𝐇𝐋𝐈𝐌𝐓𝐄𝐍 𝐊𝐀 𝐋𝐄𝐍𝐆 𝐓𝐀𝐖𝐇 𝐄 𝐏𝐡𝐮𝐚𝐡𝐭𝐮: 𝐋𝐚𝐥𝐡𝐦𝐚𝐧𝐠𝐚𝐢𝐡𝐚 (𝐌𝐀𝐋𝐓𝐀)

Kan rawlthar chhuah hlim khan MALTA hi an rawn lar a. An group hming kha nalh lo ka’n ti mai mai khawp a, a lam pum an han sawi phei chu thing ka ti lehzual a. An hla sak erawh chu nalh ka ti angreng viau thung. Kan college function-a thian thenkhatin ‘Ka u Liana’ tih hla an rawn sa phei kha chu kan nui nasa khawp mai. ‘Mami Pa Mumang’ tih kha a awmzia hriat har ka ti khawp mai a, mahse awmzia a nei vak lo tih pawh ka hre hnuhnawh ve leh mai a.

Tum khat chu an Vocalist ber Pu Lalhmangaiha kha kan inah a rawn leng lut ve hlauh mai a, a inla celeb lo angreng hle a ni. Hetia mual min liamsan hnuah hian Youtube-ah te a hla sak hlui leh hnaivai deuh te ka han ngaithla thar leh a, rinaiin ka tui tharin thiam ka tithar leh ta riau a. A hla phuah, ama sak ngei ‘Hlimten ka leng tawh e’ tih phei hi chu ka duh ta hle mai a. A theology a rilin a dik ka ti a. Chu mai ni lovin thahnemngaih luat avanga mi thenkhat Pathian Thu thluk dan herh deuh tam tak a su dar niin ka hre hial a. Han sawi zau deuh ka chak ta riau a ni.

𝟏. 𝐊𝐚 𝐭𝐡𝐥𝐚𝐧𝐧𝐚 𝐚𝐢𝐚 𝐡𝐥𝐮𝐚 𝐦𝐢𝐧 𝐭𝐡𝐥𝐚𝐧𝐧𝐚 𝐜𝐡𝐮

Pu Hmangaiha (ti ve tawp mai teh ang) hi a pianthar hnuah Speaker niin rawng a bawl thin a ni awm e. Eng angin nge Pathian Thu a sawi thin chu ka hre hauh lo. A sermon tum khat mah ka la ngaithla ngai lo va, mi sawi chhawn pawh ka la hre ngai bawk lo. Mahse he hlaah hian a thuchah laimu chu a lang ruakin ka hmu thei a. Chhandam kan nihna kawngah mihringin tih theih kan nei ve lohzia a sawi chiang em em mai a. He thu hi tunlai mi tam takin pawm thiam har an tih, mahse Protestant ho inzirtirna laipui a ni reng si a ni.

A awmzia dik tak pawh tluknain suala min hruai luh hneh tawh em avang khan ‘tha duh lo thinlung, kawng tha aia kawng sual awn tlat rilru’ kan nei tawh tih hi a ni a. Chu chu kan nihphung sual chu a ni. Chutih laiin ringtute chu Pathianin min lo thlang reng a lo ni zawk a. Chu min thlanna chu keimahnia chakna awm leh thatna awm vang a ni hauh si lo. Pu Hmangaiha hian mahni chakna hmachhuana Krista hnungzui a theih lohzia leh ringtua Krista khawngaihna hnathawh a hmu chiang hlein ka hria. Chhandamna bultumtu chu Pathian a ni a, ringtute hian keimahnin min thlan hmain aman min thlang a, chu chu kan chhandamna innghahna a ni tih hi a vawrh chhuak hneh hle.

𝐾𝑎 𝑐ℎ𝑎𝑘𝑛𝑎 ℎ𝑚𝑎𝑐ℎℎ𝑢𝑎𝑛 𝑎, 𝐾𝑟𝑖𝑠𝑡𝑎 𝑘𝑎 𝑝𝑎𝑛 𝑙𝑎𝑖𝑖𝑛

𝑇𝑖ℎ 𝑡ℎ𝑒𝑖ℎ 𝑛𝑒𝑖 𝑙𝑜 ℎ𝑟𝑖𝑛𝑔𝑛𝑢𝑛 ℎ𝑖 𝑚𝑖𝑛 ℎ𝑚𝑢ℎ𝑡𝑖𝑟 𝑎.

𝐾𝑎 𝑡ℎ𝑙𝑎𝑛𝑛𝑎 𝑎𝑖𝑎 ℎ𝑙𝑢𝑎 𝑚𝑖𝑛 𝑡ℎ𝑙𝑎𝑛𝑛𝑎 𝑐ℎ𝑢 ℎ𝑟𝑖𝑎𝑖𝑛,

𝑉𝑎𝑛 𝑛𝑢𝑛 𝑝𝑎𝑟 𝑡𝑙𝑎𝑛𝑖𝑛 𝑘𝑎𝑛 𝑙𝑒𝑛𝑔 𝑡𝑎𝑤ℎ 𝑒.

𝟐. 𝐊𝐚 𝐜𝐡𝐚𝐤𝐧𝐚 𝐚𝐢𝐚 𝐜𝐡𝐚𝐤 𝐳𝐚𝐰𝐤 𝐊𝐫𝐢𝐬𝐭𝐚

Tunlai Speaker tam tak hian thlarau bo, a bik takin ruihhlo ngai ang chite, an vei luatah hian an thuchah hi an herh danglamin an thlah dul deuh fovin ka hre thin. Chhandamna bo theih lohzia sawi a, Kristian nun tha sawi dalau mai te (Chhandamna huang pawn lama vawrh chhuah), Kristian nun chu mihring thiltih anga hnawla Chhandamna chungchanga sawi kan mai te, Pathian duhzawnga nun zelna hi ‘dan ram’ tia sawi duh mai te thlengin an awm thin. Pu Hmangaiha hian hetiang thil hi a hre chiang tawka ngaih theih a nih laiin he a hla kal tlanga a puan chhuah hian chu chu hneh takin a hnawl a. Mihring chak lohna lam chhuanlam leh thlah dul (compromise) hauh lovin ‘mihring chakna aia chak zawk Krista’ a hmu chiang hle.

Chu Krista chuan ni tin nun thar a pek thute a sawi bawk! Mihring lam aiin Pathian lam a hmu lian zel a, mihring theihna aiin Pathian theihnaah a innghat a nih hi. A gospel rem rem hle a ni. “I chak loh pawhin a hrethiam zel che,” tih lam aiin, “Nangmahah Krista chakna a awm,” a ti rup mai a ni. Pathian min hriatna hi hriatna pangngai mai ni lo ‘van hriatna’, chu hriatna atanga lo chhuak chu khawvel hnehna a nih thu a uar a ni.

𝐾𝑎 𝑐ℎ𝑎𝑘𝑛𝑎 𝑎𝑖𝑎 𝑐ℎ𝑎𝑘 𝑧𝑎𝑤𝑘 𝐾𝑟𝑖𝑠𝑡𝑎’𝑛

𝑁𝑖 𝑡𝑖𝑛 𝑛𝑢𝑛 𝑡ℎ𝑎𝑟 𝑚𝑖𝑛 𝑝𝑒.

𝐾𝑎 ℎ𝑟𝑖𝑎𝑡𝑛𝑎 𝑎𝑖𝑎 ℎ𝑙𝑢, 𝑣𝑎𝑛 ℎ𝑟𝑖𝑎𝑡𝑛𝑎𝑖𝑛 𝑚𝑖𝑛 ℎ𝑟𝑖𝑎

𝑉𝑎𝑛 𝑛𝑢𝑛 𝑝𝑎𝑟 𝑡𝑙𝑎𝑛𝑖𝑛 ℎ𝑙𝑖𝑚𝑡𝑒𝑛 𝑘𝑎𝑛 𝑙𝑒𝑛𝑔 𝑡𝑎𝑤ℎ 𝑒.

𝟑. 𝐓𝐡𝐢𝐧𝐥𝐮𝐧𝐠 𝐦𝐢𝐧 𝐡𝐦𝐮𝐡𝐭𝐢𝐫, 𝐭𝐢𝐬𝐚 𝐳𝐢𝐚 𝐦𝐢𝐧 𝐡𝐫𝐢𝐚𝐭𝐭𝐢𝐫

Hei hi a pawimawh nangiang. Piangthar nun dik tak niin ka hria. Tunlaiah chuan kan kalsan tep tep thin emaw tih theihin kan thuhril hi a awm. Thlarau Thianghlimin mihring piangthara a hnathawh hmasa chu an sualzia leh chungpikzia hriattir hi a ni a. Chumi chu pianthar hnuah pawh la awm reng thin a ni. Thlarau hnathawh uar luat a, dan ram tia Kristian nun tha hnawltute hian anmahni thinlung ngei pawh an hmu fiah lo fo ni ngei tur a ni. An tisa zia an hre chiang lo thin a ni. Sual an haw lo em mai!

He hla phuahtu hi chuan thinlung a hmu chiang a, tisa zia a hre ta a, chumi avang chuan mahni leh mahni pawh a inhaw ta. He lai tak hi ‘thlarau mi’ leh ‘thlarau suak mi’ danglamna te pawh a ni ang. Thlarau suak chuan mahni a insawimam zel si a! Chutichuan, vanram kai lo tur mizia leh thinlung a fiah viau si avangin ringtu nunah chuan indona a lo thleng ta! Ringtu chakna aia chak Krista chuan chu indona field-ah chuan hnehna a chang ta zel bawk a ni! Chu chu ‘thlarau mi’ dik tak lawmna chu a ni bawk a.

𝑇ℎ𝑖𝑛𝑙𝑢𝑛𝑔 𝑚𝑖𝑛 ℎ𝑚𝑢ℎ𝑡𝑖𝑟 𝑎, 𝑡𝑖𝑠𝑎 𝑧𝑖𝑎 𝑚𝑖𝑛 ℎ𝑟𝑖𝑎𝑡𝑡𝑖𝑟 𝑎

𝑀𝑎ℎ𝑛𝑖 𝑖𝑛ℎ𝑢𝑎𝑡𝑛𝑎𝑖𝑛 𝑎𝑤 𝑘𝑎 𝑙𝑜 𝑘ℎ𝑎𝑡 𝑎.

𝑉𝑎𝑛 𝑘𝑎𝑖 𝑙𝑜 𝑡𝑢𝑟 𝑡ℎ𝑖𝑛𝑙𝑢𝑛𝑔 𝑚𝑖𝑧𝑖𝑎 𝑐ℎ𝑢 𝑙𝑜 ℎ𝑟𝑖𝑎𝑖𝑛

𝐾𝑒𝑖𝑚𝑎ℎ𝑎 𝑛𝑔𝑒𝑖 𝑖𝑛𝑑𝑜𝑛𝑎 𝑚𝑖𝑛 𝑙𝑜 𝑡ℎ𝑙𝑒𝑛 𝑡𝑎.

𝟒. 𝐊𝐫𝐢𝐬𝐭𝐚 𝐥𝐮𝐧𝐠𝐩𝐮𝐢 𝐧𝐠𝐡𝐞𝐭

Pu Hmangaiha hian a dinna hmun a hre chiang hle a ni awm e. Lungpui ngheta din hlutna a man bawk a. Tluk leh tlak fawm chunga thiam inchantir dan zawng reng mai te nun nen chuan he hlain a pho chhuah nun hi a danglam khawp mai. Nunin Setana duhzawng hrut hneh hle mah sela khawi lai hmunah emaw ‘piangthar’ intih vena engemaw neih tawh chuan ngaihtha ta mai mai nun nen chuan a inang lo deuh a ni. Ringtu chu nghing ve ngai lo Krista lungpui ngheta ding a ni a, ni tinin a thatna a hmu thar thin a. A dai ram zelah chuan Pathian ropuina lantirin a awm thin a ni.

Pu Hmaa tawngkam hi a mawi thlawt mai, “Rinhlelhna thlipuiten ni tin min nuai mah se, rinhlelhnain rinna nghet a do zo lo,” a ti. Mahni chakna thlira inrinhlelh mai te, mahni hriatna ena inrintawk loh te, mahni theihna thlira induh tawk loh ngawih ngawih te hi thil awm thei leh thil awm thin a ni. Ringtu tan chuan maw – ‘rinhlelhna hian rinna nghet Pathian atanga chhuak chu a do zo lo.’ A dikin a va tha em!

𝑁𝑔ℎ𝑖𝑛𝑔 𝑣𝑒 𝑛𝑔𝑎𝑖 𝑙𝑜 𝐾𝑟𝑖𝑠𝑡𝑎 𝑙𝑢𝑛𝑔𝑝𝑢𝑖 𝑛𝑔ℎ𝑒𝑡𝑎 𝑑𝑖𝑛𝑔𝑖𝑛

𝐾𝑎 𝑡𝑎𝑛 ℎ𝑙𝑖𝑚𝑛𝑎 𝑡ℎ𝑎𝑟 𝑚𝑖𝑛 𝑙𝑜 𝑠𝑖𝑎𝑚 𝑠𝑎𝑘𝑎,

𝑅𝑖𝑛ℎ𝑙𝑒𝑙ℎ𝑛𝑎 𝑡ℎ𝑙𝑖𝑝𝑢𝑖𝑡𝑒𝑛 𝑎𝑤 𝑛𝑖 𝑡𝑖𝑛 𝑚𝑖𝑛 𝑛𝑢𝑎𝑖 𝑚𝑎ℎ 𝑠𝑒

𝑅𝑖𝑛ℎ𝑙𝑒𝑙ℎ𝑛𝑎𝑖𝑛 𝑟𝑖𝑛𝑛𝑎 𝑛𝑔ℎ𝑒𝑡 𝑎 𝑑𝑜 𝑧𝑜 𝑙𝑜.

𝟓. 𝐕𝐚𝐰𝐢𝐢𝐧𝐚 𝐯𝐚𝐧 𝐧𝐮𝐧 𝐩𝐚𝐫 𝐭𝐥𝐚𝐧

He hlain a puan chhuah pawimawh em em, mi tam zawkin kan hmaih tur nia lang chu van nun par tlan chungchang hi a nih ka ring a. Pu Hmangaihan a sawi langsar ber chu Vanram nun chena hlim taka a awm tawh thu hi a ni a. Hei hi ringtute thlarau nunin a hriat thiam leh a hman thiam a tul takzet mai. Ringtu tana malsawmna hi thih hnu thil chauh a ni lo. Vawiina van nun par tlan a ni. Thenkhat chuan vawiina hrehawm ngawih ngawiha awm a thih hnua vanram kal an tum thin. Hetiang nun hi inhuam tur pawh a ni. Amaherawhchu, vanram changtute nunah hian vanram hi thih hnu thil mai a ni tak tak thei lo va, vawiina chen tur thil, van nena inzawm nun, nun nung tak a ni.

‘Van ram a ni tawh e’ kan la tih chiah theih loh lai hian, Pu Hmangaiha chuan ‘Van nun par tlan’ lam a lo sawi daih mai a. Kristian nun hi ‘Van nun par tlan nun a ni’ kan ti tawh mai ang chu. Thih hnua a famkima kan tawn tur chu vawiinah hian kan chen tan a ni ber e. Chu chu ringtu dik tak ‘thlarau mi’ kan tih te nun, nun awhawm chu a ni. Pu Lalhmangaihan he thil a lo hmu chiang viau mai leh hla tha tak, ama sak ngei a lo dah hi a lawmawm thlawt a ni.

*****