𝐋𝐀𝐋 𝐋𝐎 𝐏𝐈𝐀𝐍𝐆 𝐂𝐇𝐔

Krismasa kan lawm lal lo piang Isua Krista hmuh nan thlarau mit leh tisa mit a hman theih ve ve a. Kan Lalpa he khawvela lo kal hi tisa mit atang chauh pawhin thlir ta ila khawvel tidanglam dawrh khawpa ropui a ni a. Thlarau mita hmu thiam tan phei chuan chatuan thil danglam thlentu a nihzia a chiang a nih hi. Chutiang mite chuan Krismas dik tak an hmang thin a ni. Lal Krista a lo pian hian mihringte dan hriat thiam sa a her danglam nasa hle a, chu chu tisa mitin a hmu thiam mang thin lo a ni. Ropuina chu tlawmnaah awmin sanna chu midangte rawngbawlsakah a lo ni a, a pe tlem ber pawhin a pek tam theih berna ram leh nun chantuin a humhim zawkna dan a ni ta tlat a. Chutiang thuah chuan khawvel hi a la buai reng a, a la hrethiam lo reng a ni. Zawlnei Isaia erawh chuan kum 600 hmalamah Isua nihna dik tak a lo hmu chiang hle a nih kha:

1. Remruattu Maka

Tunhma kha chuan “A hming Maka, Remruattua...” kan ti deuh duah thin kha a nia. “Remruattu Maka” tih hia Hebrai tawng atanga letlingtuten an duh dan a ni tlangpui tawh zawk a. A chhan pawh Isaia sawi hming dangte hi thumal pahnih inkawp a nih zel vang a ni mai awm e. Hebrai tawngah hian comma tih vel hi a awm loh avangin lehlin danah tupawhin zalenna an neiah pawm mai ila, a hranga awm khi kan la duh zawk a nih pawhin thu tum inkalh thui lutuk a awm lo niin a lang. Lal lo piang tur chu a mak hlea remruattu a nih bawk chuan remruattu maka a ni mai dawn hrim hrim a ni.

‘Remruattua’ tih tawngkam pawh hian ‘roreltu’ (administrator) a kawk zawmahin a lang a. Saptawng Bibleah chuan ‘Counselor’ tih a ni lehzel a, chu chu Mizote hriatthiam zawng tak pawh a ni awm e. Lal lo piang tura chu remruattu mak danglam tak, midangte ang ni lo thu chhak chhuak thin leh a remruatnaah he khawvel dan piah lama mi hmang thin a ni. He ‘Counselor Maka’ zirtirna hi a tha danglam hle dawn a, Hebrai tawnga an dah dan tak chu ‘Remruattu mak danglam’ tihna a ni hialin an sawi. A ‘counseling’ zawmtute chuan min hruaina mak tak hi kan chang zel dawn a ni. A mak dan pawh ‘thil mak’ satliah a ni dawn lo va, a that leh duhawm dan mihring hriatthiam leh beisei phak lohva ‘mak’ a ni dawn!

2. Pathian Chaka

Zawlnei Isaia hunah hian Assuria sorkar chak lutukin rawn bei mai tura hlauhthawnna an nei nasa a. Hetih lai hian hnam leh sorkar chakna chu sipai leh ralthuam neih zah atanga chhut ber lovin hnam pathian chak leh chak lovah an teh mai a ni awm e. Isaia pawhin chu chu hre rengin Lal lo piang tur chu ‘Pathian Chaka’ a nih turzia a lo sawi a ni. Hnam dang pathian zawng zawng dah niltu tur, pathian ropui nia an ngaih zawng zawng chunga chuang larh Pathian Chaka tih hming a pu zo hle dawn a ni. Thiltihtheihna tak tak khumtu, ‘pathian’ dang zawng zawng an tluk vek huna dingchang tur, tihna a ni a. Tunlai tawng takin ‘Last Man (God) Standing’ tak tak chu Isua Krista a ni dawn!

Hetah hian zir tur kan ngah viau awm e. Lal Isua hi Pathian Chaka a nihna hian tunlai Kristiante hi min kaihruai em le? A thua kan pawm fel hi a takin kan nunpui em? Thil dang ‘pathian’ nun hian min tibuai hneh hle thin a ni lo maw? Nu leh paten ‘sum leh pai’, ‘nihna sang’, ‘dinhmun tha’, ‘chawimawina’, tih angrengte hi ‘Pathian Chaka' aia chak zawka ngaiin kan buaipui thin a ni lo maw? Pathian Chaka aia chak zawka ngaih a va tam thei dawn em! Thalaiten ‘nawmsip’, ‘larna’, ‘nulat-tlangval’ tih angreng hi Pathian Chaka aiin kan hmu chak zawk fovin a lang thin. Heng hnam dang pathian zawng zawng hi a hun takah chuan an la tlawm hneh dawn khawp mai a, dawl zawrin an zawr vek dawn a ni. Chu thu chu Thupuan Bu hian a va han sawi ngaihnawmin a va sawi fiah fai tehreng em!

3. Chatuan Pa

Mi vanduai chu Kristian inti ve si he khawvel chin chauh hmu phate hi an ni awm e. Ringtu chu an inti ve ngei a, mahse an ringtu nihna chu he khawvel thilah a tawp thin. Malsawmna an tehfung pawh he khawvel tehfung hi a ni a, an lawmna pawh lei malsawmna a ni. Chutiang mite hlimna ber chu neih belh zel a ni a, an lungngaihna bul pawh ‘neih ve loh’ a ni. Chatuan tarmit an vuah thiam hlawl lo! Pathian pawlna thuk tak chu hlimna leh lungawina atana hmang lovin khawvel tehfunga ropuina leh hmasawnna te hi an hlimna leh lawmna hnar awmchhun a ni a, chutiang a nih loh palhin an indawm kun mai thin a ni.

Lal Isua ‘Chatuan Pa’ tih a nih hian a buaipui ber chu chatuan thil a nihzia a kawk tih hria ila. Chu chuan a daih rei turzia a lantir nghal bawk a. He kan lei hringnun hun chhung chauh hi rilru kaptu a ni pha hauh lo va, he lei malsawmna te hi mihringten ngai ropui viau mah ila ani tan chuan buaipui tham a tling lo. A mite min duhsak ber a ni lo! Chatuan thil aia nep min duhsak tur Pathian nep a ni lo! He kan hringnun tawi te atan chauha inhmang ral lovin Chatuan atana kan Pa nih hi a duh ber chu a ni a! Pa-fa inhmangaihna, inthlakhlelh leh innel ang inkungkaihna duhawm kha in inkarah a duh a nia! ‘Hnehtu’, ‘Tihbaiawm’, ‘Lal Ropui’, ‘Engkimtithei’, ‘Lalte Lal’, ‘Pathiante Pathian’, a nihna piah lamah ‘Chatuan Pa’ a ni e! Ani chuan Pa hmangaihna atanga a mite enkawlin, Chatuan daih duhsaknain anmahni lamah ‘Chatuan Pa’ nih tlingin malsawmna a luan chhuah tir thin a ni.

4. Remna Lal

Lal lo piang tur hming 4-na ‘Remna Lal’ kan tih hi Saptawng pawhin mawi taka ‘Prince of Peace’ tia dah a ni a. ‘Peace’ tih hian Zotawnga ‘remna’ leh ‘muanna’ tih a fun tel avang hian ‘remna leh muanna’ tia sawi duah a ngaih changte pawh a awm. Chuvangin, ‘Remna Lal’ kan tih pawh hi ‘Muanna Lal’ tih pawh a inhmeh ve tho bawk a. Eng pawh ni se, Kristaah chauh chuan ‘remna’ dik leh ‘muanna’ tluantling chu a awm tih kawk a. Amaha invuahrem chauhvin ram, hnam leh mimal tu pawhin muanna dik chu an nei dawn a ni. ‘Prince of Peace’ tel lovin ‘Peace’ a awm thei si lo. Chu muanna duhawm tak chu buaina leh harsatna kara ringtu nun thuruk hahdam tak chu a ni thin. Chu Remna Lal ngei chuan tun Krismasah hian min pawl theuh sela a va duhawm em!

He khawvel tihrehawmtu chu innghirnghona a ni a, chu inrem lohnain a thlen indona leh intihnatnate hi a va han huatthlala tehreng em! Ukraine indo reh thei lo, Israel-Palestine inbeihna rapthlak, Manipura Meitei leh Zohnahthlakte boruak hriat nuam lo tak takte hian ‘Remna Lal’ hi an va mamawh tehlul em! Remna Lalin rorelna famkin a chan hma chuan inhuatna leh intihnatna te chuan hmun an la chang zel dawn a ni si a. Chutih lai chuan ‘Muanna Lal’ hian kan thinlung luhchilhin, kan mimal nunah tal hian muanna dik chu min pe theuh sela a va duhawm tehreng em! Sum, nawmsip, ropuina, dinhmun sang, adt., zawng zawngah hian ‘muanna’ chu a awm lo va, ‘Muanna Lal’ chauhvin a pek theih thil a nihzia i hre theuh ang u.

Eng vang nge maw a hming Maka,

Remna Lal a lo nih le?

Thianghlim famkim ni mah sela,

Mi sual kei mi hnar si lo.

(Rokunga)

*****