CHAL HNAWIH SEN LEH RELIGIOUS PLURALISM

         

Kan ram hruaitu lu berin chal a hnawih sen (leh a defend deuh tlur) chungchangah thu a tam khawp mai a. Mi tam takin thil engkim political advantage anga lak an tum nasat lai a ni a; ngaihtuahna fim hmang hman lo kan tam ang tih vengthawng deuh chungin Kristianten sakhaw dang kan thlir/hmuh/ngaih dan chi hrang hrang awm thei leh kan zawh tur kawng tha nia lang han sawi lawk teh ang. A sawi hun lai tak pawh a ni mahna.

Sakhaw inpawlhsawp (religious pluralism) in harsatna a thlen

                  Ram khat emaw, hnam khat emaw Kristian an nih vekna hmunah chuan mahni sakhua chauh dik nia hriatna hian harsatna a thlen vak lo. Amaherawhchu, inpawlhsawpna hmun, sakhaw hrang hrang bia an awm nukna hmunah chuan ngaihdan a dang deuh thin. He sakhaw inpawlhsawpna hi ‘religious pluralism’ chu a ni a, pluralism (sakhaw hrang hrang hlutna intluk tlanga ngaihna) nen ngaihpawlh loh tur a ni. Tin, tunlai khawvelah hian he hemi chungchangah hian ngaihdan fumfe tak kan neih hi a pawimawh zual ta em em a. Europe leh America te khu Kristian ram leh changkang hmasa an ni a. Ram dang sakhua zawng zawng chu sakhaw dik lo leh mawl lai sakhuaah an lo ngai mai thin a. Missionary pawh an intir chhuak chum chum thin a nih kha. Tunah erawh chuan Kristiante pawhin tumhmaa an ngaihdan ang ngawt kha chu pawm harsa an ti fo ta mai. Khawvel hi a lo zim ta telh telh a. Sakhaw dang be si nun tha tak tak, Kristian ni lo sang tam tak an hmuha an pawl tam hnuah tunhmaa ‘Isua Krista ringtu chauh’ chhandam an ni ang tih rin dan kha sawifiah deuh ngaiin an hre ta chawk a ni. Kristiante tan buaipui tur pawimawh berte zinga mi a ni a lo ni ta bawk.

Sakhaw dangte kan thlir dan duhawm tawk lo

                  Kan Lalpa Isua Kristaah chauh Chhandamna a awm tih ring tlat mah ila, sakhaw dang kan thlir danah Kristian lem lo tak, Kristianten kan lo nihpui tawh thin a awm. Chu’ng zinga mi chu:

Hmuhsit. Sakhaw dang betute hi Setana hmanrua tha lo tak angin kan hmu a, nuihzatin kan hmusit chawk a ni. Hei hi a dik lo hlein a hriat theih. A betute hi kan vengte an nih miau avangin Bible thu kan zawm dawn a nih chuan kan hmusit thei lo vang. Sakhaw dang betute zingah tawi ve tak tak an awm thin. Chungte chu thur chhuaha hmuhsit tum hram emaw, sakhaw dang zuitute tih dik loh leh zirtir dan dik lo emaw chang a, hmuh veleh lawma Chanchintha ang maia tlangaupui vak  chi a ni lo. Kristian zingah pawh chhuanawm lo tak tak kan tam em hi.

Ngaihnep. Sakhaw dangte hi ngaihnep chi an ni lo. I thenawmpa/thenawmnu-in a nun pum a hlanna kha a ni ve a. Thil nep tak an ni lo tih hria ang che. Tin, Kristianna aia sakhaw hlun zawk leh thang chak zawkte pawh an ni fo. Hinduism chuan sakhaw upa ber niin a inchhal a, philosophy pawh an nei ril khawp mai. Islam chuan sakhaw pung chak ber niin a inngai ve thung (a dik chiah em tih erawh chu kan hre lo). Muslim Jihadi hovin an sakhua avanga thih an ngamzia pawh kan hria. Ngaihnep ngawt chi zawng a ni lo ve.

Hnawl. Sakhaw dangte pum hnawl tawp mai hi kan tih tur a nih hmel lem loh bawk a. Nun dan tha tam tak an inzirtir a. Khawtlang leh midangte tan thil tha lo hlir an inzirtir bik lo tih hriat a tha. Pawng hnawl tawp mai chuan hmangaihna aiin huatna, duhsakna aiin ngaihnepna a lantir zawk a ni. Ram a la lo hle ang tih a hriat mai.

Huat. Thenkhat chuan sakhaw dangte hi an haw hlur mai a ni awm e. Sakhaw dang haw tura inzirtirna phei chu Thuthlung Thar zirtirnaah hian a awm lo hial mai thei. Huatna chuan a betute a hnawl a, chu chu Chanchintha hrilna hmanrua atan a tha ber lo a ni. Tin, huat hi Kristian sakhua nen a inhmeh bawk lo va, haw miah si lova Chanchintha hrilh hi kan zir thiam tur chi a nih a rinawm.

Sakhaw dangte kan thlir dan tur tha

                  Khawtlanga kan nun honaah sakhaw dang kan thlir dan tur tha nia hriat theihte han sawi lang ila:

Zah. Sakhaw dangte hi zah takin kan en thiam a tha a, an phu tlangpui bawkin a lang. India ramah phei chuan Hindu sakhaw betute hi 80% lai an ni a. Kan rama (Central) a fawng chelhtute hi an ni deuh vek bawk a ni. Chuvangin, zah thiam a finthlak tih a lang. Tin, kan sawi tak ang khan sakhaw hlun tak, huap zau tak a ni bawk. Chutiang bawkin, Islam, Buddhism, Jainism, hnam sakhua leh a dang dangte pawh hi hun rei tak lo awm tawh leh miten an lo thih chilh thak thak tawh, mi tam takin an thih hnu khawvel atan thlenga lungawina an hmuhna sakhua a nih avangin zah tur an ni awm e.

Hriat. Midangte sakhua hi kan hre chiang lo hlawm hle mai. Kan pawng hnawl tawp fo thin. A pawi hle. Khawtlanga kan nun honaah te, Chanchintha kan hrilhna kawngah te awmze neia kan thawk dawn a nih chuan kan hriat chian a ngai ang. Hre chiang lova ngaihdan nei saa awm hi buaina tul lo tam tak tawhna a ni. Hre chiang lova haw tuktute hi an han hriat chian hnua an rinna meuh pawh pawmpui thui thei taktute an ni fovin ka ring. Chhandamna kawng anga kan hnawl dawn a nih pawhin hre chiang takin kan hnawl ang chu.

Ngaihhlut. Sakhaw dangte hi kan ngaihhlut thiam a pawimawh hle mai. Sawi tawh angin Kristianten kan thlir dan tam tak chu ngaihnep a ni thin. Mizoramah hian Kristian lo 13% vel an awm a, India ramah 97% vel, khawvelah 68% vel an awm bawk a. Heti chunga ngaihhlut nachang hre lo va kan ngainep a nih chuan a finthlak lo hle dawn a ni. Ngaihhlut tih hian  an zirtirna ‘pawm vek’ kan sawina a ni lo. Kan pawm loh chin pawh a awm ang, amaherawhchu, fing taka kan ngaihhlut thiam a pawimawh a ni.

Biangbiak. Hei hi tunlai tawngkamah chuan ‘dialogue’ an ti. Sakhaw dangte nena inzahtawnna, hre bik leh tha bika inngai chuang lova inbiakna a ni deuh ber mai. Inbiangbiaknaah hi chuan mahni induh bik a awm thei lo. Khawtlang nun sual do ho chungchang emaw, ram hnuk khawih pha chin policy emaw, sakhaw dangte nena kan inkar thu emaw sawiho turin hei hi a ngai thin. Fimkhur erawh chu a pawimawh khawp mai. Bible dahsang leh Chanchintha laimu thlahdul hauh lova rilru zau leh inngaitlawm taka tih chi a ni a. Midangte tumtlakna boruak nen chuan a inmil lo hle a ni.

Ngheh. Mi thenkhat thung chuan he sakhaw inpawlhsawpna hi an la run lutuk a, mahni nihna leh rinna laimu an phatsan hial thin. Nghet taka awm tur a ni ang. Chu chuan midang zah thiam te, ngaihhlut thiam te, biangbiak te a kalh lem lo. Nghet taka awm tur chuan mahni rinna leh midangte rinna hriat chian a pawimawh ber awm e.

Theologican-ten engnge an sawi?

Sakhaw hrang hrang inpawlhsawp (religious pluralism) hi tunlai khawvel dinhmun a lo nih tak avangin theologian-te pawhin an ngaihtuahna an seng nasa hle a. Sawifiah dan chi hrang hrang an nei thluah a ni. Chungte chu ngun deuh hlekin han bih ila:

Mi zawng zawng chhandam (Universalism)

                  Hei hi ngaihdan zau ber a ni a. A tawpkhawkah chuan mi zawng zawng hi, a bo a bang awm miah lovin chhandam an ni dawn, an ti. Isua Kristaa chhandamna chu khawngaihnain mi zawng zawng hnenah hlan a ni a, a ring emaw ring lo emaw, tu pawhin a tawpah chuan an chang vek dawn a ni. Hetianga an sawi theih chhan pawh tha ve angreng tak tak chu a awm:

1.      Pathian nihna – a hmangaihna leh engkimtithei a nihna- atang hian mi tam tak hremhmuna chatuana an awm mai tur chu inhmeh lovin an hria a. I Timothea 2:4 kan chhiar chuan Pathianin mi zawng zawng chhandama awmah leh thutak hriaah a duh thu kan hmu. Tu sualna mah, eng sual thiltihtheihna mahin Pathian thiltihtheihna leh hmangaihna chu a hneh dawn lo. Tin, hmangaihtu Pathian chuan thlarau pakhat chauh pawh a bo a phal thei lovang, an ti a ni.

2.      Lei tinrengin Isua chu Lal a ni an la puang dawn a ni, tiin Philipi 2:9-11 leh Thupuan  5:13 behchhanin an sawi thin. Chuti a nih chuan chhandamna chang vek turah an ngai a ni.

3.      Universalist ho chuan Rom 5:12-21-a Paulan Adama leh Krista a tehkhin thu behchhanin Krista aiin mi zawng zawng a thih tawh avanga mi zawng zawng chhandam ni tawh turin an sawi thin. Tin, II Korinth 5:19-a Pathianin Kristaah khawvel a rem thu kan hmuh tlawhchhanin an sawi bawk a. Hei hi Lalchhungkua kan tih pawlte inzirtirna a ni awm e.

                  Universalism chungchangah hei hi hria ila: Pathian chu hmangaihna Pathian leh engkimtithei a nih rualin dikna Pathian a ni ve tho bawk a. A hmangaihna chu Krawsah chiang takin a rawn lantir tawh a ni, chu chu keimahni lamin kan dawnsawn a tul tlat a. Lei tinrengin Isua hi Lal a ni tih an puang dawn tih hi kan lalawk dawn a nih chuan Setana leh a hote zawng zawng pawh vanram an kai dawn ni awm tak a ni. A nihna takah chuan chhandam loh zawng zawng pawhin Isua Krista chu lal a nihzia hi an la puang dawn tho tho a, mahse hei hian Chhandam an ni ang tih chu a hril kher awm lo ve. Tin, Bible-in mi zawng zawng aiin a thi tih thu a sawi lai takin, Rom 5:17 leh II Korinth 5:20-ah mimalin a thuthlukna a siam ngei a tulzia kan hmu a ni.

Sakhua zawng zawng hi chhandamna kawng vek a ni (Pluralism)

                  Religious pluralism tih chu ‘sakhaw inpawlhsawp’ sawina chauh a ni a, pluralism chu sakhua zawng zawng hi chhandamna kawng tling tak vek a ni tih ngaihdan a ni thung. Universalism anga mi zawng zawng chhandam sawi kher lovin, sakhua zawng zawng hi a tha bik awm chuang lovin chhandamna tling thu hril vekah a ngai a ni. He zirtirnain a thu kalpui dan tawi tein han tarlang leh ila:

1.      Pathian hi Kristian sakhuaah chauh hian a inpuang bikah kan ngai tur a ni lovang. Bible chauh ni lo sakhaw dang lehkhabute pawh hi Pathian inpuanna tha tawk ni vekah an ngai a. Hei hi Rom 1:18-23; 2:12-16; Tirhkohte 14:15-17; 17: 24-30; Johana 1, te tlawhchhanin an sawi thin a ni. Pluralist ho chuan Nazareth Isua kha Chatuan Pathian inpuanna famkim awmchhun angin an pawm thei meuh lo a. Chuvangin hmanlai atanga lo inhlan chhawn tawh Krista chungchang sawi dan Christology chu banin Christology thar an zawng ta thin a ni.

2.      Sakhaw hrang hrang te hi Pathian hnen thlenna kawng tam tak ni maiah an ngai a. Mi tupawhin sakhaw zirtirna ngunthluk leh uluk taka, ama sakhua zirtirna anga a zawm chuan chhandam an ni mai dawn a ni.

                  Pluralist te hi chi hrang hrang an ni a, an pluralism zirtir dan kawng a inang vek lem lo a ni. Chung zingah chuan John Hick hi hma latu hmasa pawl a ni a. Philosophy leh theology huanga ngaih pawimawh theih ve vein a sawi thiam a ni. Ani chuan Pathian nihna tak tak han sawi pha bik tumah an awm chuang lo va, Pathian chu ‘mystery’ – sawifiah zawh loh a nih avangin kan hriat angin kan be ve mai mai theuh a ni a. Sakhaw pakhat hian engkim a sawi kim vek lo bawk. Chuvangin sakhua zawng zawng pawh hi chumi biak dan pakhat chu an ni ve mai e. Sakhua ropui bik kan sawi dawn a nih chuan chu sakhaw betute chuan an ropui bikna chu an mimal leh khawtlang nunah an tihlan a ngai ang. Chutianga ti thei eng sakhua mah a awm bik lohna hian Sakhua zawng zawng hi a tha bik an awm chuang lo, tiin a sawi thin. Indian theologian Stanley J. Samartha hian hemi kawngah hian sul a su nasa ve hle mai. Ani hi chuan Krista nihna lam hi hriat thiamna thar (Christology) neih thain a hria a. Hmanlai inzirtirna pangngai anga Krista leh Pathian sawizawm lem lovin Krista chu Pathian inpuanna famkim pakhat, abik takin Kristiante tana a inpuanna ni mai angin a sawi a ni.

                  Indian Catholic Raymundo Panikkar thung chuan Isua leh Krista a then hrang a. Krista chu Pathian inpuanna a ni a, amaherawhchu, Krista hi sakhaw hrang hrangah pawh a awm vek a ni. Nazareth Isua nena sawizawm bik kher tur a ni lovang, a ti. Chuvangin sakhaw dang  pawhin Isua nei kher lo mah se Krista an nei thei ve vek a ni. Paul F. Knitter-a thung chuan A pawmtute tana Krista Isua Pathian nihna leh danglamna chu chawinung chungin sakhaw dang betute pawh chhandamna chang lo turah chuan a ngai chuang lo va; ring dik lo bikah pawh a ngai lem lo a ni. Ani hi chuan ‘Kohhran’ atangin ‘Krista’, ‘Krista’ atangin ‘Pathian’, ‘Pathian’ atangin ‘Pathian Ram’ (Chhandamna) chu kan theology hruaitu atan a duh a ni. Pathian Ram a sawi hi thlarau lam chhandamna ni ber lovin khawtlang nun (socio-economic life)-a Pathian duhzawng dikna leh inremna a thlen ang chi hi a ni mai.

                  Pluralism tanchhan tur hi Bible a vang hle a, kohhran chanchinah pawm a ni ngai mang lo va, Pathian Thu chhutna (theology) atangin sawi hnawk theih a tam hle a, ngaihtuahna fim a dawl vak lo a ni. Pluralism-in a zirtir ber chu ‘a chungchang sawi hleih theih loh Pathian,’ te, ‘Nazareth Isua ni lo Krista dang,’ te, ‘Bible tluka hlu Pathian inpuanna,’ te a ni nuaih mai. Pawm mai a la harsa a ni. Tin, hmun dang leh kawng danga Pathian inpuanna hi pawm chin nei mah ila, chhandamna tling a nih leh nih loh ngaihtuah tham tak a ni ang.

Kristaah ringlote tan pawh kawng a awm ve (Inclusivism)

                  Hei hi Pluralism aia ngaihdan zim hret, mahse particularism aia zau si a ni. Inclusivist ho chuan Isua Kristaah chauh chhandamna a awm a, amaherawhchu, Isua chhandamnain a huam vek avangin tun damchhunga Isua Krista ringlote pawhin chu chhandamna chu an chang ve thei dawn a ni, an ti. Catholic theologian lar Karl Rahner chuan ‘anonymous christians’ tih a sawi thin. Sakhaw dang betute zingah pawh hian Thlarau Thianghlim hnathawha anmahnia Pathian inpuanna ang zela dawngsawng a, remna, dikna, hmangaihna hmachhuantuteah chuan Krista Thlarau a thawk ngei a ni. Chutiang mite chu Kristian sakhuaah inziak lut lo mah se, Kristian an ni tho, a ti a ni.  Hemi zul tho hian Norman Anderson ve thung chuan Isua Krista chauh hi chhandamtu a nih thu a sawi a, mahse eng sakhaw bia pawh mahni sualna leh chak lohna hriaa ama hriat thiam pathian hmaah a intukluh chuan chhandamna beisei theihah a ngai a. Tun hnaia inclusivism sawi nasa leh fiah bertute zinga mi Clark H. Pinnock chuan, “Sakhaw tam tak inpawlhsawpna dinhmun atanga Pathian Thu kan chhut dawn chuan Isua Kristaa Pathian chhandamna hi khawvel zawng zawng thatpui tur thil a ni a….a hawl kimin a luhpui thuk hle….Pathian khawngaihna chuan duhsak bik a nei lo va, beitham tak a ni bawk lo….Krista Chanchinthaa kan hmuh theih chu mi tam tak chhandam an ni dawn tih hi a ni…,” a ti. Chuvangin, tuna la ringlo mi tam tak tan pawh beisei tur awmin a ring a, ‘ringtu chauh,’ tih hi a pawm ve lem lo a ni.

                  Inclusivism hi Kristiante zingah pawmtu tam tak an awm a. He thu sawitu tam zawk hian Isua Krista nihna leh amaha chhandamna awm chu an hnawl loh avang leh, ringlo leh Chanchintha hre miah lova thi te tan beiseina a siamsak avang hian pawm pawh a awl deuh a ni ang. Amaherawhchu, Bible pumpui thlirin tanchhan tur, a unau particularism-in a neih angin, a tam lem lo a ni (Melkisedeka, Joba, Kornelia dinhmun vel hi a tanchhan theih a, Thuthlung Hlui-a mite chhandam an nih dan tur sawifiahna atangin a sawi theih bawk). Pluralist John Hicka chuan inclusivist-ah hian, ‘Midangte sakhua aia mahni sakhua ropui zawka ngaih tlatna, mahni hmuhfiah dana midangte tehna’ a la inphum tho avang hian a duh lo hle a ni.

  

Dam chhunga Isua Krista ringtu chauh chhandam (Particularism)

                  Particularism chu Isua Krista ringtute chauh chhandam an ni ang, tih rinna hi a ni. Mizo Kristiante zawng zawng nihna a ni deuh mai. He ngaihdan hi a chak a, chhandamna chungchangah sakhaw dangte a hnawl hneh em avang hian mi tam takin pawm harsa an ti thin. Hmanlai atanga Kohhran lo inzirtirna ni mah se tunlai khawvelah chuan mi tam takin hei aia nem deuha pawm an duh tawhzia chu a chunga kan ziah lan tawhah te khian a lang mai awm e. Particularist tam tak an awm a, sawi lang vek seng lo mah ila thenkhat tal chu han tarlang leh ila.

                  Kum zabi 20-na chawhma lama particularist lar deuh te  chu Karl Barth leh Hendrik Kraemer te an ni a. Karl Barth-a hian sakhua zawng zawng a hnawl a, Krista-ah chauh chhandamna a awm zia sawiin Pathian inpuanna chu Kristaah chauh a ni, a ti mai a ni. Hetiang deuh bawk hian Hendrik Kraemer-a chuan Isua chauh hi kawng leh thutak leh nunna a ni, tiin 1938-a International Mission Conference (a hnuah WCC) Tambaram (Tamil Nadu)ah a lo aupui lauh lauh tawh bawk a.

                  Tunlai hunah chuan Evangelical ho hi particularist an ni tlangpui a, amaherawhchu, inclusivism hian evangelical chhungkuaah pawh ram a la zau sawt hle a ni.  Hemi chungchanga lehkhabu changtlung tak ziak zingah chuan Millard J. Erickson hi a thawhhlawk khawp mai. Ani hian Protestant inzirtirna pangngai- hmun danga Pathian inpuanna pawh pawm thiam chin nei chungin chhandamna chu rinna neitu mimal atan chauh a nihzia a sawi. Harold Netland hian John Hick-a Pluralism a do hle bawk a. Pluralism chu tunlai khawvel dinhmunin a hrin chhuah mai mai niin a ngai hmiah mai a ni. Sri Lanka mithiam Vinoth Ramachandra thung chuan Stanley Samartha te, Raimundo Panikkar te zirtirna ang kha hnawlin Lal Isua ringtu tan chauh chhandamna chu a nihzia a sawi a. Sakhaw dangte pawimawhna thu tak erawh chu a pawm  ve tho a ni.

                  Particularism hian Bible-ah tanchhan a ngah ber awm e. Johana 3:16, 18; Tirhkohte 4:12 ; Rom 10: 9-15; Johana 14:6; 17:20 te hi a pawimawh zual an ni a. A dang tam tak a la awm ang. Thuthlung Hluia sakhaw dang sawina tam zawk chu a chhe lam a ni zawk a (Ex. 20:3-6; II Chro. 13:9; Isa. 37:18-19; 40; Jer. 2:11; 5:7; 16:20; Tirh. 26:17,18; Kol. 1:13). Sakhaw dangte hian chhandamna tling khawp thu an pai lo tih kan hmu (Tirh. 19:26; I Kor. 1:21; 8:4-6; 10:19-20; Gal. 4:8; II Thess. 1:8; cf. I Thess. 2:13). Bible hian chhandamte chu tlemte an nih thu a sawi thin. Chu chu Nova hunah kan hmu a, Peteran hun hnuhnung entirnan a rawn hmang chiah bawk a (I Peter 3:20,21; II Peter 3:6-7). Tin, Bibleah hian mi thenkhat sakhaw danga ‘eng’ hmu mah se chhandam an nih theih nan anmahni ngeiin Isua an rin a ngaih thu kan hmu leh nual mai- Samari mite (Johana 4:9, 24), Juda mi Pathian ngaihsak ho (Tirh. 2:5, 38) Juda ho (Rom 10:13), Pathian tih Jentailte (Tirh. 9:2; cf. 10:33, 43). An sakhuaah chuan an tha tih a chiang, mahse Isua Krista an rin a ngai tho a ni.

Kohhran Pawl Hrang Hrang Ngaihdan

                  Khawi kohhranah pawh a memberte (theologiante pawh ni se) ngaihdan rual leh inang thlap vek chu a ni thei lo tih chiang sa a ni a. Amaherawhchu, pawlin a thu kalpui dan an thu puan chhuahte kan en chuan an ngaihdan eng emaw chin chu kan hrethiam thei ang.

                  Roman Catholic te ngaihdan tlangpuiah chuan sakhua zawng zawng hian inkungkaihna chi khat an nei a. Judaism hian Kristianna hi a hnaih ber a, Buddhism (Pathian sawi lo sakhua) hian a hlat ber an ti. Kristian sakhua hi chungnung berah an ngai a. Sakhaw dangah hian ‘eng’ erawh chu awm ve zelin an hre bawk. Chhandam nihna tur erawh chu, a tawpkhawkah, Krista a ni tho tho, an ti a ni. A chunga kan sawi inclusivist approach hi an hmang a ni mai e. Lutheran ho pawh a tlangpui thuin inclusivist an ni a, theologiante zingah thuthlukna tlak rualna deuh a awm mawh khawp mai. Reformed ho pawhin harsatna an tawk ve tho a. PC(USA) chuan, “Kan inchiahpiahna khawvelah hian Isua hi thutak, Pathianin amah kaltlangin nunna a pe a ni tih kan puang a. Isua chuan thutak min kawhhmuh a ni lo va, amah kha thutak a ni,” an ti mai. Tunlai khawvel atan chuan an rum khawp mai. Mahse, sakhaw danga Thlarau Thianghlimin hna a thawhzia pawh an sawi tho a. Sakhaw dangte chhandam nihna chungchangah chuan an ‘silent’ a ni deuh ber mai. Baptist kohhrante hian a pawlpuia hemi chungchanga thuchhuah an la nei lo a ni mai thei. US-a Protestant pawl lian ber Southern Baptist Convention te khu chu conservative taka particularist a ni tih erawh chu a hriat a ni.

                  Evangelicals leh Ecumenicals ho chungchang kan sawi hian Kohhran ni lovin Mission kalpui dan inang lo deuh group hnih kan sawina mai a ni a. Evangelical chhungkuaah pawh ngaihdan inang lo deuh hlek a awm thin. Evangelical Thurin ang deuhthawa an ngaih Lausanne Covenant (1974) chuan particularism hi a puang a, Manilaa Inkhawmpui Lian 1992-a an neihah chuan an dam chhunga Isua Krista rinna lantir lote tan chhandamna kawng a inhawn leh hawn loh (inclusivism) thuah chuan, “Lungruala thuthlukna kan nei thei rih lo va. Zir chian lehzual a ngai kan ti,” an ti thung a ni. Evangelical chhungkuaah hian pluralist awm lovah a ngaih theih a, particularist an ni tlangpuiah ngai ila, inclusivist ten hmun an chang zau sawt viau a ni mai thei. Ecumenical (WCC) lam thung chuan keini ho ngaihdana, “Ringlo chu meidil tla tur,” han tih hlawm tawp mai hi an tim thin a. Mission and Evangelism in Unity Today (2000) thuchhuak chuan: “Isua Krista lo chu Chhandamna kawng kawh hmuh tur kan nei lova; chutih rualin, Pathianin  chhandam tura a thiltihtheihna hi ramri kan lo kham sak thei ngawt lovang. Sawi fel theih rih loh thil pahnih a la awm” a ti. “Heng thil pahnih inkawlkalh awm tak takte hi tha kan ti ve ve a, sawifel pawh kan tum ber chuang lo,” tih thu 1998-a WCC lehkhabu chhuah Called to One Hope: The Gospel in Diverse Cultures tih chuan a sawi bawk.

Tlangkawmna

                  Sakhaw tam tak he khawvelah hian kan awm avang leh chungte nen chuan kan inpawh a, kan insut a, innghirnghona, tharum thawhna hial a thlen fo tak avang hian Kristianten sakhaw dangte kan en dan tur fel tak kan neih a ngai tih a chiang hle a. Khawtlanga nun honaa inhmuh hniamna chawk chhuak lo zawng si, Chanchintha laimu paih chuang si lo ngaihdan vawrh chhuah a pawimawh hle. Theologiante chuan an tum thin. Amaherawhchu, lungrual tlanna a awm thei chiah rih lo a ni ber.

                  Mizo kohhrante chuan a chunga kan sawi Particularism khi kan pawm dan tlanglawn ber a ni a, a dang chu kan ei lo viau rih a ni. Kristian history leh Bible zirtirna nen pawh a inmil berin a hriat a. A him pawh a him ber a ni. Universalism leh Pluralism te hi ngialngan tak han pawm tawp mai hi chu kan awm meuh a rinawm loh laiin Inclusivism hi chuan mi tam tak a hneh tawhin ka ring deuh. Kan inven a tulna ruam pawh a ni mai thei. Inclusivism-ah hi chuan ringlote hnena Chanchintha hril tulna lam kan hriatna a tlahniam thei hle dawn tih a lang mai. Chutih lai chuan Ram leh khawtlang dinhmun, Bible zirtirna leh Chanchintha hril pawimawhna hre rengin sakhaw dang kan hmuh danah fimkhur taka kal a pawimawh telh telh dawn a ni. Rawtna emaw, theology hial emaw, kan chher thei a nih phei chuan a lawmawm lehzual ang.

                  Chal hnawih sentu hi chuan hemi chungchangah hian heti taka a ngaihtuah thin a rinawm lem lo va. Nunphung pangngaia a hmuh thiam danin a che a ni deuh mai awm e. Political advantage emaw, disadvantage emaw a thlen mek karah hian Kristiante leh sakhaw dang zuitute chungchang hi i ngaihtuah chiang ang u, tiin kan insawm a ni e.

                                                            *****RE031113*****