui ber anga sawi te pawh an awm hial tawh a. World Cup Nomawi a chawi hma kha chuan Pele leh Maradona ten ropui taka an chawi tawh miau avang khan GOAT ang ema sawi tim deuh an awm thin a. Tunah chuan a sual chhuah liau liau tih theihin a chawi ve vung tawh mai si! Bakah World Cup Golden Ball (Player of the Tournament) vawi hnih la thei awm chhun a la ni. Pele leh Maradona ten tum 1 ve ve an la thei chauh tih hre ta maim ai ila. Copa America Nomawi phei hi chu an chawi lo ve ve a ni. Chu chauh pawh chu a la ni lo. International tournament tum 10 final Argentina a luhpui thei a, hengah hian tum 6 lai chakin Best Player a ni deuh vek bawk a ni. A ni tluka khel tam, hnehna chang tam, ‘thiam ber’ nihna chang tam leh champion ni zing an awm lo. ‘Aw Ropui Ber’ (GOAT) nihna hi ani aia phu an awm lo, han ter pha pawh an awm lo niin a lang. Ani pawhin ‘football lungthu ka kim tawh e’ a ti hial a nih kha. A dik tlat si a ni.

𝐓𝐥𝐚𝐰𝐦 𝐳𝐚𝐰𝐤𝐭𝐞 𝐫𝐨𝐩𝐮𝐢 𝐡𝐮𝐧

Hmelin a zir loh chuan zai thiam pawh an lar tak tak thei lo, an lo tih thinna khawvel, pianphung lan dan a pawimawh em emna-ah hian Messi hian mi pianchhe zawk leh chawrche zawkte ai a awh zo hle a ni. Isaia 53-a ‘Chhiahhlawh Tuartu’ kan hmuh ang deuh hian a hmelhmangah chuan han ngaihsan em emna chhan tur a awm lem lo. A bawp a tawi ve tek mai a, a beng leh hnar te chu ‘alien’ emaw tih mai turin a zum ang pet a, a sam sei lai phei kha chuan nuihzatthlak ve tak a ni. Pa hmeltha, pian nalh han tih tur chu a ni bik lo. Mahse maw…he lei hringnunah hian hmelhmang aia pawimawh a awm tlat. Chu chu thiamna leh tih tak takna a ni. A tawpkhawkah chuan chu ngei chu kan ngaisang tho tho. Messi hian mi awmnem zawk, chawrche zawk, hmelchhe zawkte ai awhin ropuina chu tu tan pawh a awm theihzia a tilang a ni.

Messi chanchina ngaihnawm ka tih deuh mai chu a sawiseltute a tibeidawng hneh em em thin thi a ni. Barcelonaa a khelh lai kha chuan ‘club player’, ‘Xavi leh Iniesta tel lovin engmah a ti thei lo’ te an tih khum thin a. Khatih lai kha chuan Argentina team-ah khan a che tha mawh ve bawk nen. Mahse, tawrh theihna leh tei rei peihna te hi thil pawimawh em em a lo ni tih a lang chiang. Xavi leh Iniesta tel lovin a la hnem ta malh malh hle a nih hi. Leadership nei lo angin Maradona meuh pawh khan a nuihsawh deuh a nih kha. Mahse tunah lah hian ani tluka mahni team-te hruai hneh a, teammate ten an zah leh hmangaih rawn hi an awm lovang tih theih khawpin leadership a nei leh si. Interview-ah lah hian thil reng reng hi inngaitlawm leh fing takin a sawi zel a.

A tirah kha chuan sawi dan tur hrilhtu tha deuh a nei a nih ka lo ring ve ringawt a, mahse heti zozaiah chuan amaha awm ve hrim hrim a nih ka ring ta zawk. Messi chanchinah hian ‘thil tlawm’ zawkten ‘ropuina’ an chan zawk thuruk inthup hi tihlanin a awm tlat a ni. Hawihhawmna, inngaihtlawmna leh rilru thatna te hian hmelhmang thatna, chapona leh induhna te a hnehzia langsar taka pho lan a ni. Diego Maradona kha football a thiam, a huaisen, leadership a nei, a che bawn thin, mahse a nun a uluk lo. A chapo a, ruih theih thilah a mualpho nasa a ni tih khawvel hriat a ni. A nunah kim lo a tam a ni. Messi erawh hi chu inngaitlawm taka tawng thin, insum thei tak, chhungkaw ngaihsak tha tak, nungchang mawi tak a ni ta tlat. Argentinian zawng zawng tana chhuan tlak a va ni tehlul em!

𝐂𝐨𝐚𝐜𝐡 𝐭𝐢𝐡 𝐟𝐮𝐡𝐧𝐚 𝐥𝐚𝐢 𝐛𝐞𝐫

Messi vanglai leh Spain football ‘golden generation’ an tih mai a innang a. He golden generation hian Euro tum 2 leh World Cup 1 an chawi hial a. Heng hun zawng zawngah hian Argentina football team chuan eng trophy ropui mah an chawi lem lo. Duhsaktute chuan Spain tana khel turin an duh hle. Anin duh se chuan Spain tan pawh hian khel zawk daih thei a ni a. Barcelona cluba a khelhpui zawng zawngte nen inman takin an khel thei dawn si. Kan hriat phak loh hian sawmna pawh a dawng hnem ngawt ang. Mahse a pianna Argentina a thlang tlat a nih kha. A nihna takah chuan Argentina football fans ten an deusawh leh an huat rawn viau lai pawh a awm. Ram leh hnam hmangaih tak tak lova a theihna tawpkhawk chhuah lova puhna te pawh a dawng ve a nih kha. Mahse Argentina a thlang tlat. A thlang sual lo tih hunin a rawn hril chiang hle a nih hi.

Messi ropuia meuh pawhin hlawhchhamna mittui a far hnem ve hle. A telna Argentina team hian Copa America final tum 3 leh World Cup final tum 1 an han chak lo tehreng a nih kha. Amah ngeiin penalty a thelh avang leh a ball siam tha lutuk striker tha Higuain-an a hlah vang te pawh a nih theih dan a awm. A beidawng rum rum thin ve ngei ang. Khatih laia Argentina team zawng zawng khan Lionel Messi an chhuang hle reng, an innghahna ber pawh a ni tho. Mahse an chak zo ngai lo. Tuna an team ai hian player an chhe zawk em em pawh a ni chuang si lo. Engvang teh kher nge ni ta ang? Tuna an coach Lionel Scaloni hnuaiah hian eng nge lo danglam ta? Ih maw, he coach pa hleitling leh hmeltha danglamna leh tih fuh ber chu Lionel Messi-a innghat liau liaua team a din ta hi a ni ngei ang. A player dang zawng zawng hian Messi ropuina sawr chuah tumin an khel a, Messi tan an bei a, Messi chu an hum tlat a, Messi hian chawimawina chang se, an ti. Chu chuan awmzia a nei thui a niang Argentina chu World Champion a lo ni ta a, Messi chauh ni lo player dang zawng zawng pawhin hlawkpuiin khawvel Champion player an ni ta vek mai a ni. Lionel Messi a ropui poh leh Argentina ram leh football team an ropui! Hnuk a ulh thei hial dawn alawm!

Hetah chiah hian thlarau thuchah chiang tak a lang nghal mai. Kan hringnuna Isua Krista hming lam leh teltir ve pangngai nun leh Ama ropuina sawr chhuah tuma amaha innghat tlat nun chu a danglam ngawt ang. Kan rinna nuna kan nih tur kan ni pha lo rih viau te pawh hi Messia innghat leh amah hual vela Argentina team an din ang taka Messia tak tak zawk tan, amah innghat leh hual vela kan hringnun kan la din fuh loh vang a ni mai lovang maw? Messia tak tana thawh hi kan that theih dan pawimawh ber a nihzia hriat a va tha tak em!

*****