𝐊𝐓𝐏 𝐋𝐄𝐇 𝐊𝐄𝐈

KTP hi ka hriat theih tirh atangin ka ngaisang nghal a ni mai thei. Kum 14 ka nih hma daih tawh khan an thiltih velnaah khan tel ka chak tawh thin tih ka la hria. Kum tlin velah ka inziak lut ve nghal mai reng a. Kan phur nghal em em ringawt mai a nih kha. Keini thingtlang khuaa sei lian, mahni khua bak tual chhuak ngai lem lo, internet leh social media awm hma khawvel tak taka rawlthar nun lut tan kha chuan kan KTP hruaitute kha kan ‘heroes’ tak tak an ni. Kan ngaihsan leh kan entawn ber an ni lo thei lo. 

𝐅𝐞𝐥𝐥𝐨𝐰𝐬𝐡𝐢𝐩𝐚 𝐤𝐚 𝐭𝐞𝐥 𝐡𝐦𝐚𝐬𝐚𝐤 𝐛𝐞𝐫

Khami tum kha kan kohhran KTP  vung lai tak a lo ni awm e. Camp chhuak an hlim tlan lai deuh niin ka hria. KTP Secretary nupui nei tawhin thuchah tawi te, “Lal Isua hi kan ngaihzawng theuh ni sela,” tih uar taka a sawi leh Isua hi kan nuna kan ngaihzawng theuh a nih theih nana a tawngtai ngawih ngawih mai kha ka theihnghilh thei tawh lo. Khang hun lai kha chuan chawlhni tlai tin fellowship, a sawmtu in hrang hrangah kan nei lawr thin a, a nuam thin hle mai. Thingpui thlum an rawn sem kha kan nghahhlelh ber pakhat a ni a. Nu ei rawng bawl cooker phit ri a ring duh hle!

Zai hona, thupui thlan sawi hona, rilru sawi, hla zir, tein hun kan hmang ber a. Fiamthu thawh hun a awm bawk thin a, a ‘hot’ thei hle a ni. Khatih laia kan fiamthu thiam, kan u rual fe, pakhat phei kha chu ani fiamthu thawh aia ka nuih nasat tun thleng hian ka la hre bik lo. Fiamthu session erawh  kha chu kan ching chhunzawm rei ta lem lo niin ka hria. Thlarau thutak hi fiamthuin a hip ral duh riau bawk a ni. Thlarau leh taksa, rilru leh ngaihtuahnaa thang mek tan khang hun te kha a lo va pawimawh tak em! Ka hun hman tawha ka ngaih ber berte an ni.

 

𝐊𝐓𝐏 𝐡𝐫𝐮𝐚𝐢𝐭𝐮𝐭𝐞 𝐩𝐚𝐰𝐢𝐦𝐚𝐰𝐡𝐳𝐢𝐚

Kan hotute kha kan ngaisangin entawn kan tum nasa hle a. Ka thian pakhat phei chuan a thlarau nunah “Kan leader ang nih hi ka tum tawp…” a ti hmiah mai nia. Kha tih laia kan leader kha kan Pathianin a lo hmang nasa awm hian ka hre hnuhnawh a. Kei phei chuan ‘Wayne Cole’ ang dawn riau hian ka hre thin a. A sermon-te hi kan ei duak duak mai a ni. Camping ‘Speaker’ tha ni thei turah kan ngai. Tun hnuah hian chuti taka thu sawi thiam a lo ni lem lo tih ka hre leh hnuhnawh chauh mawle! A thusawi ka vawn reng pakhat chu, “Kan hmaah kawng pahnih pathum a lo awm a, Pathian duh ber hriat a harsat tawh chuan a kawng harsa ber, a hrehawm ber kha zawh ila, Pathian min duhna kawng a lo ni nge nge thin,” a tih ka la hre reng. Nun hruaitu atan hman zel ka tum bawk.

Hla kha kan zir nasa thin hle a. KTP nih leh hla zir kha chu a inzawm tlat avang khan, zai mi ni emaw ni lo emaw, aw tha kan nei emaw, nei lo emaw kan zir miah miah mai a ni. Hla pawh kan thiam hnem. A lo tangkai ngawt mai. Zaipawl conductor nih ka lo tum vena rilru kha chu a hlawhtling ta lo a ni! Mahni kohhran ni lova zaipawl rem tura kal kha a nuam riau bawk a, kan phur thin hle. KTP hnatlang mawlh mai hi a nuam thin a. Thalai ngang kha kan ni bawk a, boruak nuam tak a ni. Hah pawh kan hre ngai lo. Krismas Carol hi nuam ber pakhat a ni a, a vawt em em thin bawk. Kan tel tirh chuan in tin khan pawisa an lo pe thin a, suam tuakna ang deuhvin kan ngai titih emaw ni dawn ni? A hnu deuhvah hotute chuan “Sum khawn tur kan ni lo va, pe chhuak zawk tur kan ni,” tiin Krismas dawnin sum min tuakpui nghek nghek a, Carol zanah khawsak lama harsa zawkten Krismas an lo hman nawm ve theih deuhna atan an sem chhuak ta thin a ni. An ‘idea’ leh inpekna kha pui tak a ni.

 

𝐊𝐚 𝐭𝐡𝐢𝐥 𝐭𝐚𝐰𝐧 𝐫𝐨𝐩𝐮𝐢 𝐩𝐚𝐡𝐧𝐢𝐡

KTP ka tel chhoh tan tirh hian kan kohhranah Camping a awm a. Chhandamna chungchangah ka chian tawk loh avangin ka lut ve a. Piangthar anga inngaiin ka chhuak ve mai a. Mahse chian lohna ka nei chhunzawm ta tlat mai a. ‘Chhandam nih inhriatna/thih thlamuanna’ ka nei hleithei ta lo. Ka sawi chhuak zak tawh si. Ka buai ru rei hle a ni. Chutih lai chuan kan hotute chuan Work Camp an rawt a, kan kal ve a. Beisei piah lamah Pathian Thu sawihona a lo tam a, kan harsatnate kan inpuang ta a. Chumi chhunzawm zel chuan kan KTP hruaitute chuan ‘Counselling Class’ min neihpui ta char char a. Pathian Chhandamna duhawm tak chiang takin ka lo hre ve ta a. Tun thlengin ka buai ta ngai lo reng reng a ni. KTP rawngbawlna hi a lo va hlu tak em!

Hemi hnu pawh hian Pathian Thua tui danglamna lutuk chu ka la nei chuang lo va. Dam chhunga Pathian Thu han ngaihtuah leh buaipui mai chu a ninawm dawna hriatna te pawh ka la nei tho. Chutih lai chuan zan khat chu ‘tlaivara Pathian pawlna’ neih tur, an rawn ti leh ta a. Khami zan kha ka tlaivar chian hmasak ber a ni awm e. Pathian pawlna nasa tak ka chang tih loh theih lohvin ka kham lo hle a ni. A tuk zingah inah kan hawng a, ka khumah ka han mut thlak riai riai lai chuan ‘Pathian Thu hi a ninawm lo a ni’ tih hi ka thinlungah fiah takin a rawn lang leh ta. Vawiin thleng hian Pathian Thu sawi, leh thu harsa deuh han zir chian a, han chai, han indebate fia te hi ka ning thei tawh lo a nih ber hi. KTP hi Pathianin a lo va han hmang nasa tak em!

 

𝐓𝐮𝐧𝐥𝐚𝐢 𝐊𝐓𝐏

A hminga Kohhran hruaitu kan nih ve hnu hian KTP chhum hmin ngatte hi chu kan induh der deuh thin a ni awm e. KTP hi kan tan hlur mai bawk a. Central KTP inkhawmpui a lo thlen chang te hian lung a tileng thar leh thin. Eng pawh ni se, tunlai KTP te nihphung leh zia tak tak chu zu hriat phak loh pawh kan nei nual tawh ang a. Khawvel danglam zelah kan hriat KTP nen kha chuan a danglamna deuh pawh a awm tawh mai thei e. Chutih lai chuan KTP thiltum tihhlawhtlinna hna hi pen san hauh lova, he hmuna rawngbawlna hi a hlu a ni tih hre reng chungin han tang sauh sauh hlawm teh se. Hual veltu chhumpui nasa tak angin kan lo thlir reng a nih hi.

 *****