𝐀 𝐓𝐇𝐀𝐖𝐇𝐋𝐄𝐇 𝐌𝐈𝐀𝐔 𝐒𝐈 𝐂𝐇𝐔𝐀𝐍

Kristian sakhua humhalh nasa ber Tirkoh Paula chuan, “Krista kha kaihthawhin a awm loh chuan kan thu hrilh hi engmah lo a ni ang a, in rin pawh engmah lo a ni bawk ang,”(I Kor. 15:14) tiin Thawhlehna pawimawhzia a sawi a. A sawi awmzia chu, ‘I hlimpui thin, i ngaih pawimawh, i chhuan, i sawtpui nia i hriat, i hril thin, i lampui thin leh a dang zawng zawng kha he Thawhlehna tel lo chuan eng tihna mah a ni lo,” a tihna a ni. Isua thawhlehna avangin chauhvin kan rinnaah hian kan ding nghet thei a. Kristian sakhua that riauna pawh, a chang chuan hriat ril leh thuk pawimawh viau thin mah se a innghahna bulpui ber hi hriat thiam har lem lo tak, thil thleng ngei, mi tinin an man thiam tur Isua Krista thawhlehna a ni tlat mai hi a ni.

𝐓𝐡𝐮 𝐭𝐥𝐢𝐧𝐠 𝐚 𝐧𝐢

Tirhkoh Paula sawi ang hian Kristian sakhua awihawmzia leh Pathian a awm ngei a rinawmzia chu he Thawhlehna hian a hrilhfiah tha ber nia hriat a awl. A that zualna chhan chu he thil hi philosophy har tak a ni lo va, theology ngan tak a ni bawk lo. Finfiahna (evidence) zawng tân pawh hmuh tur a tam hle a ni. Chutih rualin rinna a phût tho bawk si. Awih duh lo tân chuan awih loh theih tho a ni a (hun kal tawha thil thleng zawng zawng hi a awih loh theih vek a ni), awih duh tân erawh awih chhan tur a tam nangiang bawk a ni. English Lawyer Frank Morison-an Thawhlehna dik lohzia finfiah tumin research a bei ngat a. A zir chian tak tak hnuah chuan Dan thiamna tehfung atang tak pawha Chanchin Tha bu records te chu a rinawmzia hmuchhuakin Who Moved the Stone (1976) tih a ziak ta hial a, ani pawh Isua Krista ringtu a ni ta hial a nih kha. Khawvel zirna tehfung atang pawha a rintlakzia hriat theihna chu Kristian Philosopher Gary R. Habermas-an The Resurrection of Jesus: A Rational Enquiry tih a thupui hmangin Michigan State University-ah Ph.D a hmu ngat bawk a ni. Kan awih emaw awih lo emaw ‘thu tling’ chu a ni ngei e.

𝐒𝐚𝐰𝐢𝐡𝐧𝐚𝐰𝐦𝐧𝐚 𝐜𝐡𝐢 𝐡𝐫𝐚𝐧𝐠 𝐡𝐫𝐚𝐧𝐠

Thih fel vek hnua thawh leh ngat mai hi thil awihawm tak nih ngaihna a awm lem lo va, Isua zirtirte ngei ngei pawh khan atirah chuan an awih lo a nih kha. Ring ve lem loten hrilhfiah dan chi hrang hrang an nei thin. Tunlai hun aiin kum zabi 18-naah khan chutiang hrilhfiahna chu tam zawk daih an ti lehnghal. An sawihnawm tum dan hrang hrang hi tui tam tak pai a ni lo tih hi chîk zawkte pawm tlan a ni deuh vek a ni. ‘Swoon Theory’ an tih, Isua kha nikhaw hre lovin a awm a, thlân dâiah khan a rawn harh chhuak leh a ni, tia an sawi hi chu a thih chianzia a nâk vihna atanga thisen leh tui rawn chhuakin a tichiang a. Tin, hei ai maha tichiangtu chu, swoon theory kha dik ta se a zirtirte khan Isua kha chau tak leh na takin an hmu ang tih a chiang a ni. ‘Tholeh Lalpa’ ni vah tur khawpa dam leh chak kha chuan an hmuh a rinawm loh. Thenkhat chuan a taksa kha a zirtirten an ru bo a ni, an ti a. Mahni dawt phuahchawp avanga thih ngam an nih chu a awihawm lo zawk daih a; a tira awih lo nasa ber ber Paula leh Jakoba te pawh a hnua ringtu nghet an lo ni ta a nih kha. Eng emaw tak a thleng a ni tih a hriat mai. Midangin a ruang an ru bo ti dawn ila, an rûk bona chhan tur tha tawk a vang leh êm êm si a ni. Thenkhat chuan Isua hmutute kha an mit a vai a nih an ring bawk a. Mi pahnih/pathum a ruala mitvaih chu awih awm lo tak a ni a (ramhuai/thlahrâng hmu nia insawite pawh hi mimala hmu ni lovin a ruala mi 2 aia tamin an hmuh hunah a awihawm deuh mahna!), chu achhapah mitvai mai mai an nih chuan a taksa kha a awm tur a ni si a.

𝐓𝐡𝐥𝐚𝐧 𝐚 𝐫𝐮𝐚𝐤 𝐭𝐥𝐚𝐭 𝐤𝐡𝐚 𝐭𝐡𝐢𝐥 𝐦𝐚𝐤 𝐭𝐚𝐰𝐩 𝐚 𝐧𝐢

Isua thawhleh thu kha a thih hnu thla hnih ral hmain an hril tan a. Dawt ni sela chuan Josepha Arimathaia mi thlan hmun kha va en theih mai a ni. Tin, an hun laia mi thianghlima an ngaih thlan an serh thin ang khan Isua thlan kha ngaihhlut a ni chhunzawm lem lo. A ruak tawh miau a! Tirhkohte sermon hmasa berah te khan thlân a ruahzia chu ringtu leh ring lote khan an chiang vek niin a lang. Tirhkohte 2:29-ah Peteran Davida thlan an hnena a la awmzia te sawiin a cho vel! Isua mantira a awm, khenbeh thu leh thlân ruah thu te hi indawt fel taka ziak leh sawi a ni ziah a, thawhleh hnua Isua an hmuh chungchâng an sawi dan erawh hi chu a darhsarh deuh nuai a ni. An beisei loh lutuk, hmun hrang hrang leh hun hrang hranga thleng a ni tlat avangin hetianga sawi hi thil âwm tak a ni a. Phuahchawp mai mai ni lovin, a thlen dân ang anga record a nih thu a tichiang. Tin, Juda hovin hmeichhe thu, thu tling lo anga an ngaih laia thawhlehna hmutu hmasa anga Chanchin Tha buin a sawi hi mipa ho tân a tlawm thlâk em avangin miin phuahchawp dawn ta se a phuah loh dan tur ni awm tak a ni.

Biblical scholar thenkhat chuan Thawhlehna thu hi a hnu lama phuahchawp tur chuan chipchiar tawk lo leh hul mah mahin an hria a. Ringtute tana a awmzia tur leh hlutzia zirtirna a kalpui nghal lo a, tum neia an irawm chhuak chu ni sela chutiang chu awm nghal thlap turah an ngai. Thuthlung Thar hun hnuhnung lama an tuipui tak zirtirna (theology) tam tak hi a keng tel lo a ni, an ti. Phuahchawp chu ni se a awmzia thuk tak an bilh tel nghal vek ang tih hi an rin dan a ni. Paula te hunah chuan ‘ni thum niah’ tiin Isua thawhleh hun kha an sawi thin a. Thlan ruak sawitute chuan ‘ni sarih ni hmasa berah’ tiin an sawi tlat thin hian he thu hi Juda takin a nih anga an sawizia a tilang a, sawi dan inang lo deuh nuaih mai rem fel harsa angreng tak te hian awihawm tura phuahchawp a nih lohzia a tilang zawk a ni.

𝐏𝐡𝐮𝐚𝐡𝐜𝐡𝐚𝐰𝐩 𝐚 𝐚𝐧𝐠 𝐭𝐡𝐞𝐢 𝐥𝐨

Isua a tholeh a nih thu kha zirtirte phuahchawp ni ta se eng nge an hlawkpuina ni ta ang? Harsatna, tuarna, hmuhsit, cheksawlh leh thih thlengin an tawrh phah zawk a. Chu achhapah Juda mi rinawm an nih angin sakhaw thar din chu an tum lo hle tih a hriat (I Kor. 15:12-19) a nih kha. Tin, Isua chanchin an sawi kha Messia an lo beisei dân nen a inhlat lutuk a, phuahchawp ngaihna a awm lo hial zawk a ni. Anmahni sawtpui tur leh hlawkna atân Isua Thawhlehna thu kha phuahchawp ni ta se, mahni hmasial ta na na na chuan midangte aia len tumin engvangin nge zirtir pakhat talin pawl a din loh ni ang aw? An phuahchawp a nih chuan zirtir 11-te zinga mi pakhat tal kha inpuang awm tak a ni. Chuti ahnehin Thawhlehna thuchah avangin an martar theuh an ti si a. Watergate scandal-a inhnamhnawih, jail bang pawh zut ve zak zak a pianthar hnua rawngbawltu ropui tak lo ni ta Charles Colson-a chuan, “Isua thawhlehna kha thil thleng ngei a ni tih ka hria. Watergate mualphona khan a tichiang a ni. Engtin? Mi 11 ten Isua kha thih hnuah a tho leh tih an puang a, a hnu kum 40 chhungin pha miah lovin chu thu chu an hril a nih kha. An zavai mai khan vuak, nghaisak, lunga den leh tan ina khung thlengin an tuar vek. Thu dik a nih loh chuan tu emaw ber inpuang tur an ni. Watergate khan khawvela mi thiltithei ber ber mi 12 min kaihhnawih a, kar 3 bak kan zep thei lo. An dawt phuahchawp ni se engtin nge kum 40 chhungin zirtir 11 ten an zep tlang theih ang? Thil awm lo tawpkhawk a ni,” tiin (Charles Colson, Born Again).

𝐓𝐡𝐢 𝐭𝐚𝐰𝐡 𝐈𝐬𝐮𝐚 𝐢𝐧𝐥𝐚𝐫𝐧𝐚 𝐭𝐞 𝐤𝐡𝐚

Thuthlung Thara kan hmuh angin Isua kha mi chi hrang hrang hnenah a inlar a. Mimal eng emaw zah, mi 500 zingah; ni 40 chhûngin, ring lo hnenah pawh a inlar a ni. Zirtir thenkhat chuan an awih mai lo tih kan hria a, ring lo Paula hnenah pawh a inlar a nih kha. Isua tholeh taksa kha a chî a dang hle bawk a. Thlarau taksa a ni tawh a, khawih theih leh hmuh theih; thil ei thei ni mah se hun leh hmunin a chunga thu a neih tawh loh a ni. Isua inlarnate kha sawi rem a harsa hlawm khawp mai. Hun tawi te chhunga thil thleng deuh zawk a ni thin. Hei hi thenkhatin an rin loh chhan lian tak pawh a ni mai thei. Amaherawhchu, hei hian mite rin theih nana phuahchawp mai a nih lohzia a tilang zawk a. A zirtirten a tira an rin mawh viau te, Juda inzirtir dana Messia thia thawhlehna a awm miah lo te hi he thu tirinawm lehzualtu an ni.

Tin, Thuthlung Thar hian Thawhlehna thu hi uchuak takin a uar lo a. Hei hi a mak angreng khawp mai. Apocrypha lamah chuan hetiang hi a ni lo a. Entirnân, Gospel of Peter (zabi 2-na) ah chuan Kraws hi Isua hnunga thlan atanga lo chhuak a van tawng ta angin sawi a ni. Thuthlung Thara sawi dan pangngai tak nen hi chuan a dang daih. Phuahchawp zia a pu lo niin a lang. Zirtirte khan Isua thawhlehna kha an suangtuah phak lo va, a thih hnuah beisei an nei tawh lo va, an beidawng ngawih ngawih a nih kha. Phuahchawp mai mai thawn harh chi an ni tawh lo.

𝐊𝐨𝐡𝐡𝐫𝐚𝐧 𝐝𝐢𝐧𝐠 𝐭𝐚 𝐤𝐡𝐚 𝐭𝐡𝐢𝐥 𝐚𝐰𝐥𝐬𝐚𝐦 𝐚 𝐧𝐢 𝐥𝐨 𝐛𝐚𝐰𝐤

Isua zirtirte inthlak danglam nasatzia kha Thawlehna thiltihtheihna atang chauh lo chuan hrilhfiah a har a ni. Zâm, hlâu, leh beidawnga Galilee lama khawsak tum tawh; thingtlâng mi, beram vengtu leh sangha mantu; mahni pûte phatsantute heti taka danglam, huaisena leh hruaitu ropuia an rawn inthlak ta hi eng dang mahin a hrilhfiah zo lo a ni. Chu nena inzawm zel chu vawiina Kohhran kan hmuh hi a ni. Kum zabi 1-na Juda sakhuaah khan thil panga paih theih miah loh Juda nihna kengtu – inthawina, dân zawm, Sabbath serh, monotheism (Trinity an hre pha lo) leh mihring Messia beiseina, te a awm a. Chûng zawng zawng malmâk thak chu awlai lo tak a ni. Juda mi tan heng thil panga hnawl awmzia chu ensan leh thih hnu khawvela hremhmun kal a ni mai. Engtinnge zirtirten an malmâk thak theih? Sakhaw mi tak tak vek an ni bawk si. A chhan awm thei chhun chu thihna hneha Thawhlehna a ni. Chu thil thar mak tak thuhretu chu Kohhran hi niin Krista thihna leh thawhlehna chu a lawm (celebrate) thin a ni.

𝐓𝐥𝐚𝐧𝐠𝐤𝐚𝐰𝐦𝐧𝐚

Mihring hriatna tehfung chi hrang hrang atanga tehin Isua thawhlehna kha thil thleng tak tak ngei a nihzia kan pawm thei a. Chuti a nih chuan he khawvel piah lam thil a awm tihna a ni ang a. Pathian a awm ngei a tichiang a ni. Tin, thih hnua tholeh ngat chu ngaihsak, belh leh rin tlâk a ni tih kan hre bawk. Oxford Philosopher Richard Swinburne chuan, “Isua kha a tho leh a nih chuan thilmak a awm tihna a ni a…chu chu Pathian chauhvin a ti thei ni…Pathianin Isua inhlanna a pawmzia leh a zirtirna zawng zawng a nemnghehna a ni,” (Richard Swinburne, The Resurrection of God Incarnate) tiin Thawhlehnain Isua Krista-a Pathian awm kan hriat theih dan a sawi a ni. Kristian rinna humhim kawngah hian a thawhlehna hi tlar hmaah a awm hial awm asin.

*****