𝐊𝐎𝐇𝐇𝐑𝐀𝐍𝐈𝐍 𝐄𝐍𝐆 𝐍𝐆𝐄 𝐀 𝐓𝐈𝐇 𝐀𝐍𝐆?

 

Mizo Kristiante hian eng nge kan tih tur chiah hi kan buai rei tawh khawp mai. Kan chiang hleithei lo a nih ber hi. A ‘thlarau’ chin leh ‘rau lo’ chin, rawngbawltute sawi tur awm leh awm lo te kan thliar zung zung a. Pathian Thu lamah lah hian mahni ngaihdan kan nei nghet hlawm hle a, kan sawi miah miah mai bawk a. Kan tisual ang tih a hlauhawm hle thin mai. Tam zawk hi chuan ‘Vanram kai’ thu chauh hi an ngai Pathian Thu a, mimal harsatna sutkianna lam chauh hi emaw sermon tur kan ti chawk a ni awm e. Heti lam thu hi a pawimawh em em rualin hei chauh hi a chu a ni lo tih hriat tlan hi kan mamawh tam tak zinga pakhat a ni ngei ang le. Khawvel pum Kristianna thlir pawhin tun hma chuan ‘liberal’ deuh nia kan hriat lam khan khawtlang siam that lam an uar a, Chanchin Tha hril lam an hnualsuat lek lek thin. Chu chu evangelical lamin an do nasa hle thin a ni tih Kristian history hre ve nel nualte chuan kan hre mai ang. Tunah erawh chuan Evangelical lam pawh lo harhin khawtlang nun siamthat lam pawimawhzia an sawi nasa ta hle mai a. Kum 2010-a The Third Lausanne Congress on World Evangelization, Cape Town-a an neiha an thuchhuah The Cape Town Committment an tih maiin Pathian hna, Kristiante tih tur, Pathian mission an sawifiah dan hi a ngaihnawm hlein ka hria.

 

Pathian hnapui

 

Khawvel pumpuia Pathian hna thawh hi kan ngaithah thei lo, a chhan pawh chu Pathian hna chu Pathian chungchang, Bible nihna, Kohhran awmzia, hringfate chanchin kal tawh leh kan hmalam hun tur kan hriatthiam dan zawng zawng laimu a nih miau vang a ni a. Bible chuan Pathianin thil engkim, leia mi leh vana mi zawng zawngte Kristaa fawkkhawm a, krawsa Fapa thisen hmanga remna hna a thawh thu min hrilh a. Chu a hna thawh hlen tur chuan Pathianin sual leh thihnain a tihchhiat vek tawh khawvel hi a siam tha vek dawn a. Abrahama hnena leia hnam zawng zawng malsawm a tiamna chu Krista, Messia, Abrahama thalbea piang Chanchin Tha ngei hmangin a hlen dawn a ni a. Pathian chuan khawvel chhe tawh leh a chhunga mihring tlu chhe tawhte zing atangin Krista thisena a tlan chi thar - hnam tin leh ram tin, tawng tin leh hmun tin atangin kan Pathian leh Chhandamtu chibai buktu tur - a ko khawm mek a ni. Lei leh van roreltu chuan thihna rorel rapthlak tak, eiruk leh hlemhletna chi hrang hrang leh intihnatna duhawm lo zawng zawng hi Krista lo kal leh huna nunna, dikna leh remna a rawn thlentir hunah a tichhe vek ang. Tichuan, Immanuela (kan hnena Pathian awm) ngei chu kan hnenah a awm tawh ang a, khawvel chu Pathian Ram dik takah a chang tawh ang a, chatuanin ro a rel tawh dawn a ni.

 

Kohhran tih tur chu Pathian hnapuia tel a ni

 

He Pathian hna hi thawk ve a, kan koa phur ve turin a mite zawng zawng a ti a. Hnam tin zinga a thlan Kohhran chu Messia Krista kaltlanga Thuthlung Hlui mite nena inzawm reng a ni a. An ni nen chuan khawvela malsawmna thlen tur leh khawvel eng ni turin min ko a ni. An ni nen chuan dan leh zawlneite zirtirnaa chher chhuaha awma, zawm a, zirtira awm turin min ti a ni. Kristaa Pathian hnathawh hriattir tura Isua Krista thisen leh thawhlehnaa tlan leh Thlarau Thianghlim tihchak  kan ni a. Kohhran chu chatuana Pathian chibai buk leh chawimawi tur mai baka tun huna he khawvel siam tha tura awm a ni. Kristiante hnapui (mission) chu Pathian hnapui (mission) atanga lak chhuah leh duan, Pathian thilsiam zawng zawng hmaih bik nei lova hmachhawn, krawsa hnehnaa innghat hnapui a ni. Heng mite zingah hian kan tel a, an rinna kan tawmpui a, an hna hi kan ko-ah kan nghat ve chat a ni. Ringtu tumah kan awl thei bik lo va, Kohhranin a tih tur a thlanchhiatsan thei lo a ni.

 

Pathian hnapui hi thensawm loh tur

 

Bible-a kan hmuh ngei, khawvel chhandam nana Pathianin Kristaa a hnathawh zawng zawng hi kan tih tur min hrilhtu chu a ni a. Chu Chanchin Tha hnam tin hnena hriattir chu kan hnapui a ni. Kan hnathawhna hmun chu he khawvel kan awmna, sual punlunna, tuarna a khat, dikna rahbeha a awmna leh thil siam inrem fuh lohna hmun hi a ni a. He hmunah hian Krista vang chauhvin hmangaih leh rawngbawl turin Pathianin min tirhna hmun hi a ni. Tichuan, chu hnapui (mission) chuan Chanchin Tha hril leh kan khawtlang siamtha tura inpekna a huam tel ve ve tur a ni a. Bible-a kan hmuh Chanchin Tha chuan chung hnate chu then hrang miah lovin kan kovah a nghat a ni. Chanchin Tha hril chu Bible-a kan hmuh Isua Krista chu Chhandamtu leh Lalpa a nihna, miin amah an rin theihna tur leh Pathian nena inrema a awm theihna tura puan chhuah a ni a.  Chanchin Tha hril chuan Krista thuawihna, a Kohhrana tel vena leh khawvel siamtha tura inpekna a thlen thin. Chanchin Tha hril leh he khawvel siamtha tura inpekna hi a tel thin. Chanchin Tha hril leh khawtlang nun siamthat hnaa inhman hi Kristiante tih tur pahnih a ni a. A chhan pawh a pahnih hian kan thenawmte kan hmangaihna kan lantirna leh Isua Krista thu kan awihzia kan tihlanna a ni. Kan puan Chhandamna chuan kan nihna zawng zawng – kan mimal nun leh khawtlanga kan mawhphurhna zawng zawngte a siam tha vek tur a ni ang. Thiltih tel lo rinna chu thi a ni si a.

 

Rawngbawlna inchawmtawn

 

Chu Pathian hnapuiah chuan Chanchin Tha puan chhuah leh thiltiha pho chhuah hi langsar takin a awm ve ve a. Chanchin Tha hril leh khawtlang siam thatte kal kawptir an ni satliah lo va. A inzawm thukzia hi kan pawmin kan man zawk a ni. Chanchin Tha dik taka puan a nihnaah chuan hmangaihnaa nun kawng engkima sual simna thu kan sawi thin avangin khawtlang nunah hnuhma duhawm a nei ngei ngei thin a. Chutiang bawkin, Kristianin khawtlang siam thatna hna dik taka a thawhnaah Krista khawngaihna tihdanglamna duhawm tak a lan tlat avangin Chanchin Tha hril hnaah hnuhma a nei lo thei lo thin bawk a ni. Khawvel hi kan hlamchhiah chuan he hmuna rawngbawl tura min tir chhuaktu Pathian Thu (Krista) chu kan hlamchhiah a ni ang a, Pathian Thu (Bible) kan hlamchhiah chuan khawvel tan hlui tur engmah kan nei bawk lo vang. He hna ropui, Pathianin ama Kohhrante thawh tura a dah hi hlen turin Mizo Kristiante inhlanthar a va pawimawh em!

 

(i)                  Isua Kristaa Pathian khawngaihna Chanchin Tha a puanchhuah tawh zawng zawng, mi zawng zawng hnena simna thu, rinna, baptisma, thuawihna leh a hnungzuitu nih awmziate chu hnam tinte hriattir turin thu min pe a ni si a.

 

(ii)                Riangvaite leh tlachhamte hnena Pathian lainatna ngahzia lantir a, Pathian Ram thiltihtheihna pho chhuak leh a nihphung vawng nung tura dikna humhalh, remna leh muanna siam leh Pathian thilsiamte enkawlna hna thawk turin thu min pe bawk a ni.

 

Hun kal tawh atanga zir tur

 

Rom sorkarin Kristianna a do hmasak berna chu tan ina Chanchin Tha hril a khap kha a ni a. A chhan pawh Kristiante tan ina an luh khan Chanchin Tha an hril zel mai ni lovin, an Lalpa Isua Krista Chanchin Tha nihna kha an nun chhuahpuia, thil dik lo an do nghal zel a ni. ‘Krista chu Lal a ni’ tih an au hla kha Kaisara tan a ngaihnawm lova, a huatthlala ngawih ngawih thin. Thil dik lo a hnawl tlat thin si a.  Joseph Stalin-an Soviet Union-a lal a hrawt lai khan Kohhran kha a bei nasa hle, mahse an inkhawm pangngai leh sakhaw thiltih khan a ngeng a chhun vak lo. Chanchin Tha an nun chhuahpuina kawnga khawtlang thila Kristiante an inrawlh tlat thin kha a ning a ni ber. Kum 1929 ah te khan kohhranin mi rethei zawkte tana sum a khawn te kha a hua a, kohhran zirna hmun, kawng dik leh tha inzirtirna hmun, te a khap bawk a nih kha. Sorkar khan a duh china inkhawm leh Kohhran anga awm te chu a phal khawp mai, mahse hringnun kawng engkima ‘Krista chu Lal a ni,’ tih pho chhuah kha chu a zo lo a ni. Tunlai China ramah pawh khian chu chu a ni tho awm e. An duh anga a awm chhung chu phal chin an nei, mahse ‘home church’ an tih Krista Chanchin Tha nunchhuahpui tuma, an nunphung leh ngaihhlut turte thleng thleng lo sawi ve chu an phal ngang lo a ni. ‘Isua chu Lal a ni’ kan tihin hringnun khawi kip pawh a thlen hunah chuan dodaltu an awm ngei ngei thin a lo ni.

 

Tunlai ram zalenah hian tun hmaa zalen lo zawka an dodal zawh loh kha dodalin a awm ta zawk a ang hial thin a ni. Lal Isua duh dana kalpui hi kan zo lo lek lek tawh zawk a ni mai thei. Kan Kristianna pawh mahni hlimpui zawn leh inawitleina thil niin kan hre tawh a, chutiang bak chu kan buaipui peih lo va, a ‘thlarau’ lo niin kan hre hial. Hei erawh hi chu hria ila - kha tiang chin chauh kha chu khawvelin helh thamah a ngai ngai lo.